Dela mbecy gyabic dey gyel mbecy ni Ñgyoozh: tub riidz ni Dabi
145
Ya̱ griib zilya̱ ru, Ñgyoozh, biñ nu nac rey ne̱.Gyabica̱ gyel mbecy nir par tub la.
2 De dzi la ya̱ ryabica̱ gyel mbecy nir,
nunu rne̱e̱ lo de mbecy nu ru dzi zily nac ru par tub la.
3 Tonaꞌ la zily nac ru, Ñgyoozh, Shuaan de̱,
nunu tonaꞌ la ricy ñi presis nu gyabic de̱ gyel mbecy nir.
Wagagyee shcab ne̱ nu gyet laga̱ cuen nu tonaꞌ la zily nac ru.
4 De mbecy nu yuꞌ la ziꞌl tiem zat dey de coz ily nu bicy ru
lo de mbecy nu gruu zac despuees ni de yu zeꞌ.
De yu zeꞌ nii dey lo de iꞌñ yu, nu tonaꞌ la coz ily bicy ru.
5 Ya̱ zaab rnii to̱o̱ nu nac de coz ily nu ricy ru.
Orzeꞌ de mbecy nii dey nu tonaꞌ la cyit na gyel lily nir.
6 De mbecy goy riidz nu nac de coz ily nu bicy ru.
Orzeꞌ ya̱ ne̱e̱ nu dzi zily nac ru.
7 Nii dey nu dzi nap ru,
nunu gul dey de riidz nu rniiñ nu ru ricy ru de coz nu seꞌñ.
8 Ñgyoozh, Shuaan na, mi zeꞌ tonaꞌ la nap ricy num de mbecy,
nunu rashni lagy mi dey.
Walab nu dzach chaꞌ ic mi,
nunu bded ruꞌ gaꞌ la nu rcam yu.
9 Nap ricy num dela mbecy,
nunu rashni lagy mi dela coz nu psaꞌ lagy mi.
10 Ñgyoozh, Shuaan de̱, dela mbecy gyabic dey gyel mbecy nir,
nunu niꞌ ziꞌl de bañcyug.
Orzeꞌ dela mbecy nir nii dey nu dzi zily nac ru.
11 Nii dey nu tonaꞌ la cyit na mod nu riib ic ru,
nunu nii dey nu dzi fert ru,
12 gun orzeꞌ dela mbecy gad lagy yu dela coz ily nu bicy ru,
nunu gad lagy dey nu tonaꞌ la cyit na mod nu riib ic ru.
13 Ru gyub ic ru par tub la,
nunu nac ru rey ni de mbecy par dela tiem nu yad par lo.
Ñgyoozh ricy paam nu de riidz nu rniim,
nunu lat dela coz nu ricy mi nap ricy mi.
14 Rlocyuub mi de mbecy nu rzac deet,
nunu rbic mi fers ni de mbecy nu rlazh baloor ni.
15 Lo Ñgyoozh rgyish lo dela mbecy, nu dela bañcyug,
gun rbic mi de coz nu gow dey, nu coz row de bañcyug ornu galagy ñi.
16 Ñgyoozh, ru rbic ru coz nu gow dey gal ryel la niy.
Niꞌ ziꞌl de bañcyug.
17 Lat dela coz nu ricy Ñgyoozh, ricy mi coz nu seꞌñ,
nunu lat dela coz nu ricy num de mbecy
lat nu ricy mi de coz zeꞌ rashni lagy mi dey.
18 De mbecy nu dutuub la lardoo rnishbaa lom.
Gaab zum lo de yu zeꞌ.
19 De mbecy nu rdzib lagy lom, rbic mi de coz nu cyiiñ ni dey.
Rzuub gyidag mi ornu rbedz dey mi, nunu rboo mbañ mi dey.
20 Rzaab ic mi de mbecy nu rcam.
Zeꞌ de mbecy a̱ꞌ nap, nit lom dey.
21 Dub laa tiem ryabica̱ gyel mbecy ni Ñgyoozh.
¡Dela mbecy rlagy ñi nu gyabic dey gyel mbecy nim par tub la!