Dzi gyedz nap Jerusaleeng: tub riidz ni Dabi
122
Bet lagya̱ ornu mnii de mbecy lo̱.
Orzeꞌ nay:
“Yaa gun chan nañ yuꞌ yon ni Ñgyoozh.”
2 Na bi zu̱ de̱ par nañ ya roꞌ ni loꞌ nu zu dub yub la ruꞌ gyedz Jerusaleeng.
3 De mbecy bzaay gyedz Jerusaleeng.
Orzeꞌ lat gyedz zeꞌ gyatublaazh dey.
4 Gyedz ii,
ryatublaazh dela nez de mbecy Israeel
nu rbic dey gras ni Ñgyoozh,
Shuaan na,
dub gal nu mniim nu gyicy dey.
5 Lugaar ii gzub de rey ni de mbecy Israeel
nu gyicy yu gyel fushtiz nu de mbecy niy.
Ii gzub de yu nu ryeeñ lo rey Dabi,
de yu nu riib ic de mbecy Israeel.
6 Bdiiñ der lo Ñgyoozh nu chuꞌ gyel ri zu Jerusaleeng.
Orzeꞌ dub gusht la chesa de mbecy nu rca gyedz Jerusaleeng.
7 Dub gusht la cyiiñ de mbecy nu yuꞌ par nañ loꞌ,
loꞌ nu zu dub yub la ruꞌ gyedz.
Nunu de mbecy nu rcyiiñ lo de fushtiz,
rila a̱ꞌ rishdzidz cyiiñ dey.
8 Nu nac de famil ne̱ nu de losa̱ꞌ,
orzeꞌ rne̱e̱ lo dela mbecy Jerusaleeng
nu chuꞌ gyel ri zu lat dey.
9 Nu nac yuꞌ yon ni Ñgyoozh,
Shuaan na,
orzeꞌ ya̱ rlagya̱ nu dub gusht la cyiiñ de mbecy Jerusaleeng.