Riidz ni Ñgyoozh ' Alef
119
Dzi ni de mbecy nu zu nez nap nu sac falt ni,de mbecy nu rded dub gal mod nu rnii leey ni Ñgyoozh.
2 Dzi ni de mbecy nu ricy gal nu rniim,
de mbecy nu rzuub gyidag nim nu dutuub la lardooy.
3 De yu zeꞌ rila wagadza dey,
sinu zaab zu la dey nez ni Ñgyoozh.
4 Ñgyoozh, Shuaan na, ru nil bi briic ru leey nir ne̱ de̱,
nunu mniir nu fert la zuub gyidag de̱ niñ.
5 Ya̱ drish lo̱ nu gyicy yaca̱ ni de coz nu ru mniir nu gyicya̱.
6 Waruu gyel mbecy ne̱
benu nap duꞌ cuena̱ de coz nu rnii de leey nir.
7 Orzeꞌ gaca̱ mbecy nu caacy lardoo
ornu gyabica̱ gyel mbecy nir,
ornu bi guca̱ de coz nap nu rniir nu gyicya̱.
8 Ya̱ gzuub gyidaga̱ de coz nu rnii de leey nir.
¡Cueꞌ zaan ru ya̱, Ñgyoozh!
b Bet
9 ¿Lac mod gyicy tub yu feñ, par nu cyiiñ yu tub mod cacy?
Rlagy ñi nu cyiiñ yu dub gal na mod nu rnii de riidz nir.
10 Ya̱ ryuba̱ ru nu dutuub la lardo̱o̱, Ñgyoozh.
Cueꞌ zaan ru nu laa ya̱a̱ de coz nu rniir nu gyicya̱.
11 Ya̱ bduꞌ choowa̱ de riidz nir nañ lardo̱o̱,
gun orzeꞌ cueꞌ gyicya̱ cyi nu chañ contr nir.
12 Ñgyoozh, Shuaan na, gyabica̱ gyel mbecy nir.
Orzeꞌ blyuu ne̱ de coz nu rnii de leey nir.
13 Orzeꞌ ya̱ ye la ne̱e̱ de leey nu briic ru ne̱.
14 Yet zir lagya̱ nu gyicya̱ de coz nu ru rniir
gazeꞌ par nu gad sheñ gyel nap ne̱ gyishlombecy ii.
15 Orzeꞌ grusha̱ shcab nu nac de coz nu rniir nu gyicya̱,
nunu nap duꞌ cuena̱ dela coz nu lyuur ne̱.
16 Orzeꞌ zu cyit lagya̱ nu nac de leey nir.
Rila wanit lagya̱ de coz nu rniir nu gyicya̱.
g Guímel
17 Ya̱ tub mbecy nu ricy de coz nu rlagy ru, Ñgyoozh.
Orzeꞌ nap bicy nu ya̱.
Orzeꞌ gzu̱ tuñ tiem,
nunu gzuub gyidaga̱ de riidz nir.
18 Bicy nu gyal shcab ne̱,
gun orzeꞌ nap gad lagya̱ de coz nap nu gruu lo de leey nir.
19 Tub miiñ ziꞌl chesa̱ gyishlombecy ii.
Orzeꞌ de mandaar nu mniir nu gyicy de mbecy,
cueꞌ cach ruñ lo̱.
20 Dub laa tiem deet rac nañ lardo̱o̱
gyiꞌ nu ric la añ ne̱ nu rlagya̱ gad lagya̱ de mandaar nu mniir zeꞌ.
21 Ru rshuu nur de mbecy ñgya nu de mbecy gul duu.
De mandaar nu mniir nu gyicy mbecy,
de yu zeꞌ bruu chu dey loñ.
22 Cueꞌ zaan ru nu gubdzaa dey ya̱, Ñgyoozh,
o nu güii naañ dey lo̱,
gun bzuub gyidaga̱ de coz nu ru mniir.
23 Mas gal de yu lily yatublaazh dey
nu rboo ic yu lac mod gyicy nuy ya̱.
Tees ya̱ drusha̱ shcab nu nac de coz nu rnii de leey nir.
24 Dzi zu cyit lagya̱ nu nac de coz nu rniir nu gyicya̱.
De riidz zeꞌ rbic ñi consef ne̱.
d Dálet
25 Ya̱ bi zu̱ la̱ nu gata̱.
Doo gyel mbañ ne̱ dub gal nu mniir nu waded la gyicy ru.
