Gyabic na gyel mbecy ni Ñgyoozh nu nac de coz nu ricy mi
111
¡Gyabic den gyel mbecy ni Ñgyoozh,
Shuaan na!
Rica̱ gras nim nu dutuub la lardo̱o̱ lat de mbecy nu ricy paa nim.
2 Tonaꞌ la coz ily bicy mi.
De mbecy nu yet lagy de coz nu ricy mi,
de yu zeꞌ yet lagy yu
syaꞌy de riidz ni de coz ily nu ricy mi.
3 Dela coz nu ricy mi ricy ñi nu rca lagy de mbecy lom,
nunu de ndeꞌ ricy ñi nu rabee nu nac mi rey nu dzi fert.
Mi zeꞌ nap ricy num de mbecy par tub la.
4 Nunu ricy mi nu rila wanit lagy den de coz ily nu ricy mi.
Nap ricy num den,
nunu rashni lagy mi den.
5 Rgoow mi de mbecy nu rdzib lagy lom.
Rila wannit lagy mi de riidz nu mniim nu waded la gyicy mi.
6 Bicy mi nu gud lagy de mbecy nim
nu cyiiñ mi gyicy mi la ziꞌl coz ily,
ornu briic mi yu ni de reñaꞌ gyedz nu gani de mbecy nim.
7 Ricy paam lat de coz nu ricy mi,
nunu ricy mi mod nu seꞌñ,
nunu de ub na gac gyicy cup na consuel lo de coz nu rniim nu gyicy na.
8 Gun de riidz nu rniim ndeꞌ zuñ par tub la.
Nunu laab mi bicy mi de coz rishli,
nunu bicy mi de coz nu seꞌñ ornu mniim de riidz zeꞌ.
9 Bicy mi nu bla de mbecy nim.
Orzeꞌ bicy num dey tub trat nu gzu par tub la.
Tonaꞌ la nu yon mi.
Tonaꞌ la dzib lagy den lom.
10 Ornu de mbecy dzib lagy dey lo Ñgyoozh,
orzeꞌ gzub gyiꞌñ nu gac yu mbecy nu yuꞌ shcab ni.
De yu nu gzuub gyidag de coz nu rniim
gad lagy dey lac mod gyicy yu.
Gyabic den gyel mbecy nim par tub la.