Gyabic na gyel mbecy ni Ñgyoozh gun dzi nap mi
113
¡Gyabic na gyel mbecy ni Ñgyoozh,
Shuaan na!
De ru mbecy nu ricy de coz nu rniim,
byabic der gyel mbecy nim.
2 Byabic der gyel mbecy nim na la,
gal nu par dub laa tiem.
3 Nese gal zeꞌ nu driib doo güidz,
nu gashtal zeꞌ nu rza doo güidz,
byabic der gyel mbecy nim.
4 Gun Ñgyoozh riib ic mi de lo la nac mbecy.
Nunu rabee de gyel lily nim gashtal baa.
5 Sac ni tub la cyu nu saap Ñgyoozh,
Shuaan na,
biñ nu driib zily na.
Mi zeꞌ gri beem gashtal zeꞌ nu zub mi gyibaa.
6 Zeꞌ rzaab tiily mi nu rgüiim par baa nu gyishlombecy ii.
7 Nunu rshes sum de mbecy zi nu gyel tir la zu.
Nunu rzu nap mi zeꞌ nu rzac deet dey.
8 Ricy mi nu gac nu de yu zeꞌ de mbecy lily.
Gac nu dey de mbecy nu ricy ñi presis ledz yu.
9 De biñ mñaa nu sac iꞌñ,
gyicy mi nu gad iꞌñ de mi zeꞌ.
Orzeꞌ de mi zeꞌ gyet lagy dem nu nac nu gyicy cup mi famil.
¡Gyabic den gyel mbecy ni Ñgyoozh,
Shuaan na!