De riidz nu mnii mbecy Israeel ornu bri dey pres ruꞌ gyoow Babilonia
137
Bzub den ruꞌ gyoow Babilonia.Zeꞌ bdun den ornu byezaꞌ lagy na gyedz Sión.
2 Bzaab gyi̱ den beeñ arpa nin yaa de ya gyis, de nu nash gaab ga.
3 De mbecy nu gua nu de ub na pres pcaa dey de ub na nu dul ruꞌn.
De yu nu pted zi de ub na mnii dey nu dub gusht la gyicy den tub saꞌ ni gyel zu nap lagy.
Orzeꞌ na dey: “Biily ruꞌ der tub di ni Sión”, na dey.
4 ¿Walab gaal gac dul den cant ni Ñgyoozh tub lugaar nu walab ledz na?
5 Se benu ya̱ nit lagya̱ ru gyedz Jerusaleeng,
orzeꞌ nap zir nu gash beñ yaa be̱e̱.
6 Se benu wacaa ica̱ gyedz Jerusaleeng,
se benu wanii to̱o̱ nu gyedz Jerusaleeng nu ndeꞌ coz cyit zir na,
orzeꞌ nap zir nu checa nicy lyudza̱ nañ mba̱.
7 Ñgyoozh, bicy nu gyezaꞌ lagy ru de coz nu bicy de mbecy Edom
dzi nu de soldad niy bicy yu gan de mbecy gyedz Jerusaleeng.
Orzeꞌ na dey: “Mnit lo den gyedz Jerusaleeng gal zeꞌ nu zu laa gyiꞌñ lo yu”, na dey.
8 Zeꞌ gyedz Babilonia nit loñ.
¡Dzi ni de mbecy,
benu cyish yu ni de ru mbecy Babilonia
nu nac de coz nu ricy nur de̱ ya̱!
9 ¡Dzi ni de mbecy nu cuꞌ yaa de mdoo ni der
par nu cyich yuy lo gyitaꞌ!