Dela coz nu psaꞌ lagy Ñgyoozh ryabic ñi gyel mbecy nim
148
¡Gyabic den gyel mbecy ni Ñgyoozh!De ru mbecy nu yuꞌ gyibaa, ¡byabic der gyel mbecy nim!
De ru mbecy nu yuꞌ zeꞌ nu gya, ¡byabic der gyel mbecy nim!
2 De ru anc nim, ¡byabic der gyel mbecy nim!
De ru anc zigy nu nac soldad nim, ¡byabic der gyel mbecy nim!
3 Ru doo güidz nu beey, bicy nu gabe nu dzi lily na Ñgyoozh.
De ru bel nu rbic yaa baa, bicy nu gabe nu dzi lily nam.
4 Zeꞌ nu gya zir ni baa, bicy nu gabe nu dzi lily nam.
Ru nis nu yuꞌ par ich baa, bicy nu gabe nu dzi lily nam.
5 Dela de coz zeꞌ rlagy ñi nu gyicy ñi nu gabe nu dzi lily na Ñgyoozh,
gun ornu mniim, orzeꞌ psaꞌ lagy mi dela coz zeꞌ.
6 Ornu bicy mi mandaar, orzeꞌ bzum delañ seꞌñ par tub la.
Ornu mniim la coz gac, orzeꞌ de riidz nu mniim wac dudily ñi.
7 De ru mbecy nu yuꞌ gyishlombecy, gal nu de ru bañcyug
byabic der gyel mbecy ni Ñgyoozh.
De ru bañcyug nu yuꞌ lo nisyudoo, nu ru zeꞌ nu gyi zir ni nisyudoo
byabic gyel mbecy nim.
8 Guzii, gyey gye, gyey shely ni gup, za baa, gal nu bi ily,
delañ ricy yac ñi de mandaar nim.
9 De too bicy, de logyiꞌ, de yag nu rbic uugy, de yag nu nash ngush,
delañ ricy ñi nu gabe nu dzi lily nam.
10 De bañcyug mni, de bañgyish, de lo la nez low, nu de lo la chigyiñ,
dela de ma zeꞌ rlagy ñi nu gyabic de ma gyel mbecy nim.
11 De ru rey gyishlombecy,
gal nu de lo la mbecy,
de ru fushtiz, gal nu de ru mbecy nu riib ic,
dela de ru byabic der gyel mbecy ni Ñgyoozh.
12 De ru yu feñ, nu de ru fiñ feñ,
de ru mbecy gush,
nu de ru mbecy nu tiem ni
byabic der gyel mbecy nim.
13 Dela de yu zeꞌ gyabic dey gyel mbecy ni Ñgyoozh,
gun gya zir zum par dela mbecy,
nunu lily zir nam par deꞌ zir mbecy nu yuꞌ gyishlombecy nu gyibaa.
14 Bicy fert mi de mbecy nim, de nez Israeel,
gun orzeꞌ de mbecy nim, de mbecy nu dzi rcam,
gyabic dey gyel mbecy nim.
¡Gyabic na gyel mbecy ni Ñgyoozh!