Ñgyoozh zaab rca lam de mbecy nim par tub la
136
Briic der gras ni Ñgyoozh, gun dzi nap mi,gun zaab rca lam de mbecy nim par tub la.
2 Briic der gras ni Ñgyoozh,
biñ nu zily zir nac gazeꞌ deꞌ zir ñgyoozh,
gun zaab rca lam de mbecy nim par tub la.
3 Briic der gras ni Ñgyoozh,
biñ nu fert zir par de mbecy nu nac patro̱o̱,
gun zaab rca lam de mbecy nim par tub la.
4 Tub zi la mi zeꞌ ricy mi de nusuriidz ily,
gun zaab rca lam de mbecy nim par tub la.
5 Nu shcab lily nim psaꞌ lagy mi gyibaa,
gun zaab rca lam de mbecy nim par tub la.
6 Bicy mi nu guti yu zeꞌ nu yuꞌ nis,
gun zaab rca lam de mbecy nim par tub la.
7 Psaꞌ lagy mi doo güidz, nu beey,
gun zaab rca lam de mbecy nim par tub la.
8 Or widoo, orzeꞌ rbic doo güidz yaa,
gun zaab rca lam de mbecy nim par tub la.
9 Or rel, orzeꞌ beey nu de bel baa rbic de ma yaa,
gun zaab rca lam de mbecy nim par tub la.
10 Bicy mi nu gut de mdoo loga ni de mbecy Egipto,
gun zaab rca lam de mbecy nim par tub la.
11 Bloom de mbecy Israeel Egipto yeed num dey,
gun zaab rca lam de mbecy nim par tub la.
12 Rabee nu dzi fert mi ornu bicy mi de nu ndeꞌ,
gun zaab rca lam de mbecy nim par tub la.
13 Bicy mi nu byac cyup laꞌ Nisyudoo Ña,
gun zaab rca lam de mbecy nim par tub la.
14 Orzeꞌ bicy mi nu bded nap de mbecy Israeel lo yu wach,
gun zaab rca lam de mbecy nim par tub la.
15 Zeꞌ Faraoong yu nu byub ic Egipto, nu dela soldad niy,
bicy mi gan dey lo nis ni Nisyudoo Ña,
gun zaab rca lam de mbecy nim par tub la.
16 Orzeꞌ yeed num de mbecy nim
bded num dey tub lugaar ub zi,
gun zaab rca lam de mbecy nim par tub la.
17 Bicy mi nu gut de rey fert,
gun zaab rca lam de mbecy nim par tub la.
18 Bicy mi nu gut de rey lily,
gun zaab rca lam de mbecy nim par tub la.
19 Gut Sehon, rey ni de mbecy amorreo,
gun zaab rca lam de mbecy nim par tub la.
20 Niꞌ ziꞌl gut Og, rey ni Basan,
gun zaab rca lam de mbecy nim par tub la.
21 Orzeꞌ briic mi yu ni de yu zeꞌ nu gani de mbecy nim,
gun zaab rca lam de mbecy nim par tub la.
22 De yu zeꞌ byac ñi gyaꞌn de mbecy Israeel,
de yu nu bicy riiñ nim,
gun zaab rca lam de mbecy nim par tub la.
23 Byezaꞌ lagy mi de ub na, ornu bzac den gyel zi,
gun zaab rca lam de mbecy nim par tub la.
24 Bloo mbañ mi de ub na yaa de losaꞌ yuun,
gun zaab rca lam de mbecy par tub la.
25 Rbic mi de coz nu gow de mbecy nu de bañcyug,
gun zaab rca lam de mbecy nim par tub la.
26 Briic der gras ni Ñgyoozh, biñ nu riib ic gashtal gyibaa,
gun zaab rca lam de mbecy nim par tub la.