Riidz ni tub mbecy nu rzac deet: tub riidz ni Dabi
109
Ñgyoozh biñ nu driib zilya̱, cueꞌ gyicy go̱ꞌr ub ru ornu rne̱e̱ du̱ ru.2 Gun de mbecy a̱ꞌ nap, nu de mbecy rguu rzuub ruꞌ dey ya̱.
Rguu dey ornu rzat yu ya̱.
3 Rnii dey de riidz shiñ na nu nac ya̱.
Driib dey cyi fals to̱o̱ mas ya̱ se la la coz bicya̱.
4 Mas ya̱ rca̱ dey, tees de yu zeꞌ za dey contr ne̱.
Orzeꞌ ya̱ rne̱e̱ du̱ ru Ñgyoozh nu nac dey.
5 Ornu ya̱ nap ricy du̱ dey,
orzeꞌ de yu zeꞌ shiñ ricy nu dey ya̱.
Ornu ya̱ rca̱ dey, orzeꞌ rzi lagy dey lo̱.
6 Ñgyoozh, bloo su tub mbecy a̱ꞌ nap nu gri beey ni dey.
Orzeꞌ laab mbecy nu cha faboor niy, griib yu cyi too dey.
7 Ornu gri bee dey niy, orzeꞌ rlagy ñi nu gruu fals yu.
Rlagy ñi nu gruu fals yu nu nac de riidz nu niiy ornu cay ub yu.
8 Nunu rlagy ñi nu cueꞌ cyiiñ tuñ yu gyishlombecy ii.
Orzeꞌ rlagy ñi nu tuubaꞌ mbecy gyash yu de gyel nap niy.
9 Rlagy ñi nu gyiyeeñ byud mñaay,
orzeꞌ gzeeñ yu de yu nguzh zi.
10 Orzeꞌ chesa dza la de iꞌñ yu, nunu cyiñ dey gun.
Nunu ornu bi mnit lo yuꞌy,
orzeꞌ rlagy ñi nu cyuu nu mbecy dey lugaar zeꞌ.
11 De mbecy nu yuꞌ diꞌñ yu lo,
de yu zeꞌ rlagy ñi nu gyash yu dela suuy.
Zeꞌ de mbecy nu rila a̱ꞌ yuꞌ loy,
de yu zeꞌ gyash yu dela coz nu bicy yu gan lat nu bicy yu riiñ.
12 Rlagy ñi nu ni tub la mbecy cueꞌ gyicy dey coz nap nuy yu.
Ni cueꞌ gashni lagy mbecy de yu nguzh zi nu gzeeñ yu.
13 Rlagy ñi nu gat de iꞌñ yu nu gruu zac par lo.
Orzeꞌ de mbecy nu gruu zacaꞌ par lo,
ni wabic dey raso̱o̱ cyu mbecy guc de yu zeꞌ.
14 Nunu cueꞌ nit lagy Ñgyoozh de coz a̱ꞌ nap nu bicy de too bel niy.
De cyi nu bicy ñaay,
mas lac ruu tees cueꞌ gyicy sulagy Ñgyoozh ni cyi zeꞌ.
15 Rlagy ñi nu zu la de cyi zeꞌ lo Ñgyoozh par tub la.
Zeꞌ de ub yu, rlagy ñi nu nit lagy mbecy ti bzu dey gyishlombecy ii.
16 Gun mbecy zeꞌ wannii tooy nu gashni lagy yu de losaꞌy,
sinu bzab yu ich de mbecy zi,
nu de mbecy nu ricy falt coz ni,
nu de mbecy wacyiiñ.
Bzaab yu ich de yu zeꞌ gal biit lay dey.
17 Dzi bizh yu nu rzaa lagy yu ni mbecy.
Ndeꞌ nu ub yu rlagy ñi nu gal yu duu zeꞌ.
Wagyet lagy yu nu cyiñ yu lo Ñgyoozh
nu nap gyicy num de losaꞌy.
Ndeꞌ nu rlagy ñi nu cueꞌ cyiñ de mbecy lo Ñgyoozh
nu nap gyicy num ub yu.
18 Dela cuerp niy gyow lañ nu gyel byanduu niy
gal nu noow cuerp niy nu shab yu.
Chayoꞌ duu cuerp niy gal nu ricy nis nu roꞌy.
Nunu chayoꞌñ gal nañ rit lay
gal nu ricy asecy nu rgaab yaa mbecy.
19 Gal nu rsoow shab yu cuerp niy,
niꞌ ziꞌl soow duu zeꞌ cuerp niy,
nunu gyash nicy ñi nañ yu gal nu ricy sinch.
20 Ñgyoozh, Shuaan na, ni mod cuic ru cashtig ni de losaꞌ yu̱u̱, de yu nu driib gyidza to̱o̱.
21 Zeꞌ ru Ñgyoozh, Shuaan de̱, nap gyicy nur ya̱,
gun orzeꞌ ca lagy de mbecy lor.
Bloo mbañ ya̱, gun ru dzi nap ru, nunu rcar ya̱.
22 Gun ya̱ naca̱ mbecy zi,
nunu naca̱ mbecy nu ricy falt coz ni,
nunu dzi rac nañ lardo̱o̱.
23 Rzaca̱ gal nu rzac gaꞌl ornu bi yecheñ.
Sñuu ga ziꞌl nu nita̱.
Rzaca̱ gal nu rzac gushagy ornu rneꞌ bi ma.
24 Rsuun lañ ruꞌ tiba̱ nu nac nu wagda̱w gyit,
nunu tonaꞌ la gugyidza̱.
25 Ornu rzac de mbecy ya̱, orzeꞌ rigy nu naañ dey ya̱,
nunu se nu rgyib ziꞌl ic dey nu rgubdzaay ya̱.
26 Ñgyoozh, Shuaan na, blocyuub ya̱.
Bloo mbañ ya̱ nu nac nu zaab rca lar ya̱.
27 Bicy nu gad lagy de losaꞌ yu̱u̱ nu laab ru biñ nu bloo mbañ ya̱.
28 Mas de yu zeꞌ rzaa lagy dey ne̱, tees ru nap ricy nur ya̱.
Zeꞌ de yu zeꞌ gruu gyel mbecy ni dey.
Zeꞌ ya̱, tub mbecy nu ricy de coz nu rniir, yet lagya̱.
29 Rlagy ñi nu gruu gyel mbecy ni de losaꞌ yu̱u̱.
Gruu toꞌ lo dey.
Orzeꞌ gyel toꞌ lo ni dey gabeñ
gal nu rabee shees nu caa yeñ yu.
30 Ya̱ tonaꞌ la drica̱ gras ni Ñgyoozh, Shuaan na.
Driib zilya̱m lat nu yuꞌ tublaazh de mbecy.
31 Gun mi zeꞌ zam faboor ni de mbecy zi,
nunu mi zeꞌ rboo mbañ mi dey yaa de mbecy nu rnii nu rlagy ñi nu gat yu.