Biñ mñaa gur ded rnuñ yu gyeey
5
De ru,
yu feñ,
bduꞌ cuen shcab lily ne̱.
Bzuub gyidag der de riidz ni de coz nu rad lagya̱.
2 Benu ni gyicy ru,
orzeꞌ gac ru mbecy nu ricy cuidad ub.
Nunu gac niir gal nu rnii mbecy nu yuꞌ shcab ni.
3 Riidz ni biñ mñaa gur ded ish zir ñi gazeꞌ dziñ doo.
Nunu riidz nu rniim cyudz zir ñi gazeꞌ asecy.
4 Tees ornu gyaꞌ loñ,
orzeꞌ nam gal nu na tub coz lya zir gazeꞌ lya ma.
Dzi zir gyicy ñi da̱y gazeꞌ tub mandzicy nu rup chu laꞌ laa ruꞌ riꞌñ.
5 Nez nu cham,
ndeꞌ nez nu ya zeꞌ nu yuꞌ mbecy gut.
Li laa za num ru ruꞌ gyerbaa.
6 Wagyicy cuen lam mod nu rlagy ñi nu gyicy mi nu cui mbañ mi.
Ni wagad lagy mi ti shiñ ricy mi.
7 Na de ru,
yu feñ ne̱,
bzuub gyidag der ne̱.
Cueꞌ gruu chur lo de coz nu lyu̱u̱ nir.
8 Bruu chu lo biñ mñaa gur ded.
Ni cueꞌ gyechaꞌr roꞌm
9 nis cuic ru gyel nap nir ni reñaꞌ mbecy,
nunu de coz nu gyicy ru gan cueꞌ cuic ru ni de mbecy yad.
10 Gun de mbecy yad wadzaa ni dey nu de coz nu druu lo fers nir
gal nu de coz nu druu lo riiñ nu ricy ru.
11 Na ornu shuub dzi nu bi rgaab gat ru,
orzeꞌ gun ru lat nu gyagyidz cuerp nir tub dzi ga.
12 Orzeꞌ niir:
“¿Lagu wansuub gyidaga̱
ornu pshuu nu mbecy ya̱?
¿Lagu bzu chu̱ de consef nu briic dey ne̱?
13 Ya̱ wangalagya̱ zuub gyidaga̱ ni moscuel.
Ni wangyicy cuena̱ ni de yu nu blyuu ne̱.
14 Orzeꞌ de repent la bruu gyel mbecy ne̱ lo rgüii dela mbecy zigy”,
niir.
15 Bicy paa nu mñaa ziꞌl ru,
nunu fiñ zeꞌ ziꞌl car.
16 A̱ꞌ nap nu cuic ru iꞌñ biñ mñaa nu rded lat cay.
17 Nap zir benu de iꞌñ ru chuꞌy lor.
Orzeꞌ cueꞌ nu chuꞌ dey lo biñ mñaa nu a̱ꞌ yuꞌ lor.
18 Nap cyiiñ nur mñaar,
nunu zu cyit lagy ru nu nac fiñ nu pchelaar lat nu feñ ru.
19 Rabee fiñ nu dzi rcar zeꞌ gal nu rabee tub dziñ nu un la rza.
Rila wayecañ nu cab yaañ ru.
Nunu dub laa tiem caañ ru.
20 De ru,
yu feñ,
¿lagu ri yaar biñ mñaa gur ded?
¿Lagu char carer yeñ yaa biñ nu walab mñaar?
21 Ñgyoozh,
Shuaan na,
rad lagy mi dela coz nu ricy mbecy.
Mi zeꞌ rzac mi dela coz nu ricy ru.
22 Mbecy a̱ꞌ nap gyet lag yu nañ caa ni de coz a̱ꞌ nap nu ricy yu.
De cyi nu ricy yu ndeꞌ nañ gal nu na tub duu cacy nu cyiig ñiy.
23 Yu zeꞌ gat yu nu nac nu wagac gyicy yu mandaar ub yu.
Orzeꞌ yu zeꞌ nit loy nu nac gyel ton niy.