Libro 5
Ñgyoozh zaab rca lam mbecy
107
Briic der gras ni Ñgyoozh, Shuaan na,gun mi zeꞌ dzi nap mi.
Mi zeꞌ rcam de mbecy par tub la.
2 De ru mbecy nu bloo mbañ mi, mnii der de riidz ii:
nu mi zeꞌ bloom de ru yaa de losaꞌ yuur.
3 Nunu bicy mi nu bish cya der ledz na,
ornu gua der pres ledz reñaꞌ mbecy nu yuꞌ dutuub la gyishlombecy.
4 Yuꞌ mbecy gusa dza lay de lugaar ub zi.
Wangyad nez ni dey nu ñgyay tub gyedz nu ñcyiiñ yu.
5 Se nu ñgyat ga ziꞌl dey nu wangad coz nu gow yu.
Ni wangad nis goꞌy.
6 Lat nu bzac deet dey, orzeꞌ mnishbaay lo Ñgyoozh.
Orzeꞌ bloo mbañ mi dey lat de coz deet nu bzac yu.
7 Orzeꞌ briic mi tub nez nu li za nu cha dey tub gyedz nu cyiiñ yu.
8 Orzeꞌ rlagy ñi nu cuic dey gras nim,
gun zaab rca lam dey,
niga nu nac de coz ily nu ricy mi nu de mbecy nu yuꞌ gyishlombecy.
9 Gun mi zeꞌ ricy mi nu ryel ni de mbecy nu rbigy nis.
De mbecy nu ran, ricy mi nu rdzaa nañ dey nu de coz nap nu row yu.
10 Yuꞌ gaꞌ mbecy nu gusay zeꞌ nu cow wiiñ la.
Guc dey pres.
Pcyiig mbecy yu nu caden.
11 Ni bzac dey, gun wangalagy yu gyicy yu
gal nu mnii Ñgyoozh, biñ nu gac gyicy dela coz,
nunu bzuub yaa dey de riidz nu mniim nu gyicy yu.
12 Blazh la baloor ni dey nu nac de riiñ fert nu ricy yu.
Mas wes saa dey, tees se cyu la blocyuub yu.
13 Lat nu bzac deet dey,
orzeꞌ mnishbaay lo Ñgyoozh Shuaan na.
Orzeꞌ mi zeꞌ bloo mbañ mi dey lat de coz deet nu bzac yu.
14 Orzeꞌ bloom dey zeꞌ nu cow wiiñ la,
nunu pshiꞌñ mi caden nu cacuñ dey.
15 Ndeꞌ nu rlagy ñi nu cuic dey gras nim nu nac nu zaab rca lam yu,
nunu nu nac de coz ily nu bicy num dey.
16 Mi zeꞌ laꞌm roꞌ nu byaa nu gyiib cach,
nunu sug mi rej gyiib.
17 Yuꞌ mbecy gurat yu nu nac cyi nu bicy yu,
nunu rzac ziy nu nac de coz shiñ na nu ricy yu.
18 La ziꞌl coz nu rad row dey, riñ lagy dey ñi.
Orzeꞌ se ñumiiñ ziꞌl bi ñgyat yu.
19 Lat nu bzac deet dey,
orzeꞌ mnizhbaay lo Ñgyoozh, Shuaan na.
Mi zeꞌ bloo nap mi dey lat de coz deet nu bzac yu.
20 Orzeꞌ mniim lo dey.
Orzeꞌ bicy yac mi dey.
Nunu bloo nap mi dey ruꞌ gyerbaa.
21 Ndeꞌ nu rlagy ñi nu cuic dey gras ni Ñgyoozh, Shuaan na,
nu nac nu zaab rca lam dey,
nunu nu nac de coz ily nu ricy mi nu de mbecy.
22 Rlagy ñi nu cuic dey gun lom,
par nu gabe nu rbic dey gras nim,
nunu lat de riidz nu rul yu,
dub gal rii la lagy dey zat yu de coz nu bicy mi.
23 Yuꞌ gaꞌ mbecy nu gusay lo nisyudoo, nu bicy dey dalje̱z.
24 De yu zeꞌ bzaac dey de riiñ nu bicy Ñgyoozh,
nunu bzaac dey de coz ily nu ricy mi lo nisyudoo.