26 Ornu bicy caacya̱ dela coz nu bicya̱,
orzeꞌ ru mnii nur ya̱.
Orzeꞌ blyuu de leey nir ne̱.
27 Bicy nu gyet laga̱ cuen de riidz nu rnii de leey nir.
Orzeꞌ ya̱ rusha̱ shcab nu nac de riidz nap nu rlyuur.
28 Rsuun lañ ya̱ nu tonaꞌ la ricy shni̱.
Cuic ru fers ne̱ dub gal nu mniir nu waded la gyicy ru.
29 Cueꞌ zaan ru nu gadza̱.
Nu nac nu dzi nap ru, orzeꞌ blyuu de riidz ni leey nir ne̱.
30 Ya̱ pcui̱ nez nu cha̱, nez ni mbecy nu ricy paa.
Ya̱ bduꞌ cuena̱ de mandaar nu mniir nu gyicy de mbecy.
31 De mandaar nu mniir nu gyicya̱,
Ñgyoozh, “O” mne̱e̱ nu gyicya̱ñ.
Orzeꞌ cueꞌ zaan ru nu gruu gyel mbecy ne̱.
32 Rlala̱ nu gyicy yaca̱ ni de mandaar nu mniir nu gyicya̱,
gun orzeꞌ gyicy ru nu gyet lag zira̱ cuen.
h He
33 Ñgyoozh, Shuaan na, blyuu ne̱ lac yaruu de riidz ni leey nir.
Orzeꞌ gyicy yaca̱ niñ gashtal shuub la dzi ne̱.
34 Pshaal shcab ne̱ par nu gyet laga̱ cuen de riidz ni leey nir.
Orzeꞌ zuub gyidaga̱ niñ nu dutuub la lardo̱o̱.
35 Blocyuub ya̱ nu gzuub gyidaga̱ de coz nu rniir nu gyicya̱.
Nu nac ndeꞌ tonaꞌ la zu cyit lagya̱.
36 Bicy nu dzi zir gyet lagya̱ de mandaar nu mniir nu gyicy de mbecy
gazeꞌ par nu gyet lagya̱ nu gyaguaniꞌña̱.
37 Blocyuub ya̱ nu cueꞌ güi̱i̱ lo de ñgyoozh fals.
Zaan ru nu cyiiñ mbaña̱, gun orzeꞌ cha̱ nez nu blyuur ne̱.
38 Ya̱ tub mbecy nu ricy riiñ nir.
Orzeꞌ bicy gal nu mniir nu waded la gyicy nur ya̱.
Laab riidz zeꞌ mniir lo de mbecy nu rdzib lagy lor.
39 Cueꞌ zaan ru nu nii zi de mbecy ne̱,
gun rdziba̱ de riidz nu rnii dey.
Gun leey nir nap rniiñ.
40 Tonaꞌ la rlagya̱ zuub gyidaga̱ de leey nir.
Orzeꞌ bicy nu tuñ cyiiña̱,
gun ru nac ru biñ nu ricy de coz nu seꞌñ.
w Vau
41 Bicy nu gad lagya̱ nu dzi rcar ya̱, Ñgyoozh,
nunu bicy nu gad lagya̱ nu ru co mbañ ru ya̱
dub gal nu mniir nu waded la gyicy ru.
42 Orzeꞌ gad riidz nu ne̱e̱ lo de mbecy nu rgubdzaa ya̱,
gun ya̱ ricy cupa̱ consuel lo de riidz nir.
43 Blocyuub ya̱ nu ne̱e̱ de riidz rishli dub laa tiem.
Ya̱ drish lo̱ de coz nu mniir nu rlagy ñi gyicy mbecy.
44 Orzeꞌ zaab zuub gyidag la̱ ni leey nir par dub laa tiem.
45 Orzeꞌ dub gusht la cyiiña̱,
gun ricya̱ gal nu ru rniir.
46 Orzeꞌ zata̱ de mandaar nir lo de fushtiz.
Orzeꞌ waruu gyel mbecy ne̱.
47 Yet lagya̱ nu gyicya̱, gal nu mniir nu gyicy de̱,
gun dzi rca̱ de mandaar nu rniir nu gyicy de mbecy.
