Ñgyoozh zam contr ni de losaꞌ yuu mbecy Israeel
129
De mbecy Israeel bzac zi dey
nese tiem nu bzub la gyiꞌ ledz yu.
2 Nese nu bzub gyiꞌ nu guchuꞌ de mbecy Israeel,
de losaꞌ yuuy rshet zi dey yu.
Tees wagyicy dey gan nu nnit lo dey yu.
3 Ricy dey nu rzac zi de mbecy Israeel.
Rzac dey gal nu rzac yu ornu rshet dey shurc loñ nu arad.
4 Zeꞌ Ñgyoozh,
Shuaan na,
biñ nu ricy coz nu seꞌñ,
mi zeꞌ pshiꞌñ mi de duu cacy
nu pcaa cuuñ de mbecy a̱ꞌ nap de mbecy Israeel.
5 Orzeꞌ dela de yu nu rzi lagy lo de mbecy nu yuꞌ Sión,
de yu zeꞌ rlagy ñi nu nit loy,
nunu gruu chu dey nu gash yu carer.
6 De yu zeꞌ gzac dey gal nu rzac de gyizh nu driib too yuꞌ.
Nu rawach ñi anzir nu lazh galy ñi.
7 Ni washiꞌñ mbecy ñi.
Ni wayicy dey be yeñ gañ nu gya nuy par yuꞌ.
8 De mbecy nu rded zeꞌ nu zu dey wagniiy:
“Ñgyoozh nap gyicy num ru”,
wagniiy ni.
Niꞌ ziꞌl de yu zeꞌ wagniiy:
“Diñ de̱ lo Ñgyoozh nu nap gyicy num ru.”