Mbecy rniiy nu zaab ic Ñgyoozh yu: tub riidz ni Dabi
141
Ya̱ rnishba̱a̱ lo ru, Ñgyoozh.¡Da gun güiir ya̱!
¡Bzuub gyidag ornu rne̱e̱ du̱ ru!
2 “O” mnii nu zuub gyidag ru ni de riidz nu rne̱e̱,
gal nu ricy ru nu yaal zguul nu rzaay mbecy lor.
“O” mnii nu shes nañ ya̱a̱ lor ornu rne̱e̱ du̱ ru,
gal nu “O” rniir ornu rbic de mbecy gun lor or gudze.
3 Ñgyoozh, bloo su tub mbecy nu ña ru̱ꞌ,
tub yu nu washet ic nu ne̱e̱ de riidz wacyiiñ.
4 Cueꞌ zaan ru nu lardo̱o̱ cush cyañ güiiñ lo de coz a̱ꞌ nap,
nunu cueꞌ zaan ru nu gac du̱ de mbecy a̱ꞌ nap
lat nu rded yu ricy yu de coz shiñ na.
Ni cueꞌ zaan ru nu cha̱ saꞌ ni dey.
5 Nap tonaꞌ la benu tub mbecy nap shuu nuy ya̱,
o nu cuic yu cashtig ne̱ tub mod nu beñ ziꞌl.
Nañ gal na asecy nu rgo to̱o̱.
Orzeꞌ ya̱ wane̱e̱ ti cueꞌ ni gyicy yu.
Mas zac zi̱, tees zaab rne̱e̱ du̱ la̱ ru.
6 Zeꞌ de yu nu riib ic lat de mbecy a̱ꞌ nap zuub yaa mbecy dey ruꞌ yuu ily.
Orzeꞌ gyet lag dey lo gyitaꞌ.
Orzeꞌ gad lagy de mbecy nu rishli de riidz nu mne̱e̱.
7 Grush las rit dey ruꞌ gyerbaa niy
gal nu drush las yu bdulaꞌ.
8 Ñgyoozh, Shuaan de̱, ya̱ drishlo̱ lo ru.
Lo ru ricy cupa̱ consuel nu se la la gzaca̱.
Orzeꞌ cueꞌ zaan ru ya̱.
9 Cueꞌ zaan ru nu gyet laga̱ nañ caa nu bzu dey nez nu cha̱.
Cueꞌ zaan ru nu gyet laga̱ nañ caa ni de mbecy a̱ꞌ nap zeꞌ.
10 Laab ga de mbecy a̱ꞌ nap zeꞌ gyet lag yu nañ caa nu bzuy.
Lat zeꞌ ya̱ ded lo̱ nu cha̱ par lo.