48 Ricya̱ de mandaar nir par tub coz ta na.
Dzi yet lagya̱ñ.
Drusha̱ shcab nu nac de mandaar nu rniir nu gyicy de mbecy.
z Zain
49 Bicy nu gyezaꞌ lagy ru de riidz nu mniir lo̱,
gun ndeꞌ dzi briic ñi consuel ne̱.
Ya̱ tub yu nu ricy de coz nu rlagy ru.
50 Mas tiem nu bzac zi̱, tees ru briic ru consuel ne̱,
gun de riidz nu mniir lo̱, ndeꞌ gyicy ñi nu wata̱.
51 De mbecy ñgya zaab rgubdzaa la dey ya̱.
Tees ya̱ wanruu chu̱ lo leey nir.
52 Ñgyoozh, yezaꞌ lagya̱ de riidz nu briic ru gulas.
Ndeꞌ briic ñi consuel ne̱.
53 Rchaꞌ ica̱ ornu rzaca̱ de mbecy a̱ꞌ nap,
ornu ricy dey de coz nu zañ contr ni leey nir.
54 De riidz nu rniir nu gyicy de mbecy,
lat nu rdeda̱ tiem miꞌ ni gyishlombecy ii,
orzeꞌ rdula̱ de riidz zeꞌ.
55 Rel orzeꞌ yezaꞌ lagya̱ ru, Ñgyoozh.
Orzeꞌ rlyu̱u̱ ni uba̱ nu gyicy yaca̱ ni de leey nir.
56 Gal mod nu rlagy ñi:
ndeꞌ nu zuub gyidaga̱ de coz nu rniir nu gyicy de mbecy.
x Chet
57 Sacaꞌ zir coz nu rlagya̱, nomaas ru ziꞌl, Ñgyoozh.
Orzeꞌ na ne̱e̱ lor nu waded la gyicy yaca̱ ni de riidz nu rniir.
58 Orzeꞌ na rdiña̱ lor nu dutuub la lardo̱o̱, nu nap gyicy nur ya̱,
dub gal nu mniir nu waded la gyicy ru.
59 Drusha̱ shcab nu nac de mod nu ricya̱.
Orzeꞌ cush cya̱ lo de riidz nir nu gyicy yaca̱ niñ.
60 Waleza̱, sinu gyicy lala̱ nu gyicy yaca̱ ni de leey nir.
61 Mas de mbecy a̱ꞌ nap bzu dey caa dub yub la lo̱,
tees ya̱ wanit lagya̱ leey nir.
62 Drisha̱ yaa or guzeel rel nu ryabica̱ gyel mbecy nir
nu nac de riidz nap nu mniir nu rlagy ñi nu gyicy de mbecy.
63 Ya̱ gac du̱ de mbecy nu rdzib lagy lor.
Gac du̱ de mbecy nu ricy yac nu de riidz nu mniir nu rlagy ñi gyicy mbecy.
64 Ñgyoozh, ru dutuub la gyishlombecy, ru zaab rca lar de mbecy.
Orzeꞌ na blyuu ne̱ ni de riidz nu mniir nu gyicy de mbecy.
X Tet
65 Ya̱ naca̱ tub mbecy nu ricy riiñ nir.
Orzeꞌ nap bicy nu ya̱ dub gal nu mniir nu waded la gyicy ru.
66 Ñgyoozh, blyuu ne̱ nu nap gad lagya̱ lac mod zu de coz,
nunu cuic ru shcab ne̱,
gun ya̱ ricy cupa̱ consuel lo de mandaar
nu mniir nu gyicy de mbecy.
67 Yuꞌ nu radza̱.
Orzeꞌ anzir ru briic ru cashtig ne̱.
Ndeꞌ nu na zuub gyidaga̱ de riidz nir.
68 Ru tonaꞌ la nap ru, nunu tonaꞌ la nap ricy ru.
Blyuu ne̱ de leey nir.
69 De mbecy leꞌ rguu dey ornu rniiy la coz rzaca̱.
Zeꞌ ya̱ ricya̱ de coz nu rniir lo̱ nu gyicya̱ñ nu dutuub la lardo̱o̱.
70 De yu zeꞌ cyigy tooy.
Zeꞌ ya̱ zu cyit lagya̱ nu nac leey nir.
71 Nap tonaꞌ la bicy ru nu briic ru cashtig ne̱.
Ndeꞌ bicy ñi nu psya̱ꞌ de riidz nu mniir nu gyicy de mbecy.
