Ñgyoozh dzi coz ily bicy mi
135
1,2 ¡Byabic der gyel mbecy ni Ñgyoozh!¡De ru mbecy nu ricy riiñ nim,
nu zur riiñ nañ yuꞌ yon nim,
gal nu loliꞌ ni yuꞌ wedz nim,
byabic der gyel mbecy nim!
3 ¡Byabic der gyel mbecy nim gun dzi nap mi!
¡Biily der de riidz nu gyabic gyel mbecy nim,
gun dzi nap ricy num de mbecy!
4 Gun Ñgyoozh bzu chum Jacob,
gal nu de nez yu nu gruu zac par lo,
nu gac dey mbecy nim.
5 Ya̱ nap rad lagya̱ nu dzi zily nac Ñgyoozh.
Zily zir nac mi gazeꞌ deꞌ zir de ñgyoozh.
6 Ricy mi la ziꞌl coz nu rlagy mi.
Ni ricy mi gyibaa, nu gyishlombecy ii, nu lo nisyudoo.
Niꞌ ziꞌl ricy mi mas gal zeꞌ nu gyi zir ni nisyudoo.
7 Rzeed mi za nu shet ñi gyey
mas gal zeꞌ nu zet zir ni gyishlombecy.
Ricy mi nu rzu gyi ni guzii lat nu yet gyey.
Nunu ricy mi nu druu bi.
Rboom ñii zeꞌ nu yuꞌ choow ñi.
8 De lo yu ni Egipto, bicy mi nu gut de iꞌñ lo ga dela mbecy.
Niꞌ ziꞌl gut mdoo lo ga ni dela bañcyug.
9 Lugaar zeꞌ bicy mi nusuriidz,
nunu bicy mi coz nu gua nu ic de mbecy.
Orzeꞌ briic mi cashtig ni Faraoong,
yu nu byub ic Egipto, nu de fushtiz niy.
10 Mnit lom zañ nac mbecy,
nunu bicy mi nu gut zañ de yu nu nac rey fert.
11 Biit mi Sehon, rey ni de mbecy amorreo,
nu Og, rey ni de mbecy Basan,
gal nu dela rey ni dela de mbecy Canaan.
12 Orzeꞌ bzeeñ mi yu ni dela mbecy zeꞌ yaa de mbecy nim, de mbecy Israeel.
Ndeꞌ gyel nap nu bdugyi dey.
13 Ñgyoozh, Shuaan de̱, de mbecy nap rila wanit lagy dey ru
nu de mbecy nu ruu zac de tiem nu yad par lo caa ic dey ru.
14 Ñgyoozh gyicy mi nu gruu nap de mbecy nim, de yu nu ricy riiñ nim,
nunu gashni lagy mi dey.
15 De ñgyoozh ni de reñaꞌ nac mbecy, ndeꞌ nab nu byaa nu plat nu or.
Nac ñii coz nu bzaa mbecy.
16 Zub ruꞌñ, tees wagac niiñ.
Ca urloñ, tees wacsac ñi.
17 Zub gyidag ñi, tees wagyeñ ñi.
Ni wagac gash ñi bi.
18 Orzeꞌ dela mbecy nu bzaa nab zeꞌ,
gal nu de mbecy nu ricy cup consuel loñ,
niꞌ ziꞌl na dey gal nu na de nab nu rzaay.
19 ¡De ru mbecy Israeel, byabic der gyel mbecy ni Ñgyoozh!
¡De ru uz nu zu riiñ lom, byabic der gyel mbecy nim!
20 ¡De ru mbecy nez Levi, byabic der gyel mbecy nim!
¡De ru mbecy nu rdzib lagy lom, byabic der gyel mbecy nim!
21 ¡Byabic der gyel mbecy nim mbecy Sión,
gyedz Jerusaleeng, zeꞌ nu zum!
¡Byabic der gyel mbecy nim!