Riidz ni Ñgyoozh nu nac Dabi
132
Ñgyoozh, Shuaan de̱, cueꞌ nit lagy ru de coz deet nu bzac gyitoo Dabi.2 Bicy nu gyezaꞌ lagy ru de riidz nu mniiy
nu waded la gyicy yu lo ru, biñ nu nac Ñgyoozh ni gyitoo Jacob,
3 ornu mniiy: “Waya̱ yu̱ꞌ, ni waya̱ nu gyuba̱ lo nuun ne̱,
4 ni wazu lagya̱, ni wadasa̱,
5 gashtal gza̱a̱ la̱ tub lugaar par Ñgyoozh,
biñ fert nu guc nu gyitoo Jacob”, nay.
6 Gyedz Beleeng güeñ de̱ nu zaab riidz
ca lugaar ri caj ni trat nu bicy nu Ñgyoozh de mbecy.
Orzeꞌ byap de̱ ñii lo yu ni Jaar.
7 ¡Yaa gyan nañ yuꞌ yon ni Ñgyoozh!
¡Griib zily den mi lugaar zeꞌ nu riib ic mi!
8 Weshte Ñgyoozh,
gun gyeed nur caj ni muesht ni fers nir nañ yuꞌ yon nir.
9 De uz nu zu riiñ lor zaab caacy ga la gzu dey
par nu gabe nu niꞌ ziꞌl caacy gyicy dey.
Zeꞌ de mbecy nu ricy paa nir, rlagy ñi nu cush ti dey
nu nac nu yet lagy yu.
10 Ñgyoozh, ru mniir tub riidz nu waded la gyicy ru.
Mniir lo gyitoo Dabi, tub yu nu bicy riiñ nir.
Orzeꞌ cueꞌ gzu chur yu nu pcuir nu guc rey.
11 Mniim tub riidz nu waded la gyicy mi.
Mniim lo gyitoo Dabi,
nunu rila watily mi de riidz nu mniim.
Ornu nar: “Ya̱ duba̱ tub de iꞌñ ru
nu gyiyeeñ yu lugaar nir nu gac yu rey.
12 Benu de iꞌñ ru gyicy yac dey ni de riidz ni trat nu bicy du̱ ru,
nunu gyicy yac dey ni de riidz nu lyu̱u̱ niy,
orzeꞌ niꞌ ziꞌl grusu de yu nu gac rey lat de iꞌñ yu par tub la”, nam.
13 Gun Ñgyoozh pcuim too bicy Sión
nu gac ñi lugaar zeꞌ nu zum,
14 ornu nam: “Too bicy ii, nii lugaar nu rlagya̱ zu̱ par tub la.
Ii cyiiña̱, gun nii lugaar nu yet lagya̱.
15 De mbecy Sión, sheñ de coz nu cyiiñ ni dey grica̱.
Gyicya̱ nu gyel ni de mbecy zi nu nac de coz nu grica̱ nu gow dey.
16 De uz nu zu riiñ lo̱ gyicya̱ nu de yu zeꞌ locyuub dey nu gruu mbañ mbecy.
Zeꞌ de mbecy ne̱ nu yuꞌ Sión, cush ti dey nu nac nu dzi gyet lagy yu.
17 Nunu laab ii gyicya̱ nu tub mbecy nez Dabi, tub yu nu pcui̱
nu gyac yu tub Rey lily.
Gyicya̱ nu gruu nap yu.
18 Nunu gyicya̱ nu gruu gyel mbecy ni de losaꞌ yuuy.
Zeꞌ ub yu gyicya̱ nu gabe gyel lily niy.”