Ñgyoozh rad lagy mi dela coz: tub riidz ni Dabi
139
Ñgyoozh, Shuaan de̱, ru nap bduꞌ cuen ru mod nu na̱,nunu nap yuꞌ lor ya̱.
2 Rad lagy ru dela coz nu ricya̱.
Mas zet zur,
tees rad lagy ru dela coz nu rnii to̱o̱.
3 Rad lagy ru dela mod nu rdeda̱ nu dela zeꞌ nu rzu lagya̱.
Yuꞌ lor dela nez nu rdeda̱.
4 Anzir nu grib riidz ru̱ꞌ,
bi rad lagy ru dela riidz zeꞌ.
5 Ru zur dub yub la lo̱, nunu nan ru ya̱.
6 Gyiꞌ nu tonaꞌ la coz ily rad lagy ru la mbecy na ya̱,
zeꞌ ya̱ rila wagyet laga̱ cuen la na shcab ni ru.
7 ¿Ca par rusha̱ nu gruu chu̱ lo Espiriit nir?
¿Lac mod gruu chu̱ lor nu cha̱ zet?
8 Benu chupa̱ gal gyibaa, zeꞌ zur.
Benu gyeta̱ zeꞌ nu yuꞌ de mbecy gut nu gabisha̱ nu dasa̱, zeꞌ zur.
9 Benu gyes naña̱ lo bi nu cha̱ gal zeꞌ nu driib doo güidz,
o benu cha̱ nu cyiiña̱ gal zeꞌ nu guca ruꞌ nisyudoo par zeꞌ nu rza doo güidz,
10 zeꞌ zur nu lyuur nez ne̱, nunu locyuub ru ya̱.
11 Benu nii to̱o̱ nu cach lo̱ zeꞌ nu cow,
o benu nii to̱o̱ nu gyet cow de yaa nu ca dub yub la lo̱,
12 nu cow zeꞌ, ndeꞌ walab nu cow par ru.
Par ru yuꞌ yaa la zu mas rel, gal nu yuꞌ yaa or widoo.
Nu cow, o nu yuꞌ yaa, tub ziꞌl nañ par ru.
13 Laab ru psaꞌ lagy ru dela lugaar ni cuerp ne̱,
nunu bzu nap ruñ lat nu ri̱ nañ ñaꞌ ne̱.
14 Ndeꞌ nu ya̱ gyabica̱ gyel mbecy nir,
gun tonaꞌ la za du̱ ica̱ nu dzi biigy de mod nu psaꞌ lagy ru cuerp ne̱.
Tonaꞌ la coz ily nac de coz nu ricy ru.
Ya̱ nap rad lagya̱ de ndeꞌ.
15 Ñgyoozh, nap gud lagy ru, ornu byaa cuerp ne̱,
lat nu ngach byaañ,
ornu briib ñi nañ cuerp ni ñaꞌ ne̱.
16 Ru bzaac ru ya̱ anzir nu gya cuerp ne̱.
Lo gyicy nir bi ca dela dzi nu cyiiña̱ gyishlombecy ii
mas anzir nu shuub tiem zeꞌ.
17 ¡Ayj, dzi ga biigy shcab nir, Ñgyoozh!
¡Nunu tonaꞌ la zañ shcab ricy cup ru!
18 Benu galagya̱ nu laba̱ñ,
orzeꞌ shuub ñi tub numbr ily zir gazeꞌ de yu uzh.
Nunu mas lazh laba̱ñ,
tees rila wayet lagya̱ cuen mod nu na ru, Ñgyoozh.
19 Ñgyoozh, dzi ga nap benu cut ru de mbecy a̱ꞌ nap.
Dzi ga nap benu de mbecy nu rut losaꞌ gruu dey lo̱.
20 De yu zeꞌ rnii dey de coz fals nu nac ru.
Tees leew la rza dey contr nir.
21 Ñgyoozh, Shuaan de̱, ya̱ rzi lagya̱ lo de mbecy nu rzi lagy lor.
Nunu riñ lagya̱ de mbecy nu rza contr nir.
22 Rzi lagya̱ lo dey nu dutuub la lardo̱o̱.
Ricya̱ dey nu nac yu losaꞌ yu̱u̱.
23 Nap bduꞌ cuen la mbecy na̱, Ñgyoozh.
Orzeꞌ gad lagy ru la na nañ lardo̱o̱.
Bicy preb ya̱.
Orzeꞌ gad lagy ru la coz rnii to̱o̱.
24 Güii ben a yuꞌ coz a̱ꞌ nap nañ lardo̱o̱.
Orzeꞌ lyuur nez nir lo̱, nez nu riib par tub la.