Ñgyoozh zily nac mi nunu tonaꞌ la fert mi
147
¡Gyabic den gyel mbecy ni Ñgyoozh, Shuaan den!Nap tonaꞌ la nu dul na de riidz nu ryabic gyel mbecy nim gun dzi nap mi.
Ndeꞌ nu yad ñi nu gyabic na gyel mbecy nim.
2 Ñgyoozh ricy nap mi Jerusaleeng tuubaꞌ tir.
Gyicy mi nu cush cya de mbecy nu gua pres tuubaꞌ lugaar.
3 Rbic mi consuel ni de mbecy nu rshiꞌñ baloor,
nunu ricy yac mi de zeꞌ nu rac ni dey.
4 Mniim la be la bel baa,
nunu briic mi nu la tub ga la ma.
5 Tonaꞌ la zily nac Ñgyoozh, Shuaan na,
nunu tonaꞌ la fert mi.
Par nu tonaꞌ la sheñ shcab ricy cup mi,
wac la niin lac gaal tant ñi ricy cup mi.
6 Nunu rlaagy nañ mi de mbecy shni.
Zeꞌ de mbecy a̱ꞌ nap rgyich mi dey lo yu.
7 Biily der lo Ñgyoozh nu nac nu rlagy ru cuic ru gras nim.
Bicy der di lom nu beeñ arpa.
8 Ricy mi nu rzu cow baa nu za.
Rshet mi gyey lo yu.
Nunu ricy mi nu raly de gyish de logyiꞌ.
9 Rbic mi coz nu gow de bañcyug,
nunu rgoow mi de byac nu saa la guch ornu rbishti ma.
10 De cuay par gyel yuu, walab nu dzi yet lagy mi fers ni ma.
Ni walab nu dzi yet lagy mi de soldad fert.
11 Dzi yet lagy mi de mbecy nu rdzib lagy lom.
Yet lagy mi de mbecy nu rgyish lo lom
nu nac nu zaab rca lam dey.
12 De ru mbecy Jerusaleeng, byabic der gyel mbecy ni Ñgyoozh, Shuaan den.
Byabic der gyel mbecy ni Ñgyoozh nir.
13 Mi zeꞌ wazaan mi nu chuꞌ de losaꞌ yuur gyedz,
nunu nap gyicy num de losaꞌr nu yuꞌ lat gyedz.
14 Gyicy mi nu chuꞌ gyel ri zu ruꞌ bzaa ni der,
nunu gyicy mi nu mbat la ri trig lo yu nir.
15 Ricy mi mandaar la ziꞌl coz gyishlombecy,
nunu dzach tonaꞌ la zaab za de riidz nim.
16 Rshet mi gyey gye shely nu dzi rag.
Gal na iily bi ded nañ yac ñi lo yu.
Orzeꞌ rtush las mi gup.
Orzeꞌ rabeeñ gal nu rabee diꞌñ.
17 Shet mi gyey gye cyigy.
Gyet ñi lo yu gal nu yet gyitaꞌ bedz.
Orzeꞌ ¿cyu gagye nu rag nu rzeed mi?
18 Ornu ricy mi mandaar, orzeꞌ de gyey zeꞌ gyanis ñi.
Na ornu zeed mi bi, orzeꞌ grily de nis zeꞌ.
19 Briic mi de riidz nim, de leey nim,
de riidz nu rlagy ñi nu gyicy yac de mbecy,
briic mi de ndeꞌ ni de mbecy nu nac nim,
de nez Jacob, nu de mbecy Israeel.
20 Walab nu ni mod bicy num de mbecy ni reñaꞌ lugaar.
De yu zeꞌ wangad lagy la dey de riidz nu rniim nu rlagy ñi nu gyicy mbecy.
¡Gyabic na gyel mbecy ni Ñgyoozh, Shuaan den!