Ornu bruu de mbecy Israeel Egipto
114
Ornu de mbecy Israeel,
de nez gyitoo Jacob,
ornu bruu dey Egipto,
tub lugaar nu walab ledz dey,
2 orzeꞌ de lugaar ni Juda byac ñi zeꞌ nu driib zily dey Ñgyoozh.
Orzeꞌ de yu ni de mbecy Israeel byac ñi lugaar nu briib ic mi.
3 Ornu Nisyudoo Ña bzaac ñi de mbecy Israeel,
orzeꞌ bruu chuñ lo dey.
Zeꞌ nis ni gyoow Jordaang bya ich ñi lo dey,
yaañ par zeꞌ nu bruuñ.
4 De too bicy nu de ngush bzab ñi gal nu rzab de shily nu de chiib ornu rdzib ma.
5 Nisyudoo,
¿la gyiꞌ,
la coz bicy ñi nu bruu chur?
Ru gyoow Jordaang,
¿la gyiꞌ,
la coz bicy ñi nu bishcyar par ic?
6 De ru bicy,
¿la gyiꞌ,
la coz bicy ñi nu bzab ru gal nu rzab shily nu chiib?
7 Ru,
gyishlombecy,
gush bis lat nu zur lo Ñgyoozh,
Shuaan na,
biñ nu briib zily gyitoo Jacob.
8 Mi zeꞌ bicy mi nu zeꞌ nu ca gyitaꞌ ily byac ñi gyel ni nis.
Bicy mi nu de nañ cuit yu nu ga ub gyitaꞌ la byac ñi zeꞌ nu driib nis.