72 Dzi zir coz ily sac de riidz ni de leey nu mniir,
gazeꞌ zañ miily tiñ plat nu tiñ or.
y Yod
73 Ru psaꞌ lagy ru ya̱,
nunu bicy ru nu byaca̱ tub mbecy.
Doo shcab ne̱ na,
gun orzeꞌ gyet laga̱ cuen de mandaar nu mniir nu gyicy de mbecy.
74 De mbecy nu rdzib lagy lor yet lagy dey ornu rzac yu ya̱,
gun ya̱ ricy cupa̱ consuel lo de riidz nir.
75 Ñgyoozh, ornu rniir ca na de coz nu rlagy ñi,
ya̱ rad lagya̱ nu de ndeꞌ coz nu seꞌñ.
Nunu rad lagya̱ nu rbic ru cashtig ne̱,
gun ru nac ru biñ nu ricy paa.
76 Doo consuel ne̱ nu nac nu zaab rca lar ya̱, tub mbecy nu ricy riiñ nir,
dub gal nu mniir nu waded la gyicy nur ya̱.
77 Gushni lagy ya̱,
gun orzeꞌ cyiiñ mbaña̱,
gun ya̱ zu cyit lagya̱ nu nac leey nir.
78 De mbecy ñgya rlagy ñi nu gruu gyel mbecy ni dey
gyiꞌ nu briib dey gyidza to̱o̱.
Zeꞌ ya̱ drusha̱ shcab nu nac de riidz nu mniir nu gyicy de mbecy.
79 De mbecy nu rdzib lagy lor, rlagy ñi nu cyid dey lo̱,
gun orzeꞌ gad lagy dey de mandaar nu mniir nu gyicy de mbecy.
80 Rlagya̱ gyicy yaca̱ ni leey nir nu dutuub la lardo̱o̱,
gun orzeꞌ cueꞌ nu gruu gyel mbecy ne̱.
k Caf
81 Ñgyoozh, blazh la fers ne̱ lat nu rleza̱ ru nu co mbañ ru ya̱.
Zeꞌ ya̱ ricy cupa̱ consuel lo de riidz nir.
82 Gutas la urlo̱ nu dzi ca lo̱ nu waded la gac ñii gal nu mniir.
Na ya̱ rdugyi̱ꞌ: “¿Gul locyuub ru ya̱?”
83 Se laꞌ la cyiiña̱.
Na̱ gal nu na gyid gush nu bi mneꞌ mbecy,
tub gyid nu guꞌ nis ni urbyay.
Mas ni na, tees wannit lagya̱ de riidz nu mniir nu gyicy de mbecy.
84 ¿La be ru tiem rlagy ñi nu leza̱?
¿Gul cuic ru cashtig ni de mbecy nu rshet zi ya̱?
85 De mbecy leꞌ nu wacsuub gyidag ni de leey nir,
bzu dey tub caa nu gyet laga̱.
86 De mandaar nu mniir nu gyicy de mbecy,
ndeꞌ de riidz nu gac gyicy cupa̱ consuel lo.
Blocyuub ya̱, Ñgyoozh,
gun de mbecy ricy dey nu rzac deeta̱
nu nac de gyel rguu ni dey.
87 Se ñu miiñ ziꞌl bi bzaꞌ lo dey ya̱ gyishlombecy ii.
Tees ya̱ wansu chu̱ de coz nu mniir nu gyicya̱.
88 Nap bicy nu ya̱ nu nac nu zaab rca lar ya̱,
gun orzeꞌ gyicy yaca̱ ni de riidz nu driib ruꞌr.
l Lámed
89 Ñgyoozh, Shuaan na, de riidz nir zuñ par tub la.
Fert zuñ mas gal baa.
90 Ru ricy paar nu de mbecy dub laa lat nu zu gyishlombecy.
Bzuub ru gyishlombecy seꞌñ, nunu zeꞌ zuñ na.
91 Dela coz zuñ mas gal dzi na dub gal mod nu na mandaar nir,
gun delañ ricy ñi riiñ nir.
92 Tub zi la nu nac nu dzi bet lagya̱ de riidz nir,
ndeꞌ bicy ñi nu wangata̱ de tiem nu dzi bzac zi̱.
