Ñgyoozh co mbañ mi de mbecy nim: tub riidz ni Dabi
108
Ñgyoozh lo ru ricy cupa̱ consuel nañ lardo̱o̱.Ndeꞌ nu ryabica̱ gyel mbecy nir lat nu rdula̱ lor.
Orzeꞌ ya̱ mne̱e̱ nañ lardo̱o̱: “Briish yaa.
2 Bzu lily nu de coz nu ricy nu de musiic riiñ,
gun gyabic na gyel mbecy ni Ñgyoozh.”
Orzeꞌ bi brisha̱ yaa anzir nu grib doo güidz
nu zu bicha̱ nu nac mi.
3 Ñgyoozh, Shuaan na, lat de mbecy nir ya̱ drica̱ gras nir.
Nunu rdula̱ lor lat de mbecy nu druu reñ ga la lugaar.
4 Ru zaab rca lar de mbecy.
Gal nu tonaꞌ la gya baa,
ni coz ily zir rcar de mbecy.
Gal nu tonaꞌ la nu gya zaab za baa,
niꞌ ziꞌl tant ricy paar nu de mbecy.
5 Bicy nu gabe nu dzi zily nac ru baa,
nunu blyuu de gyel lily nir dutuub la gyishlombecy.
6 Bloo mbañ de̱ nu nac nu dzi fert ru.
Bicy gal nu bdiñ de̱ lor.
Orzeꞌ de̱ ya̱, mbecy nu dzi rcar, gruu nap de̱.
7 Ñgyoozh mniim nese gal nañ yuꞌ yon nim.
Orzeꞌ nam: “Ya̱, nu nac nu dzi ferta̱,
orzeꞌ lewa̱ de yu nu ricy cup gyedz Siquem,
nunu lewa̱ de yu nu ri rup chu laꞌ laa cuit gyerlas ni Sucot.
Orzeꞌ grica̱ de ndeꞌ ni de mbecy ne̱.
8 De lugaar ni Galaad, ndeꞌ coz ne̱.
Niꞌ ziꞌl de lugaar ni Manasés.
Zeꞌ de lugaar ni Fraiing, ndeꞌ nañ gal nu na cyug nu rzuub to̱o̱ ornu rza̱ gyel yuu.
Zeꞌ de lugaar ni Juda, ndeꞌ nañ gal nu na bashto̱o̱ nu nac muesht nu naca̱ biñ nu riib ic.
9 De lugaar ni Moab, ndeꞌ nañ gal nu na cyug nu rna̱a̱.
Zeꞌ Edom, ndeꞌ nañ gal nu na lugaar nu rzeeña̱ gyid laba̱.
Nunu zeꞌ rishti̱ du̱ de mbecy Filisteo,
nu bicya̱ gan gyel yuu”, nam.
10 Ñgyoozh, ¿cyu cha nu ya̱ gyedz nu zu loꞌ nu dzi fert byaa, benu walab ru?
¿Cyu cha nu ya̱ lo yu ni de mbecy Edom, benu walab ru?
11 ¿A bzu chur de̱ ya̱?
¿A waya nu gaꞌr de soldad ne̱ de̱?
12 Blocyuub de̱ ya̱ lat gyel yuu ornu shet ya̱a̱ de̱ de losaꞌ yu̱u̱,
gun se la la cyiiñ ñi benu mbecy ziꞌl locyuub yu de̱ ya̱.
13 Tees benu ru locyuub ru de̱ ya̱ Ñgyoozh,
orzeꞌ waded la gyicy de̱ gan.
Ru gyicy dat ru de losaꞌ yu̱u̱ de̱.