Ñgyoozh nac mi biñ nu riib ic
149
¡Gyabic na gyel mbecy ni Ñgyoozh, Shuaan na!Dul na de riidz cub lom.
Dul na de riidz nu ryabic gyel mbecy nim
lat nu yuꞌ tublaazh de mbecy nu ricy paa nim.
2 Gucyit lagy de ru mbecy Israeel, de ru mbecy Sión,
gun Ñgyoozh psaꞌ lagy mi de ru,
nunu mi zeꞌ nac mi rey ni der.
3 Biily gyiꞌ der lom ornu ryabic ru gyel mbecy nim.
Bicy der di lom nu beeñ arpa, nu gyid panderet.
4 Ñgyoozh, yet lagy mi de mbecy shni nim,
gun ricy mi nu gyed gyel mbecy ni dey
ornu ricy yu gan de losaꞌ yuuy.
5 Rlagy ñi nu gyet lagy dey nu nac nu bicy yu gan,
nunu rlagy ñi nu dub laa rel gul dey lat nu mbish yu lo daꞌ niy
nu nac nu dzi yet lagy yu.
6 Rlagy ñi nu ye la cush ti dey
lat nu ryabic yu gyel mbecy ni Ñgyoozh,
nunu lat nu rguꞌ yaa dey mandzicy niy, mandzicy nu riꞌñ rup chu laꞌ laa ruꞌ,
7 gun orzeꞌ gyicy gal ga dey de coz nu bicy de mbecy nu walab losaꞌy,
nunu cuic dey cashtig ni de yu zeꞌ.
8 Orzeꞌ de rey, nu de yu lily ni de mbecy zeꞌ,
cacuuñ dey yu nu tub caden ye nu byaa nu gyiib.
9 Orzeꞌ cuic dey cashtig ni de mbecy nu walab losaꞌy,
dub gal na mod nu mnii Ñgyoozh.
Ndeꞌ de gyel lily ni de mbecy nu ricy paa ni Ñgyoozh.
¡Gyabic na gyel mbecy ni Ñgyoozh!