De rishcyit nu bzeeñ Lemueel
31
De nu nii riidz nu ricy ñi presis nu bzeeñ rey Lemueel,
de riidz nu blyuu ñaay niy.
2 Orzeꞌ nam:
Iꞌña̱,
fiñ nu bruu naña̱,
iꞌña̱ nu briic Ñgyoozh ne̱ ornu mne̱e̱ du̱m,
3 cueꞌ laazh ru fers nir nu nac biñ mñaa,
gun rnit lo rey nu nac mi zeꞌ.
4 Lemueel,
tub rey gal nu yu nu riib ic a̱ꞌ yad ñi ni dey nu goꞌy mashcaly.
5 Gun benu goꞌ dey,
orzeꞌ nit lagy yu nu gyicy yu de coz nu rnii leey nu yad ñi nu gyicy yu.
Dzi ga wabic dey gyel fushtiz ni de mbecy nu rzac zi.
6 Briic mashcaly goꞌ de mbecy nu bi zu nu gat.
Zeꞌ mbecy nu ricy sentiir briicaꞌ ñup nu goꞌy.
7 Goꞌ dey,
gun orzeꞌ nit lagy yu nu gyel zi zuy,
nunu nit lagy dey nu dzi deet rac nañ lardooy.
8 Gua faboor ni de mbecy nu wagac nii nu nac ub.
Bicy nu gad gyel fushtiz ni de mbecy nu sac cyu nu ne̱ꞌ ic ni.
9 Mneꞌ ic nu nac dey.
Briic gyel fushtiz mod nu seꞌñ.
Ru gua faboor ni mbecy zi gal nu de mbecy nu wagac locyuub ub.
Bicy nu gad gyel fushtiz ni dey.
10 Dzi biigy nu gad tub biñ mñaa lily nu chelaa tub yu gyeey.
Mi zeꞌ dzi zir sac mi gazeꞌ de gyitaꞌ nu dzi ñgyup sac.
11 Ñgyeem ricy cup yu consuel lom,
nunu rila wayicy falt la de coz ni dey.
12 Wagyicy mi nu gzac zi ñgyeem.
Ricy mi nu gusht rcyiiñ yu dub laa lat nu mbañ mi.
13 Mi zeꞌ ryub mi gyich shily,
nu iily lino,
nunu zu cyit lagy mi ricy mi riiñ nu yaam lat nu driꞌm de iily nim.
14 Nam gal nu na barc nu rsaa yuu.
Zet rza gyiim de coz nu gow mi.
15 Cow ruꞌ zu yeshtem nu rzaam coz nu gow de famil nim,
nunu par nu niim lo de moz mñaa nim nu la riñ gyicy deñ.
16 Rza güiim tub nac yu nu zim ñii.
Rnuuz mi lyucy urbyay nu de tiñ nu ricy mi gan.
17 Zu zaꞌ cuerp nim,
nunu dub gal rii la lagy mi ricy mi riiñ.
18 Nap rguꞌ cuen mi lac mod gyicy mi gan dalje̱z nim.
Nunu bi rel raas mi.
19 Nunu laab nu yaam driꞌm de iily nim.
Nunu laab mi rab mi gyeel nim.
20 Laab mi zeꞌ rbic mi de coz nu cyiiñ ni de mbecy zi nu de mbecy nu ricy falt ñi ni.
21 Nunu rila wac sug ic mi nu gazily de famil nim ornu gruꞌña tiem rag,
gun dela dey ricy cup yu negy dzaꞌ niy.
22 Rab mi nergyich nunu rzum negy nu zu blyu lo.
23 Dela mbecy nap yuꞌ lo dey ñgyeem,
gun yu zeꞌ rzub nuy deꞌ zir de fushtiz lugaar zeꞌ nu ricy dey gyel fushtiz niy.
24 Rab mi negy nu ryaa nu lino nu rut mi,
nunu rut mi bay ni de mbecy nu ricy dalge̱z.
25 Dzi fert mi,
nunu lily nam,
nunu rila wagyicy cuen mi nu nac de coz nu cyid par lo.
26 Na ornu rniim,
orzeꞌ rniim nu riidz lily.
Na ornu rniim lo mbecy nu lac mod gyicy dey,
orzeꞌ nu raso̱o̱ rniim.
27 Nap rguꞌ cuen mi dela coz nu rac nañ yuꞌm.
Rila wagom coz nu walab ub mi bicy mi gan.
28 De yu nguzh nim rnii dey nu dzi nap mi.
Zeꞌ ñgyeem ryabic yu gyel mbecy nim.
29 Orzeꞌ nay rab yum:
“Tub zi la ru bicy ru gan
par dela biñ mñaa nu nap ricy nu yuꞌ gyishlombecy”,
nay rab yu mñaay.
30 Mod dziñ nu rabee biñ mñaa,
ndeꞌ guuñ ub na.
Mas cyit nam,
tees dzach ded nim.
Zeꞌ benu rdzib lagy mi lo Ñgyoozh,
orzeꞌ mi zeꞌ yad ñi nim nu gyed gyel mbecy nim.
31 Byabic der im nu nac de coz nu bicy mi.
Lo rgüii la de mbecy byabic der gyel mbecy nim
nu nac de coz nu ricy mi.