Consef par yu feñ
3
De ru,
yu feñ ne̱,
cueꞌ nit lagy ru de coz nu rlyu̱u̱ nir.
Pcaa ic der de coz nu rne̱e̱ nu gyicy ru.
2 Orzeꞌ gyatuñ lo yur,
nunu cheti ri añ nir.
3 Rila cueꞌ checar nu car losaꞌr,
nunu cueꞌ checar nu niir riidz rishli.
Bicy de coz zeꞌ nu ndeꞌ nañ gal nu na tub bec nu ri yeñ ru.
Bicy nu ndeꞌ nu nañ gal nu na coz nu pcaar nañ lardoor.
4 Benu gyicy ru ndeꞌ,
orzeꞌ gac ru mbecy nap par lo Ñgyoozh
nunu niꞌ ziꞌl par lo de losaꞌr.
5 Bicy cup consuel lo Ñgyoozh Shuaan na nu dutuub lardoor,
nunu cueꞌ gyicy cup ru consuel lo de coz nu druu nañ shcab nir.
6 Bduꞌ lo dela coz nu ricy ru lo Ñgyoozh.
Orzeꞌ mi zeꞌ lyuum nir mod nu rlagy ñi.
7 Cueꞌ nii toor nu dzi yuꞌ shcab nir.
Bdzib lagy lo Ñgyoozh,
Shuaan na,
nunu bruu chu lo de coz a̱ꞌ nap.
8 Benu ni gyicy ru,
ndeꞌ nañ gal na tub cuaan nu gyicy nap ñi cuerp nir.
9 Bicy nu gabe nu rca lagy ru lo Ñgyoozh,
Shuaan na
nu nac gyel nap nu cuic ru nim,
nunu nu nac de coz nap zir nu gruu lo de cosech nir nu cuic ru nim.
10 Benu ni gyicy der,
orzeꞌ mi zeꞌ gyicy mi nu dzaa la nañ ye nir,
nunu shu lañ ruꞌ gyis ñup nir.
11 De ru,
yu feñ ne̱,
cueꞌ dily lor lo Ñgyoozh ornu rshuu num ru.
Ni cueꞌ gazeed ru lom ornu gyicy nap mi ru,
12 gun benu Ñgyoozh rcam mbecy,
orzeꞌ shuu num yu gal nu ricy tub mbecy nu iꞌñ yu nu dzi yet lagy yu.
13 Dzi yet lagy mbecy benu galy shcab niy,
nunu benu gac yu mbecy siñ too.
14 Dzi zir grusub ñi niy gazeꞌ nu gyicy cup yu plat.
Nunu coz sheñ zir gad niy gazeꞌ nu gyicy cup yu or.
15 Dzi zir sac shcab lily ni mbecy
gazeꞌ urndub nu tonaꞌ la ñgyup sac.
¡Nunu wasaap ñi ni tub la coz nu yet lagy mbecy!
16 Shcab lily gyicy ñi nu cyiiñ tuñ ru gyishlombecy,
nunu gyicy ñi nu gyicy cup ru zañ coz,
nunu gyicy ñi nu ca lagy mbecy lor.
17 Shcab lily zeꞌ gac gyicy ñi nu gusht cyiiñ ru gyishlombecy,
nunu nap chuꞌ nur losaꞌr.
18 Benu mbecy ricy cup yu shcab lily,
orzeꞌ cui mbañ yu.
¡De mbecy nu ricy cup shcab lily dzi yet lagy dey!
19 Ñgyoozh bzuub mi gyiꞌ gyishlombecy nu nac shcab lily nim,
nunu laab nu nac nu yuꞌ shcab nim psaꞌ lagy mi de baa.
20 Nunu gyiꞌ nu yuꞌ shcab nim bicy mi nu byareñ nis nu de yu wach,
nunu ricy mi nu za rshet ñi gyey.
21 De ru,
yu feñ,
dub laa tiem gyicy ru fers nu nap gash ru shcab,
nunu cueꞌ nit lagy ru nu cuir ca na coz nu nap.
22 Gun de nu nde gyicy ñi nu cui mbañ ru.
Ndeꞌ nañ gal nu na tub bec nu ri yeñ ru.
23 Orzeꞌ dub gusht la chesar gyishlombecy ii,
nunu rila walagy gyiꞌr.
24 Na ornu gabish ru,
orzeꞌ wadzib ru,
gal nu ornu gas ru,
nap gash pcaal ru.
25 Walagy ñi dzib ru lo gyel zi nu sij ziꞌl gruu zac.
Ni wadzib ru nu nit lor gal nu rzac de mbecy a̱ꞌ nap.
26 Gun Ñgyoozh gyicy mi nu wadzib lagy ru,
nunu wazaan mi nu gyet lag ru nañ caa.
27 La ziꞌl tiem nap gyicy nur mbecy
benu rlagy ñi nu nap gyicy nur dey,
benu gad mod nir nu ni gyicy ru.
28 Cueꞌ niir lo mbecy nu locyuub ruy ina
benu gac locyuub ruy na la.
29 Cueꞌ co ic ru nu shiñ gyicy nur de mbecy nu rcyiiñ nur gaab ga,
yu nu ricy cup consuel lor.
30 Cueꞌ tub sur ni tub la losaꞌr nu riidz
benu se la la bicy nuy ru.
31 Cueꞌ nii toor nu galagy ru gyicy ru gal nu ricy mbecy nu rshet zi losaꞌ.
Cueꞌ gyicy ru gal nu ricy de yu zeꞌ,
32 gun Ñgyoozh rzi lagy mi lo de mbecy shiñ ricy,
tees nac num mbecy nu nap ricy.
33 Ñgyoozh zaa lagy mi ni de mbecy nu rcyiiñ nañ yuꞌ mbecy a̱ꞌ nap,
tees nap gyicy num de mbecy nu rcyiiñ nañ yuꞌ ni mbecy nu ricy coz nu seꞌñ.
34 Ñgyoozh gubdzaam de yu nu rgubdzaa,
tees nap gyicy num de mbecy nu ricy gyel gyidz ni.
35 Coz nu gyicy mbecy nu yuꞌ shcab gan,
ndeꞌ nu ca lagy losaꞌy loy.
Zeꞌ de mbecy ton,
gyicy mi nu gabe gyel too lo ni dey.