Tub mbecy rgyiiñ yu lo Ñgyoozh nu nac nu zuy zeꞌ nu deet rac
120
Ya̱ mnishba̱a̱ lo Ñgyoozh,
Shuaan na,
lat nu bzac deeta̱.
Orzeꞌ bicy mi gal nu mne̱e̱.
2 Ñgyoozh,
bloo nap ya̱ yaa de mbecy rguu,
gal nu yaa de mbecy nu rnii de riidz fals.
3 Zeꞌ de ru,
mbecy rguu,
¿la coz gyicy nu Ñgyoozh ru?
¿Lac mod cuic mi cashtig ni der?
4 Cuic mi cashtig ni der nu gyech too lyuch nu rzeed guaz gal nu boo rely ni ya guub.
5 ¡Lashta ya̱!
Gun chesa̱ lat de mbecy Mesec,
nunu cyiiña̱ nañ yuꞌ negy ni de mbecy Cedar.
6 Bded ruꞌ gaꞌ la nu tuñ tiem pcyiiña̱ lat de mbecy,
de yu nu wagyet lagy gyel ri zu lat losaꞌy.
7 Ornu mne̱e̱ lo dey nu cueꞌ chuꞌ cooy,
orzeꞌ gyel yuu ziꞌl rlagy dey gyicy yu.