Dzi coz ily nac Ñgyoozh, Shuaan na
116
Ya̱ rca̱ Ñgyoozh, Shuaan na,gun mi zeꞌ reñ mi ornu rnishba̱a̱ lom,
2 gun rzuub gyidag mi ne̱ ornu rne̱e̱ du̱m.
Ndeꞌ nu ya̱ gredza̱m dub laa lat nu mbaña̱.
3 Bzu̱ lo rishdzidz nu bi gat la̱.
Ornu mnii to̱o̱ nu gya̱ gyerbaa, orzeꞌ dzi psug ica̱.
Tonaꞌ la deet guc nañ lardo̱o̱.
Tonaꞌ la gudziba̱.
4 Gazeꞌ nu bredza̱ Ñgyoozh, Shuaan na.
Orzeꞌ ya̱ mne̱e̱ lom: “Ya̱ rnishba̱a̱ lor, Shuaana̱,
nu co mbañ ru ya̱”, mne̱e̱.
5 Ñgyoozh, Shuaan na, rashni lagy mi den,
nunu ricy mi coz nap num den,
nunu razañ lagy mi de ub na.
6 Mi zeꞌ rzaab ic mi de mbecy shni̱,
gun cueꞌ nu zac de̱ ni tub la coz.
Tiem nu wacyiiña̱, orzeꞌ bloo mbañ mi ya̱.
7 “Lardo̱o̱, na bish cya zeꞌ nu zu lagy ru tuubaꞌ tir”,
gun Ñgyoozh tonaꞌ la nap bicy num ub na.
8 Ornu bi zu̱ la̱ nu gata̱, Ñgyoozh bloo mbañ mi ya̱.
Orzeꞌ bicy mi nu guca̱ nu rduna̱,
nunu ricy mi nu gyicya̱ gan.
9 Orzeꞌ chesa̱ zeꞌ nu zu Ñgyoozh, zeꞌ nu yuꞌ de mbecy mbañ.
10 Nunu zaab ricy cup la̱ consuel lom,
mas tiem nu mne̱e̱ lom: “Tonaꞌ la deet guc nañ lardo̱o̱”, mne̱e̱.
11 Nunu zaab ricy cup la̱ consuel lom, mas tiem nu gudziba̱.
Orzeꞌ mne̱e̱ lom: “Wac gyicy cupa̱ consuel lo ni tub la mbecy.”
12 ¿La coz gac grica̱ ni Ñgyoozh nu nac de coz nap nu bicy num ya̱?
13 Ya̱ grica̱ ñup ni urbyay nu ca lo cuen nu gric na
ornu dric den gras nim nu nac nu bloo mbañ mi den.
14 Lat nu yuꞌ tublaazh de mbecy nim,
orzeꞌ grica̱ coz nu mne̱e̱ nu grica̱ nim.
15 Tonaꞌ la shni rac nañ lardoo Ñgyoozh,
ornu rat tub mbecy nim.
16 Ñgyoozh, Shuaan na, ya̱ naca̱ tub mbecy nu ricy de coz nu ru rniir.
Ricya̱ de coz nu rniir dub gal na mod nu bicy ñaꞌ ne̱.
Orzeꞌ ru bicy ru nu bruu napa̱.
17 Rica̱ tub gun nir par nu gabe nu drica̱ gras nir,
nunu rne̱e̱ du̱ ru, Shuaan na.
18 Nunu gyicy yaca̱ nu de riidz nu mne̱e̱ nu waded la gyicya̱
lat de mbecy nir ornu yuꞌ tublaazh dey.
19 Ni gyicya̱ lo liꞌ ni yuꞌ yon nir nu ri gazel gyedz Jerusaleeng.
¡Gyabic den gyel mbecy nim!