Ñgyoozh zaab ic mi de mbecy nim
125
De mbecy nu ricy cup consuel lo Ñgyoozh,
Shuaan na,
na dey gal nu na too bicy Sión.
Ni tub la mbecy wac gyicy yu nu cueñ ñi.
Ni wac chaay seꞌñ.
2 Gal nu de too bicy rsoow ñi dub yub la ruꞌ gyedz Jerusaleeng,
niꞌ ziꞌl mod rsoow Ñgyoozh dub yub la zeꞌ nu yuꞌ de mbecy nim,
gun orzeꞌ se la la coz gzac dey na,
gal nu par tub la.
3 De mbecy a̱ꞌ nap,
walab nu tub la gyub ic dey lo yu nu briic Ñgyoozh ni de mbecy nim,
gun benu tuñ ñgyub ic dey,
orzeꞌ gazaꞌ de mbecy ni Ñgyoozh dzi zañ de coz a̱ꞌ nap ñgyicy dey.
4 Ñgyoozh,
Shuaan de̱,
de mbecy nap nir nap bicy nu dey,
de yu nu dutuub la lardoo rzuub gyidag nir.
5 Zeꞌ de yu nu druu chu nez nir,
orzeꞌ rash dey nez a̱ꞌ nap.
De yu zeꞌ bicy nu dey gal nu ricy nur de mbecy a̱ꞌ nap.
Orzeꞌ chuꞌ gyel ri zu lat de mbecy Israeel.