Mbecy rbic yu gras ni Ñgyoozh: tub riidz ni Dabi
138
Ñgyoozh, Shuaan de̱, drica̱ gras nir nu dutuub la lardo̱o̱.Orzeꞌ dula̱ lor zeꞌ nu yuꞌ de anc gyibaa.
2 Rgüi̱i̱ par zeꞌ nu zub yuꞌ yon nir.
Orzeꞌ rabish tiilya̱ lo yu.
Orzeꞌ ryabica̱ gyel mbecy nir,
gun ru zaab rca lar de mbecy,
nunu zaab ricy paa lar nu dey,
gun laab ub lar bicy ru nu lily zir nar par deꞌ zir de mbecy,
nunu bicy ru nu de riidz nu mniir, ndeꞌ riidz nu ricy zir ñi presis.
3 Tiem nu mne̱e̱ du̱ ru, orzeꞌ ru bicy ru gal nu mne̱e̱.
Bicy fert ru ya̱.
4 De rey nu yuꞌ gyishlombecy gyabic dey gyel mbecy ni ru, Ñgyoozh,
gun güeñ dey de riidz nu mniir nu waded la gyicy ru.
5 Orzeꞌ gul dey de riidz nu rniiñ de coz nu bicy ru,
gun tonaꞌ la coz ily de gyel lily nir.
6 Gun mas tonaꞌ la gya lugaar nu zur,
tees rgüiir de mbecy shni.
Mas gal zet rad lagy ru coz nu ricy mbecy leꞌ.
7 Ornu zu̱ lo rishdzidz, orzeꞌ ru wacsaan ru nu gata̱.
Ricy ru nu gabe fers nir,
nunu co nap ru ya̱ lat de coz a̱ꞌ nap nu ricy de losaꞌ yu̱u̱, de yu nu rzi lagy lo̱.
8 Dela coz nu rlocyuub ru ya̱, ru rzaꞌ lo nap ruñ.
Ñgyoozh, zaab rca lar de mbecy par tub la.
Orzeꞌ cueꞌ zeeñ nat ru de riiñ nu bzuub ru gyiꞌ.