Tub mbecy rnii nuy Ñgyoozh nu locyuub mi yu: tub riidz ni Dabi
143
Ñgyoozh, Shuaan de̱, bzuub gyidag ornu rne̱e̱ du̱ ru.Bicy gal nu rne̱e̱, gun ru nac ru biñ nu ricy coz nu seꞌñ,
nunu nac ru biñ nu ricy paa.
2 Cueꞌ gri beer ne̱,
gun dela mbecy yuꞌ falt niy par lo ru.
3 De losaꞌ yu̱u̱ zaab dey icha̱.
Byadat la̱ lo yu rze̱e̱.
Bicy dey nu zu̱ zeꞌ nu cow
gal nu rzac de mbecy nu gut gulas.
4 Ndeꞌ nu blazh la baloor ne̱.
Tonaꞌ la deet rac nañ lardo̱o̱.
5 Ya̱ ca ica̱ de coz nu bi guc.
Drusha̱ shcab nu nac de coz nu bi bicy ru.
Nunu ryezaꞌ lagya̱ de coz nu bzaar.
6 Orzeꞌ rshes nañ ya̱a̱ lat nu rne̱e̱ du̱ ru.
Ric la añ ne̱ lor gal nu rzac yu wach nu rlagy ñi nis.
7 Ñgyoozh, Shuaan de̱, bicy lal nu gyicy ru gal nu mne̱e̱,
gun blazh la baloor ne̱.
Cueꞌ cach lor lo̱,
gun cueꞌ nu zaca̱ gal nu rzac de mbecy nu rza zeꞌ nu yuꞌ de mbecy gut.
8 De dzi la, or napor, bicy nu gyezaꞌ lagya̱ nu ru zaab rca lar ya̱,
gun ya̱ ricy cupa̱ consuel lo ru.
Blyuu nez ne̱, nez nu rlagy ñi nu cha̱, gun ya̱ rne̱e̱ du̱ ru.
9 Ñgyoozh, bloo nap ya̱ yaa de losaꞌ yu̱u̱,
gun lo ru yapa̱ nu laa lagya̱.
10 Blyuu ne̱ nu gyicya̱ gal nu rlagy ru,
gun ru nac ru Ñgyoozh ne̱.
“O” mnii nu Espiriit nir cha num ya̱ nez nap.
11 Ñgyoozh, bicy nu cui mbaña̱, gun ya̱ naca̱ mbecy nir.
Bloo nap ya̱ lat de coz deet,
gun ru nac ru biñ nu ricy de coz nu seꞌñ.
12 Biit de losaꞌ yu̱u̱, gun nac ru biñ nu zaab rca la ya̱.
Mnit lo dela losaꞌ yu̱u̱, gun ya̱ tub mbecy nu ricy riiñ nir.