Dzi fert Ñgyoozh, Shuaan na
118
Briic der gras ni Ñgyoozh, Shuaan na,gun mi zeꞌ dzi nap mi.
Mi zeꞌ zaab rca lam den par tub la.
2 De mbecy Israeel rlagy ñi nu nii dey:
“Ñgyoozh zaab rca lam den par tub la”, nii dey.
3 De uz nu zu riiñ lom rlagy ñi nu nii dey:
“Ñgyoozh zaab rca lam den par tub la”, nii dey.
4 De mbecy nu driib zily mi rlagy ñi nu nii dey:
“Ñgyoozh zaab rca lam den par tub la”, nii dey.
5 Lat nu bzac deeta̱, orzeꞌ mnishba̱a̱ lo Ñgyoozh.
Mi zeꞌ bzuub gyidag mi ne̱, nunu blocyuub mi ya̱.
6 Ñgyoozh nac num ya̱.
Orzeꞌ wacchib la̱.
Orzeꞌ ¿la coz gac gyicy nu mbecy ya̱?
7 Ñgyoozh nac num ya̱.
Mi zeꞌ locyuub mi ya̱.
Orzeꞌ gzaca̱ ornu nit lo de losaꞌ yu̱u̱.
8 Dzi zir nap nu gyicy cup na consuel lo Ñgyoozh,
gazeꞌ nu gyicy cup na consuel lo mbecy.
9 Dzi zir nap nu gyicy cup na consuel lom,
gazeꞌ nu gyicy cup na consuel lo de mbecy nu gya zu.
10 De lo la de mbecy nu walab mbecy Israeel, bri loꞌ la dey ya̱.
Orzeꞌ Ñgyoozh blocyuub mi nu bicya̱ gan dey.
11 Dri loꞌ la dey ya̱.
Ca ziꞌl lugaar nu rgüi̱i̱ zeꞌ yuꞌ dey.
Orzeꞌ Ñgyoozh blocyuub mi nu bicya̱ gan dey.
12 Gal nu rabee bez ornu gaꞌl la yad ma,
ni rabee dey ornu bri loꞌy ya̱.
Orzeꞌ bicy mi nu dzach mnit dey
gal nu rac ornu rca gyi ngush.
Blocyuub mi nu bicya̱ gan dey.
13 Fert pshet yaa dey ya̱.
Bi zu̱ la̱ nu nit lo̱.
Orzeꞌ blocyuub mi ya̱.
14 Ya̱ rdula̱ lo Ñgyoozh, biñ nu rbic fers ne̱.
Mi zeꞌ bloo mbañ mi ya̱.
15 De mbecy nim nu yuꞌ nañ yuꞌ negy rbish ti la dey
nu nac nu yet lagy yu nu bicy yu gan gyel yuu.
Orzeꞌ na dey: “Fers ni Ñgyoozh bicy ñi nu bicy den gan.
16 ¡Tonaꞌ la coz ily fers nim!
¡Fers nim bicy ñi nu bicy den gan gyel yuu!” na dey.
17 Lugaar nu ñgyata̱, ca nu mbaña̱,
gun orzeꞌ ne̱e̱ lo de mbecy de coz nu bicy Ñgyoozh.
18 Mas tonaꞌ la coz ily cashtig briic mi ne̱,
tees wansaan mi nu gata̱.
19 Pshaal der roꞌ ni yuꞌ yon ni Ñgyoozh,
gun orzeꞌ chu̱ꞌ nu grica̱ gras nim.
20 Ndeꞌ roꞌ nu chuꞌ de mbecy nu gya lom.
Tub nac ziꞌl de mbecy nu byanap lom gac chuꞌy roꞌ zeꞌ.
21 Ya̱ griib zilya̱ ru, Ñgyoozh, Shuaan na,
gun ru güeñ ru ornu mne̱e̱ du̱ ru.
Orzeꞌ bloo mbañ ru ya̱.
22 Gyitaꞌ nu mneꞌ biryu, byac ñi gyitaꞌ nu ricy zir ñi presis.
23 Ndeꞌ tub coz nu bicy Ñgyoozh.
Orzeꞌ cha du ic na nu nac de coz zeꞌ.
24 Dzi na, nii tub dzi nu caa ic na
nu Ñgyoozh bicy mi gan de losaꞌ yuun.
Orzeꞌ rlagy ñi nu gyet lagy na,
nunu dzi na gzu cyit lagy den.
25 De̱ ya̱ rnishba̱a̱ lor na.
Ñgyoozh, bloo mbañ de̱ ya̱.
Rnishba̱a̱ de̱ lor nu locyuub ru de̱ nu gyicya̱ gan.
26 Ñgyoozh nap gyicy num yu nu gzu nez mi nu cyid.
Diñ na lom nu nap gyicy num de ru nese gal nañ yuꞌ yon nim.
27 Ñgyoozh mi zeꞌ Shuaan na.
Mi zeꞌ lyuum yaa lo den.
Ornu zuub ru gyiꞌ saꞌ nim,
orzeꞌ shes nañ yaar nu yaa yag
nu cha nur ñii gal zeꞌ nu ca nguaz,
zeꞌ nu zu cuug nu dric na gun lom.
28 Ru nac ru Ñgyoozh ne̱, nunu ru grica̱ gras nir,
nunu ne̱e̱ lo de mbecy nu ru dzi zily nac ru.
29 Briic der gras ni Ñgyoozh, gun dzi nap mi,
nunu zaab rca lam den par tub la.