Ñgyoozh nin zum gyibaa
115
Ñgyoozh, Shuaan na, gyed gyel mbecy ni ru.Cueꞌ gyed gyel mbecy ne̱ de̱ ya̱.
Gun ru zaab rca lar de mbecy,
nunu ricy paar nu nac dey.
2 Orzeꞌ ¿lagu cugyiꞌ de mbecy nu a̱ꞌ yuꞌ lo Ñgyoozh?
Orzeꞌ nii dey: “¿Ca zu Ñgyoozh ni de ru?” nii dey.
3 Ñgyoozh ni de ub na zum gyibaa,
nunu ricy mi la ziꞌl coz nu rlagy mi.
4 Zeꞌ ñgyoozh ni de yu zeꞌ,
ndeꞌ tub nab nu byaañ nu plat gal nu or.
Nac ñii coz nu bzaa mbecy.
5 Zub ruꞌñ, tees wagac niiñ.
Zub urloñ, tees wagac zac ñi.
6 Zub gyidag ñi, tees wagyeñ ñi.
Zub gyidiꞌñ ñi, tees wac chuꞌ gyidiꞌñ ñi la coz.
7 Zub yaañ, tees wagac cuꞌ yaañ la coz.
Zub gyiꞌñ, tees wagac zañ.
Nunu ni tub riidz wagac ruu gyeryeñ ñi.
8 De nab zeꞌ tub ziꞌl nañ nu de mbecy nu bzaañ.
Tub ziꞌl nañ nu de mbecy nu ricy cup consuel loñ.
9 De ru mbecy Israeel, bicy cup der consuel lo Ñgyoozh, Shuaan na,
gun mi zeꞌ locyuub mi de ru,
nunu zaab ic mi de ru, gun orzeꞌ se la la coz zac der.
10 De ru uz nu zu riiñ lo Ñgyoozh, bicy cup der consuel lom,
gun mi zeꞌ nac mi biñ nu locyuub de ru,
nunu zaab ic mi de ru, gun orzeꞌ se la la coz zac der.
11 De ru mbecy nu driib zily Ñgyoozh, bicy cup der consuel lom,
gun mi zeꞌ nac mi biñ nu locyuub de ru,
nunu zaab ic mi de ru, gun orzeꞌ se la la coz zac der.
12 Ñgyoozh ca ic mi de ub na, nunu nap ricy num den.
Nap gyicy num de mbecy Israeel,
nunu nap gyicy num de uz nu zu riiñ lom.
13 Nap gyicy num de mbecy nu rdzib lagy lom,
mas nac yu mbecy shni o mbecy lily.
14 Orzeꞌ Ñgyoozh cuic mi zañ famil ni der,
nunu cuic mi zañ famil ni iꞌñ der.
15 Ñgyoozh biñ nu psaꞌ lagy gyibaa nu gyishlombecy,
nap gyicy num der.
16 Gyibaa, ndeꞌ coz ni ub lam.
Zeꞌ gyishlombecy ii, nii briic mi ni de mbecy.
17 De mbecy nu ya zeꞌ nu yuꞌ de mbecy nu bi gut, wacaꞌ griib zily dey Ñgyoozh.
18 Zeꞌ de ub na gyabic na gyel mbecy nim na la, gal nu par tub la.
¡Gyabic na gyel mbecy ni Ñgyoozh!