Dzi ni mbecy nu dzib lagy lo Ñgyoozh
112
¡Gyabic den gyel mbecy ni Ñgyoozh,
Shuaan na!
Dzi ni de mbecy nu rdzib lagy lo Ñgyoozh,
yu nu yet lagy zuub gyidag riidz nim.
2 Gruu nap dela coz nu gyicy de famil ni dey ledz na,
de yu nu gruu zac par lo.
De yu zeꞌ dzi ni dey.
3 Tonaꞌ la chuꞌ gyel nap nañ yuꞌ ni dey,
nunu chuꞌ gyel nap zeꞌ par tub la.
4 Yu zeꞌ nay gal nu na tub gyi nu rbic yaa zeꞌ nu cow lat de mbecy nap.
Dub laa tiem gashni lagy yu mbecy nu nap gyicy nu de losaꞌy,
mbecy nu gyicy mod nu seꞌñ.
5 Dzi ni mbecy benu nu dutuub la lardooy cuic yu tiñ nu co losaꞌy.
Yu zeꞌ ricy yu dalje̱z mod nu seꞌñ.
6 Gun yu nu ricy paa nu de riidz ni Ñgyoozh,
rila waruu fals de coz nu gyicy yu.
Nunu ca ic mbecy yu dub laa tiem.
7 Yu zeꞌ wachib yu nu ruꞌña raso̱o̱ a̱ꞌ nap.
Fert yu nañ lardooy,
nunu ricy cup yu consuel lo Ñgyoozh.
8 Fert yu nañ lardooy,
nunu wachib lay.
Rad lagy yu nu waded la zac yu nu nit lo de losaꞌ yuuy.
9 Nu dutuub la lardooy cuic yu tiñ co mbecy nu ricy falt ni.
Rila wachecay nu ricy yu de coz nap.
Ndeꞌ nu rca lagy de mbecy loy.
10 Ornu rzac de mbecy a̱ꞌ nap de coz nu ricy yu,
orzeꞌ tonaꞌ la nu rzi lagy dey loy.
Rucuaꞌ gyid ruꞌ la dey nu rzi lagy yu,
tees se la coz gac gyicy dey.
Gun dela coz nu rgyish loy nu gyicy yu rila wacyuu nap ñi ni dey.