Coz nu gad nu nac shcab lily
2
De ru yu feñ ne̱,
“O” mnii ni de riidz ne̱.
Pcaa ic de coz nu ne̱e̱ nu gyicy ru.
2 Bzuub gyidag shcab lily ne̱,
nunu bicy fers nu gyet lag ru cuen.
3 Nu dela fers nir bdiiñ nu galy shcab nir,
nunu bdiiñ nu gac nap shcab nir.
4 Byub shcab zeꞌ gal nu ryub ru plat o tub coz nu dzi sac nu ri ngach.
5 Benu ni gyicy ru,
orzeꞌ gad lagy ru lac dzib lagy ru lo Ñgyoozh,
Shuaan na.
Orzeꞌ gad lagy ru lac cuꞌ lor mi.
6 Gun Ñgyoozh,
mi zeꞌ biñ nu rbic shcab lily na.
Riidz nu griib ruꞌm,
ndeꞌ shaal ñi lac zu gyishlombecy,
nunu gyicy ñi nu gyet lag na cuen.
7 Ñgyoozh,
Shuaan na,
locyuub mi de mbecy nap,
de yu nu sac falt ni,
nunu zaab ic mi yu nu cueꞌ shiñ zac yu.
8 Ñam de yu nu ricy mod nu seꞌñ,
nunu zaab ic mi de yu nu ricy paa nu cueꞌ shiñ zac yu.
9 Benu zuub gyidag ru ne̱,
orzeꞌ gad lagy ru la na coz nap nunu la na coz nu seꞌñ.
Orzeꞌ zu bich ru nu nac ga ub coz nap ziꞌl.
10 Orzeꞌ shcab nir gyalily nañ,
nunu coz nu gad lagy ru nañ gal nu na tub coz ish nañ lardoor.
11 Orzeꞌ se la la zac ru nu nac nu nap na shcab nir,
nunu nu nac de coz nu gad lagy ru.
12 Ndeꞌ gyicy ñi nu glar lo de coz a̱ꞌ nap nu ricy mbecy shiñ rnii,
13 de yu nu checa nu ricy coz nap.
Orzeꞌ gyicy dey coz a̱ꞌ nap ziꞌl.
14 De yu zeꞌ gusht niy nu shiñ gyicy yu,
nunu yet lagy dey coz a̱ꞌ nap nu ricy yu.
15 Nañ gal nu na nu za dey tub nez nu dzi ryach.
Orzeꞌ bruu chu dey lo nez nu li za.
16 Nunu benu zuub gyidag ru ne̱,
orzeꞌ glar lo biñ mñaa gur ded.
Glar lo biñ mñaa nu dzi leꞌ ro riidz.
17 Mi zeꞌ bzaan mi ñgyeem nu pchelaam lat nu feñ mi.
Nunu mnit lagy mi trat nu bicy num Ñgyoozh ornu pchelaam.
18 Benu tub mbecy gash yu nez nu ya par yuꞌm,
ndeꞌ nañ gal nu na nu gush yu nez nu ya zeꞌ nu yuꞌ mbecy gut.
19 Orzeꞌ de yu nu rzuꞌ nañ yuꞌm wabish cya gaꞌ dey
nu cyiiñ yu gal mod nu pcyiiñ yu anzir.
20 Orzeꞌ rlagy ñi cyiiñ ru tub mod nu nap.
Nunu gyicy ru gal nu ricy mbecy nu ricy coz nu seꞌñ.
21 Gun de mbecy nu nap ricy,
de mbecy zeꞌ gad yu nu cyiiñ yu loñ.
De mbecy nu sac falt ni,
gyiyeeñ yu loñ.
22 Zeꞌ de mbecy a̱ꞌ nap Ñgyoozh cyuu num dey ledz yu,
nunu com mbecy nu za contr nim
gal nu rboo lyu mbecy gyish.