25 Ornu mi zeꞌ mniim, orzeꞌ tonaꞌ la gyey bi ily bruu.
Coz ily bicy ñi lo nis.
26 Orzeꞌ nis zeꞌ mneꞌñ dey gal baa.
Orzeꞌ bet lag dey gal zeꞌ nu gyi zir ni nisyudoo.
Dzi coz ily bzu dey lo rishdzidz.
Orzeꞌ blazh la consuel ni dey
27 Na ornu bruu dey,
orzeꞌ za dzaa lay gal nu ricy mbecy rzugy.
Mas nap rad lagy dey mod nu ricy mbecy lo nisyudoo.
Tees rila wancyiiñ dey.
28 Lat nu bzac deet dey,
orzeꞌ mnishbaay lo Ñgyoozh, Shuaan na.
Mi zeꞌ bloo mbañ mi dey lat nu bzac deet yu.
29 Orzeꞌ bicy mi nu guri gyey bi zeꞌ,
nunu bicy mi nu guca de nguuly nu rded lo nisyudoo.
30 Orzeꞌ bet lagy dey nu gusu ri lo nisyudoo.
Orzeꞌ Ñgyoozh bicy mi nu bri dey gal ruꞌ yu wach,
laab zeꞌ lugaar nu psaap dey.
31 Rlagy ñi nu cuic dey gras ni Ñgyoozh, Shuaan na,
nu nac nu zaab rca lam dey,
nunu nu nac de coz ily nu ricy num de mbecy.
32 Rlagy ñi nu griib zily dey mi lat de mbecy nu yuꞌ tublaazh,
nunu rlagy ñi nu gyabic dey gyel mbecy nim,
lat de fushtiz ornu yuꞌ tublaazh dey.
33 Ñgyoozh bicy mi nu bigy nis de gyoow.
Orzeꞌ byac ñi gyerlas wach.
Zeꞌ de zeꞌ nu driib nis, bicy mi nu bigy ñi.
Orzeꞌ niꞌ ziꞌl byac ñi lugaar wach.
34 Bicy mi nu de yu nap byac ñi yu riꞌ.
Byac ñi yu wacyiiñ
nu nac de coz shiñ na nu bicy de mbecy nu rcyiiñ de lugaar zeꞌ.
35 Ze de lugaar wach, Ñgyoozh bicy mi nu byac ñi gyel ni nis.
De lugaar nu sac nis, bicy mi nu byac ñi zeꞌ driib nis.
36 Orzeꞌ de lugaar zeꞌ bzaan mi nu guchuꞌ de mbecy ran.
Orzeꞌ zeꞌ bzaa dey gyedz nu cyiiñ yu.
37 Orzeꞌ ptush las dey mbigy trig,
nunu mnuuz dey lyucy urbyay.
Orzeꞌ sheñ cosech pteꞌ dey.
38 Nap bicy num de yu zeꞌ nim.
Orzeꞌ tonaꞌ la byañ dey.
Nunu wansaan mi nu gyet naañ de chigud ni dey.
39 Na ornu bya i zi de mbecy ni Ñgyoozh
nu gut yu gyiꞌ nu pshet zi mbecy dey,
nunu bloo dey gyel mbecy niy,
nunu bicy deet dey nuy yu,
40 orzeꞌ Ñgyoozh briic mi cashtig ni de mbecy nu pshet zi dey.
Orzeꞌ bicy mi nu gusa dza la dey de lugaar ub zi, de lugaar nu sac nez.
41 Zeꞌ de mbecy nu ricy falt de coz ni, blocyuub mi dey nu wazac deet yu.
Bicy mi nu byañ iꞌñ dey gal nu ryañ de bañcyug niy.
42 Ornu rzac de mbecy nap de nu ndeꞌ, orzeꞌ yet lagy dey.
Zeꞌ de mbecy a̱ꞌ nap ryoow la ruꞌ dey wanii gaꞌy.
43 De mbecy nu yuꞌ shcab ni, rlagy ñi nu nii tooy nu nac de coz ii.
De mbecy rlagy ñi nu ca ga ic dey nu Ñgyoozh zaab rca lam de mbecy.