93 Rila wanit lagya̱ de riidz nu mniir nu gyicya̱,
gun de riidz zeꞌ gyicy ñi nu cyiiñ mbaña̱.
94 Ya̱ naca̱ tub coz nir.
¡Bloo mbañ ya̱ na!
Ya̱ byuba̱ tub mod nu gyicy pa̱a̱ nu de riidz nu mniir nu gyicya̱.
95 De mbecy a̱ꞌ nap rbez dey nu gad mod nu nit loy ya̱.
Zeꞌ ya̱, ya̱ drusha̱ shcab
nu nac de mandaar nu mniir nu gyicy de mbecy.
96 Bzaca̱ nu dela coz ca beey be zeꞌ nu checañ.
Zeꞌ de mandaar nu ru rniir nu gyicy de mbecy,
ndeꞌ bded ruꞌ ga la nu coz ily.
m Mem
97 ¡Dzi ga rca̱ de leey nir!
Gua la dzi drusha̱ shcab nu nac ñi.
98 De riidz nir dub laa tiem nac nuñ ya̱,
de riidz nu mniir nu gyicy de̱.
Orzeꞌ ndeꞌ ricy ñi nu yuꞌ zir shcab ne̱
gazeꞌ shcab nu ricy cup de losaꞌ yu̱u̱.
99 Nap zir rad lagya̱ gazeꞌ de moscuel ne̱,
gun ya̱ drusha̱ shcab
nu nac de mandaar nu mniir nu gyicy de mbecy.
100 Yuꞌ zir shcab ne̱ ya̱, gazeꞌ shcab nu ricy cup de yu bel,
gun rzuub gyidaga̱ de riidz nu rniir nu gyicy de̱.
101 Waya̱ nez ni de mbecy a̱ꞌ nap,
gun rlagya̱ gyicy yaca̱ nu de riidz nir.
102 Waruu chu̱ lo de riidz nu rlyuur,
gun laab ru nac ru biñ nu rlyuu ne̱.
103 Riidz ni ru nañ gal nu na tub coz ish nu da̱w.
Dzi zir ish ñi gazeꞌ dziñ doo.
104 Rad shcab ne̱ nu nac de leey nir.
Ndeꞌ nu rzi lagya̱ lo de coz shiñ na nu ricy de mbecy.
n Nun
105 Riidz ni ru, Ñgyoozh, ndeꞌ nañ
gal nu na joc nu rbic ñi yaa par nu zaca̱ ca zuub gyi̱ꞌ.
Nañ gal nu na tub gyi nu rbic ñi yaa nez nu cha̱.
106 Nu dutuub la lardo̱o̱ mne̱e̱ tub riidz nu waded la gyicy yaca̱ niñ.
Ya̱ zuub gyidaga̱ ni de riidz nap nu ru mniir nu rlagy ñi nu gyicya̱.
107 Ñgyoozh, Shuaan na, tonaꞌ la coz ily rzac zi̱.
Bicy nu cyiiñ mbaña̱ dub gal nu mniir nu waded la gyicy ru.
108 Ornu drica̱ gras nir nu dutuub la lardo̱o̱,
ndeꞌ gun nu driib ru̱ꞌ.
Orzeꞌ gush gun zeꞌ,
nunu blyuu ne̱ de̱ de coz nu mniir nu gyicy de̱.
109 Dub laa tiem zaab zu̱ la̱ lo rishdzidz nu gata̱.
Tees wagnit lagya̱ de leey nir.
110 De mbecy a̱ꞌ nap rzu dey caa ne̱.
Tees waruu chu̱ lo de riidz nu mniir nu rlagy ñi nu gyicy de̱.
111 De mandaar nu mniir nu gyicy de̱, ndeꞌ tub gyaꞌna̱ nu gyiyeeñ ya̱a̱ par tub la.
De ndeꞌ coz nu yet lagya̱ nu dutuub la lardo̱o̱.
112 Bi bduꞌ ica̱ nu gyicya̱ gal nu rnii leey nir par dub laa tiem, gal gat la̱.
s Sámec
113 Orzeꞌ rzi lagya̱ lo de mbecy rzuu lo,
tees dzi ga yet lagya̱ de leey nir.
114 Ru nar gal nu na tub lugaar nap par nu cach lo̱ lo de losaꞌ yu̱u̱.
Ru zaab ic ru ya̱, gun orzeꞌ se la la zaca̱.
