Dabi rgyiiñ yu lo Ñgyoozh nu zaab ic mi yu
140
Ñgyoozh, Shuaan de̱, bloo nap ya̱ yaa de mbecy a̱ꞌ nap.Cueꞌ zaan ru nu de mbecy nu shet zi losaꞌ shiñ gyicy nu ya̱.
2 Dub laa tiem rboo ic dey lac mod gyicy yu de coz a̱ꞌ nap,
nunu zaab rguꞌ la dey lagy losaꞌy.
3 Lyudz dey nañ gal nu na bily dañ.
De riidz nu rnii dey nañ gal nu na benen ni bily daab.
4 Mña ya̱, Ñgyoozh,
gun cueꞌ nu shet yaa de mbecy a̱ꞌ nap ya̱.
Zaab ic ru ya̱,
gun orzeꞌ de mbecy nu rshet zi losaꞌ
nu de mbecy nu rboo ic nu lac mod shes saay ya̱,
orzeꞌ de yu zeꞌ se la la gyicy nuy ya̱.
5 De mbecy leꞌ bzu dey caa nu gyet laga̱.
Bzaab dey duu cacy nez ne̱ par nu gyes sa̱a̱.
Bzu dey caa nez nu rdeda̱, par nu cub dey ya̱.
6 Ya̱ rne̱e̱ lo Ñgyoozh: “Ru Ñgyoozh ne̱.”
Bzuub gyidag ornu zaab ti̱ꞌ nu rne̱e̱ du̱ ru nu locyuub ru ya̱.
7 Ñgyoozh, Shuaan de̱, biñ nu dzi fert, bloo mbañ ya̱.
Cueꞌ zaan ru nu la coz zaca̱ lat gyel yuu.
8 Ñgyoozh, cueꞌ cuic ru de coz nu rlagy de mbecy a̱ꞌ nap.
De coz a̱ꞌ nap nu rboo ic dey nu gyicy yu,
cueꞌ zaan ru nu gruu nap ñi ni dey.
9 Cueꞌ zaan ru nu de losaꞌ yu̱u̱ gyicy dey gan ya̱,
sinu bicy nu de ub yu gal yu duu, duu nu ricy pee dey nu gal ya̱.
10 Rlagy ñi nu go boo rely too dey.
Rlagy ñi nu shet lag mbecy dey gyerye, tub lugaar nu rila wacaꞌ gruuy.
11 De mbecy nu driib gyidza too losaꞌ, cueꞌ gruu nap de coz nu ricy yu.
De mbecy gurfeñ, rlagy ñi nu gzab de coz a̱ꞌ nap ich yu.
Orzeꞌ nit loñ dey.
12 Ñgyoozh, Shuaan de̱, de̱ ya̱ rad lagya̱ nu ru rzar faboor ni de mbecy zi,
nunu ricy ru nu rad gyel fushtiz ni de mbecy nu sac la coz ni.
13 Orzeꞌ de mbecy nap gyabic dey gyel mbecy nir.
De mbecy nu ricy de coz nu seꞌñ, de yu zeꞌ cyiiñ yu zeꞌ nu ru zur.