Ñgyoozh nac mi biñ nu chan lo par nu laa lagy na: Tub riidz ni Dabi lat nu pcach loy nañ tub blyuu
142
Ye la drishti̱ nu dredza̱ Ñgyoozh nu cyid yub mi ya̱.
Ye la drishti̱ nu rnishba̱a̱ lom nu gashni lagy mi ya̱.
2 Lo mi zeꞌ rdo̱o̱ riidz ni dela gyel chaꞌ ic nu ricy cupa̱.
Rdo̱o̱ rishlom ni dela coz deet nu rzaca̱.
3 Ornu rlazh la consuel ne̱,
orzeꞌ mi zeꞌ rad lagy mi la coz gyicya̱.
De losaꞌ yu̱u̱ bzu dey caa zeꞌ nu ngach ni nez nu cha̱.
4 Ornu bgüi̱i̱ par yaa be̱e̱,
bzaaca̱ nu sac la mbecy nu cyid yu nu locyuub yu ya̱.
Sac la mbecy nu zaab ic ya̱.
Sac la mbecy nu cuꞌ cuen ga ya̱.
5 Orzeꞌ dredza̱ ru,
Shuaan de̱,
nu cyid ru nu locyuub ru ya̱.
Orzeꞌ ya̱ rne̱e̱:
“Ru gac ru tub lugaar nu cha̱ laa lagya̱.
Sacaꞌ zir coz nu ricy cupa̱ lat nu rdeda̱ gyishlombecy ii,
nomaas ru ziꞌl ricy cupa̱.”
6 Bzuub gyidag ornu dredza̱ ru,
gun tonaꞌ la rshiꞌña̱ baloor.
Bloo mbañ ya̱ yaa de mbecy nu zaab icha̱.
Wagye̱e̱ lo dey,
gun fert zir yu gazeꞌ ya̱.
7 Ñgyoozh,
bloo nap ya̱ lat de coz deet nu rzaca̱,
gun orzeꞌ gyabica̱ gyel mbecy nir.
Orzeꞌ de mbecy nap ri loꞌ la dey ya̱ gyiꞌ nu nap ricy nur ya̱.