Ya̱ drish lo̱ lo de riidz nir.
115 De ru mbecy a̱ꞌ nap bruu chu der lo̱.
Gun ya̱ zuub gyidaga̱ de mandaar nu mnii Ñgyoozh nu gyicy de mbecy.
116 Ñgyoozh, doo fers ne̱, dub gal nu mniir nu waded la gyicy ru.
Orzeꞌ cyiiñ mbaña̱.
Cueꞌ zaan ru nu shiꞌña̱ baloor nu nac consuel nu ricy cupa̱ lor.
117 Blocyuub ya̱.
Orzeꞌ gruu mbaña̱.
Orzeꞌ dub laa tiem gyicy yaca̱ nu leey nir.
118 Bzu chu dela mbecy nu walagy zuub gyidag ni leey nir.
Se la la cyiiñ ñi ni dey ornu rboo ic yu de coz fals nu gyicy yu.
119 Gyicy nur de mbecy a̱ꞌ nap, gal nu ricy nu mbecy toop.
Ndeꞌ nu ya̱ dzi yet lagya̱ de riidz nu rniir nu rlagy ñi nu gyicy de̱.
120 Nu nac ru tonaꞌ la rdzib lagya̱.
Rash la bisa̱.
Rdzib lagya̱ gyiꞌ nu dzi ta na de riidz nu rniir nu rlagy ñi nu gyicy de̱.
v Ayin
121 Ya̱ bi bicya̱ de coz nu seꞌñ, nu de coz nap.
Ndeꞌ nu cueꞌ zeeñ ru ya̱ yaa de losaꞌ yu̱u̱.
122 Ñgyoozh, cuic ru rishnii nir nu ya̱, tub mbecy nu ricy yac nu de mandaar nir,
nu nap cyiiña̱.
Cueꞌ zaan ru nu shet zi de mbecy leꞌ ya̱.
123 Gutas la urlo̱ nu dzi ca lo̱ nu rleza̱ nu co mbañ ru ya̱ par nu gruu napa̱.
Orzeꞌ gyuꞌ niñ gal nu mniir nu waded la gyicy ru.
124 Ya̱ tub yu nu ricy riiñ nir.
Orzeꞌ bicy nu ya̱ gal mod nu rlagy ñi par tub mbecy nu zaab rca lar.
Blyuu ne̱ de mandaar nu mniir nu gyicy yac mbecy.
125 Ya̱ tub mbecy nu ricy riiñ nir.
Orzeꞌ cuic ru shcab ne̱,
gun orzeꞌ gad lagya̱ de mandaar nu rniir nu gyicy de mbecy.
126 Ñgyoozh, na tiem niñ nu gyicy ru gal nu rlagy ñi,
gun de mbecy walagy dey zuub gyidag yu de riidz nu rlyuur.
127 Zeꞌ ya̱, dzi zir yet lagya̱ de mandaar nu mniir nu gyicy de mbecy,
gazeꞌ par nu gyet lagya̱ or, mas rlyu nu or mbañ la.
128 Ndeꞌ nu ya̱ rusha̱ nez nu rlyuu de riidz nu mniir nu gyicya̱.
Rzi lagya̱ lo de coz fals.
p Pe
129 De mandaar nu mniir nu gyicy de mbecy, tonaꞌ la coz ily nac ñii.
Ya̱ rzuub gyidaga̱ niñ nu dutuub la lardo̱o̱.
130 Ornu ryaal de riidz nu mniir nu gyicy de̱,
orzeꞌ rbic lañ yaa,
nunu rbic ñi shcab ni de mbecy nu wagad lagy.
131 Pshaa la ru̱ꞌ nu byash lagya̱ gyiꞌ nu ric la añ ne̱
nu dzi yet lagya̱ de mandaar nu mniir nu gyicy de̱.
132 Bgüii lo̱, nunu gushni lagy ya̱
gal mod nu nil ricy nur de mbecy nu rca ru.
133 Ndeꞌ nu na bicy fert ñgyicha̱ gal nu mniir nu waded la gyicy ru.
Cueꞌ zaan ru nu gyicy de mbecy a̱ꞌ nap gan ya̱.
134 Bloo mbañ ya̱ yaa de mbecy nu rshet zi ya̱,
gun orzeꞌ gyicy yaca̱ nu de riidz nu mniir nu rlagy ñi nu gyicy de̱.
