Gyabic na gyel mbecy ni Ñgyoozh
146
¡Gyabic na gyel mbecy ni Ñgyoozh!
Gyabica̱ gyel mbecy nim nu dutuub la lardo̱o̱.
2 Gyabica̱ gyel mbecy nim lat nu gabee zu̱.
Dula̱ de riidz nu ryabic de gyel mbecy nim
lat nu gabee mbaña̱.
3 Cueꞌ cyish lor lo mbecy lily.
De yu zeꞌ gur mbecy la nac yu.
Wac co mbañ yu ru.
4 Ornu gat dey,
orzeꞌ gyayuy tuubaꞌ tir.
Dzi zeꞌ nit lo dela coz nu rboo ic dey nu gyicy yu.
5 Dzi ni mbecy benu Ñgyoozh,
biñ nu briib zily gyitoo Jacob,
locyuub mi yu.
Dzi ni yu nu rgyish lo lo Ñgyoozh biñ nu nac Shuaan yu.
6 Mi zeꞌ psaꞌ lagy mi gyibaa,
nu gyishlombecy ii,
gal nu nisyudoo,
nunu psaꞌ lagy mi dela mbecy,
nu de lo la bañcyug nu yuꞌ dela lugaar.
Dub laa tiem ricy paam nu de riidz nu rniim nu waded la gyicy mi.
7 Rbic mi gyel fushtiz ni de mbecy nu rzac zi nu nac tuubaꞌ mbecy,
nunu rbic mi de coz nu gow de mbecy ran.
Ricy mi nu gla de yu nu yuꞌ pres.
8 Ricy mi nu rzac de mbecy lo caꞌ.
Rshes sum de mbecy nu yes saa.
Rcam de mbecy nap.
9 Rñam de mbecy yad,
nunu rlaagy nañ mi de yu ngush zi,
nu de biñ mñaa byud.
Zeꞌ de mbecy a̱ꞌ nap ricy mi nu nit lo dey.
10 Ñgyoozh,
biñ nu nac Shuaan de mbecy Sión,
mi zeꞌ gyub ic mi par tub la.
Gyub ic mi dela tiem nu yad par lo.
¡Gyabic den gyel mbecy ni Ñgyoozh!