Shcab lily lyuuñ ni den lac mod cyiiñ na
4
De ru yu feñ ne̱,
nap bduꞌ cuen de consef nu dric ya̱,
uz ru.
Nap bduꞌ cuen,
gun orzeꞌ gad shcab nap nir.
2 Ya̱ nap rlyu̱u̱ nir.
Orzeꞌ cueꞌ zu chur de coz nu rlyu̱u̱.
3 Gun niꞌ ya̱ guca̱ iꞌñ de uza̱.
Ña̱a̱ mniscam ya̱.
4 I mod blyuu uza̱ ne̱.
Orzeꞌ nay:
“Pcaa ic de riidz nu rne̱e̱.
Bicy gal nu rne̱e̱ nu gyicy ru.
Orzeꞌ cui mbañ ru.
5 Bloo lo nu gad shcab lily nir nunu shcab nap.
Cueꞌ zu chur coz nu ya̱ rne̱e̱ lor,
nunu cueꞌ nit lagy ruñ.
6 Pca shcab lily,
nunu cueꞌ neꞌr ñii,
gun ndeꞌ gyicy ñi nu se la la zac ru.
7 Ricy zir ñi presis nu gad shcab lily nu shcab nap gazeꞌ deꞌ zir coz.
8 Car ñii.
Orzeꞌ gyicy zily ñi ru.
Fert ganash ruñ.
Orzeꞌ gyicy ñi nu ca lagy mbecy lor.
9 Ndeꞌ nañ gal na nu zuub ñi coron ni gyee lagyis toor
par nu gabe nu ca lagy mbecy lor.”
10 De ru yu feñ,
bduꞌ cuen de riidz nu rne̱e̱.
Orzeꞌ gyicy ru nu zañ zir ñaꞌn cyiiñ ru gyishlombecy.
11 Ya̱ gyicya̱ nu gyañ shcab nir,
nunu gyicya̱ nu gad lagy ru lac mod gyicy ru.
12 Lat nu cyiiñ ru gyishlombecy,
ni tub la coz wac diiñ ru.
Ni tub la coz wayicy ñi gan ru.
13 Cueꞌ laa yaar coz nu lyu̱u̱ nir.
Cueꞌ gur gyicy nu lar ñii.
Gyicy ru gal nu rne̱e̱,
gun ndeꞌ gyicy ñi nu cui mbañ ru.
14 Cueꞌ checar ich de mbecy a̱ꞌ nap.
Cueꞌ gyicy ru gal nu ricy dey.
15 Cueꞌ gash ru nez nu zay.
Bruu chu lo nez zeꞌ.
Orzeꞌ zaab za lar nez nir.
16 Gun de yu zeꞌ wagaas dey
benu wagyicy yu coz a̱ꞌ nap.
Ni pcaal dey wagash
benu wayicy yu nu gadza losaꞌy.
17 Ornu ricy dey coz a̱ꞌ nap,
nunu ornu shet ziy losaꞌy,
ndeꞌ nañ gal nu na coz nu gow dey nunu coz nu goꞌy.
18 De mbecy nap,
coz nu ricy de yu zeꞌ,
ndeꞌ nañ gal nu na ornu driib doo tuubaꞌ dzi.
Zaab rzu yaa zir gashtal gyap la or widoo.
19 Zeꞌ de mbecy a̱ꞌ nap,
coz nu ricy dey,
ndeꞌ nañ gal nu na tub zeꞌ nu cow.
Wagad lagy dey la coz ricy ñi nu gadzay.
20 De ru,
yu feñ,
bduꞌ cuen de riidz nu rne̱e̱.
Nap bzuub gyidag der niñ.
21 Cueꞌ caa chu lor looñ,
sinu pcaa ic ñi.
22 De riidz zeꞌ gyicy ñi nu cui mbañ dela mbecy nu gad lagy ñi,
nunu gyicy ñi nu cyiiñ ruub dey.
23 Coz nu ricy zir ñi presis,
ndeꞌ nu gyicy cuidad ru mod nu gash ru shcab,
gun ndeꞌ gyicy ñi nu cui mbañ ru.
24 Cueꞌ niir coz fals.
Bruu chu lo gyel guu.
25 Nap bgüii ca par cha ub ziꞌl ru.
Li ziꞌl bgüii par lo.
26 Bgüii ca zeꞌ nu zuub gyiꞌr.
Dub laa tiem zuub gyiꞌr lo yu cyigy.
27 Cueꞌ gadzar ni par bee,
ni par reg.
Bruu chu lo coz a̱ꞌ nap.