135 Ñgyoozh, blyuu yaa ni yalor lo ya̱, tub mbecy nu ricy riiñ nir,
nunu blyuu ne̱ de coz nu rnii leey nir.
136 Ornu driib nis urlo̱, gyoow la yac ñi,
gyiꞌ nu de mbecy walagy dey zuub gyidag yu de riidz nu rlyuur.
c Tsade
137 Ñgyoozh, Shuaan na, ru nac ru biñ nu ricy mod nu seꞌñ.
Nunu de riidz nu mniir nu rlagy ñi nu gyicy de̱, ndeꞌ riidz nu laab ñi.
138 Dela mandaar nu mniir nu gyicy de mbecy,
de ndeꞌ riidz nu seꞌñ nunu riidz rishli.
139 Tonaꞌ la rzi lagya̱.
Nañ gal na nu boo la ri nañ lardo̱o̱.
Gun de losaꞌ yu̱u̱ blaa yaa dey de riidz nir.
140 Zeꞌ de riidz nu mniir nu waded la gyicy ru, bruu nap ñi ornu guc preb ñi.
Orzeꞌ ya̱, tub mbecy nu ricy riiñ nir, tonaꞌ la rcaa lagya̱ de riidz zeꞌ.
141 Ya̱ naca̱ tub mbecy shni.
Orzeꞌ de mbecy rgüii naañ dey lo̱.
Zeꞌ ya̱ wagnit lagya̱ de riidz nu mniir nu rlagy ñi nu gyicy de̱.
142 Ru ricy ru mod nu seꞌñ par tub la,
nunu de riidz nu rlyuur ndeꞌ coz rishli.
Orzeꞌ gac gyicy cup de̱ consuel loñ.
143 Tonaꞌ la deet rzaca̱, nunu tonaꞌ la rac nañ lardo̱o̱.
Tees de mandaar nu mniir nu gyicy de̱, ndeꞌ ricy ñi nu zu cyit lagya̱.
144 De mandaar nu mniir nu gyicy de̱, ndeꞌ riidz nu seꞌñ par tubla.
Cuic ru shcab ne̱, gun orzeꞌ gac cyiiñ mbaña̱.
q Cof
145 Ñgyoozh, Shuaan na, ya̱ rnishba̱a̱ lor nu dutuub la lardo̱o̱.
Gyicy ru gal nu mne̱e̱.
Orzeꞌ ya̱ gyicy yaca̱ nu de riidz ni de leey nir.
146 Rnishba̱a̱ lor.
Bloo mbañ ya̱, gun orzeꞌ gyicy yaca̱ nu de riidz nu mniir nu gyicy de̱.
147 Anzir nu grib doo güidz, orzeꞌ gyeshte̱
nu nishba̱a̱ lor nu locyuub ru ya̱.
Orzeꞌ grish lo̱ lo de riidz ni de coz nu mniir nu gyicy ru.
148 Gua la rel zu lagya̱ mbisha̱ nu drusha̱ shcab
nu nac de riidz nu mniir nu waded la gyicy ru.
149 Ñgyoozh, Shuaan na, bzuub gyidag de riidz nu rne̱e̱
nu nac nu zaab rca lar ya̱.
“O” mnii nu cyiiñ mbaña̱
nu nac nu ru rbic ru gyel fushtiz mod nu seꞌñ.
150 De mbecy shiñ ricy, zaab dey icha̱.
Na bi byagaab dey lo̱.
Rila wagyicy cuen yu de riidz nu rlyuur.
151 Zeꞌ gaab ga zeꞌ nu zu̱, zeꞌ zu ru, Ñgyoozh.
De mandaar nu rniir nu gyicy de mbecy, ndeꞌ riidz rishli.
152 Nese bi gulas gud lagya̱ de riidz ni de mandaar nir nu rlagy ñi nu gyicy de mbecy.
Ru bicy ru nu tub la gzu de riidz zeꞌ.
r Resh
153 Bduꞌ cuen de coz nu rzac zi̱.
Orzeꞌ bloo mbañ ya̱,
gun ya̱ wanit lagya̱ de riidz nu rlyuur.
154 Mneꞌ ic ne̱, nunu co nap ru ya̱.
Bicy nu cyiiñ mbaña̱ dub gal mod nu mniir nu waded la gyicy ru.
