Tub rey rbic yu gras ni Ñgyoozh: tub riidz ni Dabi
144
Gyabic na gyel mbecy ni Ñgyoozh, biñ nu na gal nu na gyitaꞌ,zeꞌ nu rza̱ cach lo̱ lo de losaꞌ yu̱u̱.
Mi zeꞌ rlyuum ne̱ lac mod chuco̱o̱,
nunu rzu lily mi ya̱ par gyel yuu.
2 Nam gal nu na tub gyitaꞌ, tub lugaar zeꞌ nu cach lo̱ lo de losaꞌ yu̱u̱.
Nam gal nu na tub yuꞌ fert, zeꞌ nu se la la zaca̱.
Nam gal nu na tub yala she nu soow ñi cuerp ne̱,
gun orzeꞌ se la la coz gyicy nu de mbecy ya̱.
Lo mi zeꞌ cha̱ nu laa lagya̱.
Orzeꞌ gyicy mi nu gyub ica̱ de reñaꞌ nac mbecy.
3 Ñgyoozh, Shuaana̱, ¿cyu guc de mbecy par nu gash ru shcab nu nac dey?
Gur mbecy la nac yu par nu gyicy cuen ru dey.
4 De yu zeꞌ nay gal nu na tub bi miꞌ nu sij ziꞌl rded.
Na dey gal nu na tub gaꞌl nu nez rded ziꞌl ñi.
5 Ñgyoozh, Shuaan de̱, pshaal roꞌ ni baa.
Orzeꞌ gyet ru nu gal yaar de too bicy, gun orzeꞌ grib dzeeñ.
6 Bicy nu gzu gyi ni guzii.
Orzeꞌ grush las de losaꞌ yuur.
Bzeed ñi gal nu rzeed mbecy gyech ni guaz,
gun orzeꞌ gash dey carer.
7 Nese gal gyibaa bzaab yaar.
Orzeꞌ co mbañ ru ya̱ lo de nis sheñ.
Nunu bloo nap ya̱ yaa de mbecy yad.
8 De yu zeꞌ driib riidz rguu ruꞌy.
Mas rnii dey nu rishli, nunu rzat dey ru, tees rguuy.
9 Ñgyoozh, ya̱ dula̱ tub riidz cub lor.
Sheta̱ lo beeñ arpa ornu dula̱.
10 Ru locyuub ru de rey nu gyicy dey gan gyel yuu,
nunu bloo mbañ ru Dabi, yu nu bicy riiñ nir.
11 De mbecy gurfeñ nu nac losaꞌ yu̱u̱,
bloo mbañ ya̱ yaay, gal nu yaa de mbecy yad.
De yu zeꞌ driib riidz rguu ruꞌy.
Mas rnii dey nu rishli
ornu rzat dey ru, tees rguuy.
12 Dzi ga nap benu galy de yu nguzh ni den,
gal nu raly de ya mni nu nash lat naa.
Dzi ga nap benu de fiñ nguzh ni den gyac deñ
gal nu na ya bi cyit na nu zu lagy nañ yuꞌ yon ni Ñgyoozh.
13 Dzi ga nap benu dzaa nicy la nañ de ye ni den gal ruꞌ lañ nu de lo la cosech.
Dzi ga nap benu be miily la shily ni den gal ma ngush.
Mas gal tii miily ma ni den gyac ma.
14 Dzi ga nap benu de chigud ni den gaal de ma zañ beser,
benu wat ni tub ma anzir nu gal ma.
Dzi ga nap benu wabishti mbecy nu zac deet yu lat cay ledz na.
15 ¡Dzi ni tub nac mbecy benu ni mod gzac yu!
¡Dzi ni tub nac mbecy benu Ñgyoozh nac mi Shuaan yu!