155 De mbecy a̱ꞌ nap zet zu gyel mbañ lo dey,
gun wacsuub gyidag yu ni de leey nir.
156 Ñgyoozh, Shuaan na, ru tonaꞌ la rashni lagy ru de mbecy.
Orzeꞌ bicy nu cui mbaña̱ nu nac de coz nu seꞌñ nu bloo ic ru.
157 Tonaꞌ la yuꞌ losaꞌ yu̱u̱,
nunu tonaꞌ la yuꞌ mbecy nu ricy deet nu ya̱.
Tees waruu chu̱ lo de riidz nu mniir nu rlagy ñi nu gyicy de̱.
158 Ornu rgüi̱i̱ lo de mbecy wagyicy paa zeꞌ, orzeꞌ riñ lagya̱ dey,
gun wagyicy yac dey nu de mandaar nu mniir nu gyicy de̱.
159 Ñgyoozh, ¡güii!
Ya̱ tonaꞌ la rcaa lagya̱ de riidz nu mniir nu rlagy ñi nu gyicy de̱.
Bloo mbañ ya̱, gun zaab rca lar ya̱.
160 Gun de riidz nir ndeꞌ coz rishli.
De riidz nir rniiñ lac mod na dela coz.
Delañ zuñ par tub la.
S Sin
161 De mbecy lily shet yaa dey ya̱, mas se la la coz bicya̱.
Tees ya̱ rca lagya̱ lo de riidz nir.
162 Ya̱ yet lagya̱ nu nac de riidz nu mniir nu waded la gyicy ru,
gal nu yet lagy tub mbecy ornu gyap yu sheñ gyel nap.
163 Rzi lagya̱ lo dela gyel rguu.
Riñ lagya̱ñ.
Zeꞌ de riidz nu rlyuur, ndeꞌ rcaa lagya̱ looñ.
164 Nañ tub dzi gagy tir ryabica̱ gyel mbecy nir
nu nac de riidz nap nir nu rniiñ lac na dela coz.
165 De mbecy nu yet lagy de riidz nu rlyuur, dub gusht la rcyiiñ dey.
Ni tub la coz wac gyicy ñi nu gyes saay.
166 Ñgyoozh, Shuaan na, ya̱ rleza̱ ru nu co mbañ ru ya̱.
Orzeꞌ gyicy yaca̱ nu mandaar nu mniir nu gyicy de̱.
167 Zuub gyidaga̱ ni de mandaar nu mniir nu gyicy de̱,
nunu yet lagya̱ñ nu dutuub la lardo̱o̱.
168 Ricya̱ de coz nu rniir nu gyicy de̱,
gal nu de coz nu rniir nu rlagy ñi nu gyicy de̱.
Ru rad lagy ru dela coz nu ricya̱.
t Tau
169 Ñgyoozh, Shuaan de̱, bzuub gyidag ornu drishti̱ du̱ ru.
Cuic ru shcab ne̱ dub gal mod nu rnii de riidz nir.
170 Bzuub gyidag ornu rne̱e̱ du̱ ru.
Bloo mbañ ya̱ dub gal nu mniir nu waded la gyicy ru.
171 Ru̱ꞌ driib de riidz nu gyabica̱ gyel mbecy nir,
gun ru rlyuur de leey nir ne̱.
172 Zeꞌ lo lyudza̱ driib de riidz,
riidz nu rniiñ ni de coz nu mniir nu waded la gyicy ru.
Gun dela mandaar nu mniir nu gyicy mbecy, ndeꞌ coz nu seꞌñ.
173 Bzu altant nu locyuub ru ya̱, Ñgyoozh,
gun na bi mneꞌ ica̱ nu gyicy yaca̱ ni de riidz nu mniir nu gyicy de̱.
174 Ñgyoozh, Shuaan na, ric la añ ne̱ nu co mbañ ru ya̱.
Zu cyit lagya̱ nu nac de riidz nu rlyuur.
175 Cuic ru gyel mbañ ne̱.
Gun orzeꞌ gyabica̱ gyel mbecy nir.
Blocyuub ya̱ nu nac de riidz nu seꞌñ nir.
176 Ya̱ rded dza̱ la̱ gal nu rded tub shily bduneꞌ.
Da yub ru ya̱,
gun ya̱ wagnit lagya̱ de mandaar nu mniir nu gyicy de mbecy.