Rnid ruꞌ mbecy Israeel; zeꞌ Ñgyoozh nap mi
106
Byabic der gyel mbecy ni Ñgyoozh Shuaan den.Briic der gras nim, gun dzi nap mi.
Mi zeꞌ zaab rca lam de mbecy par tub la.
2 Warusu gaꞌ cyu nu yuꞌ shcab ni nu shaal yu de coz ily nu ricy mi.
Warusu gaꞌ cyu nu gac gyabic gyel mbecy nim gal nu yad ñi.
3 Dzi ni de mbecy nu rzuub gyidag de riidz nim,
de mbecy nu ricy de coz nu seꞌñ dub laa tiem.
4 Ñgyoozh, Shuaan na, gyezaꞌ lagy ru ya̱
ornu locyuub ru de mbecy nir.
Niꞌ ziꞌl ya̱ co mbañ ru ornu co mbañ ru de yu zeꞌ,
5 gun orzeꞌ zaca̱ nu chup de mbecy nir tuubaꞌ tir.
Orzeꞌ gyet lagya̱ tublaazh la nu de yu zeꞌ.
Orzeꞌ gyicy lilya̱ nu tublaazh la nu deꞌ zir mbecy nir nu nac de coz ily nu ricy ru.
6 Niꞌ ziꞌl de̱ ya̱ bicy de̱ cyi gal nu bicy de too bel ne̱ de̱.
Bicy de̱ de coz a̱ꞌ nap, nunu guꞌ falt ne̱ de̱.
7 Lat nu pcyiiñ de gyitoo bel ne̱ de̱ Egipto,
rila wangyet lag dey cuen de coz ily nu bicy ru, Ñgyoozh.
Mnit lagy dey nu zañ tir bicy ru nu gabe nu dzi rcar yu.
Ru, biñ nu gya zir zu, bishcya dey ich ru ruꞌ Nisyudoo Ña.
8 Lugaar zeꞌ bloo mbañ Ñgyoozh dey,
gun orzeꞌ gyed gyel mbecy nim,
nunu zac de mbecy nu dzi fert mi.
9 Orzeꞌ bicy mi mandaar lo nisyudoo.
Orzeꞌ bigy ñi.
Orzeꞌ byaal nez nu bded de mbecy nim lo yu wach.
10 Ni mod bloo mbañ mi dey yaa de mbecy nu rzi lagy loy.
Bloom dey yaa de losaꞌ yuuy.
11 Zeꞌ de losaꞌ yuuy, gut dey lo nis.
Ni tub yu wancyuu mbañ yu.
12 Gazeꞌ nu de mbecy nim guña lagy dey ni de riidz nu mniim.
Orzeꞌ biily dey nu byabic yu gyel mbecy nim.
13 Despuees, orzeꞌ dzach mnit lagy dey de coz nu bicy mi.
Nunu wancuez dey nu cyiñ yu consef lom.
14 Tonaꞌ la bzaab lagy dey de coz nu rlagy yu gow yu
lat nu gusa dey de lugaar ub zi.
Orzeꞌ bicy dey preb mi,
ben a gyicy mi gal nu rlagy yu lat nu gusa dey ngush.
15 Orzeꞌ briic mi de coz nu bdiiñ dey lom.
Tees orzeꞌ bzeed mi tub güii dañ lat dey.
16 Na lat nu pcyiiñ dey la be dzi tub lugaar ub zi,
orzeꞌ bicy saap lagy dey ich Moisees nu Aroong,
de yu nu bzu riiñ ni Ñgyoozh.
17 Orzeꞌ byaal lo yu.
Orzeꞌ bdab ñii Datan.
Niꞌ ziꞌl bdab ñii Abiram gal nu dela mbecy nu nac nuy.
18 Orzeꞌ Ñgyoozh bzeed mi gyi too de losaꞌy.
Orzeꞌ wic dela mbecy a̱ꞌ nap zeꞌ.
19 Na too bicy Horeb bzaa dey tub biser or.
Orzeꞌ briib zily dey ma.
20 Guca dey nu driib zily yu Ñgyoozh, biñ nu gya zir zu,
par nu griib zily dey tub nab chigud nu row gyizh.
21 Mnit lagy dey Ñgyoozh, biñ nu bloo mbañ yu,
nu nac de coz ily nu bicy mi Egipto.
22 Ledz Cam, tonaꞌ la coz ily bicy mi lugaar zeꞌ.
Tonaꞌ la cha du ic na de coz nu bicy mi ruꞌ Nisyudoo Ña.
23 Ndeꞌ nu Ñgyoozh mniim nu nit lom de mbecy nim.
Zeꞌ Moisees, yu nu pcuim, mneꞌ ruꞌy nu nac de losaꞌy.
Bicy yu nu byag lagy mi lo de mbecy zeꞌ.
Orzeꞌ wanit lom dey.
24 Despuees orzeꞌ bgüii naañ dey lo lugaar cyit zu nu mnii Ñgyoozh nu gyed yu.
Wancheña lagy dey de riidz nu mniim nu waded la gyicy mi.
25 Orzeꞌ byeeñ dey nañ yuꞌ negy niy.
Orzeꞌ brugyiꞌ nu rnii deet dey,
nunu wansuub gyidag dey de coz nu mnii Ñgyoozh, Shuaan na.
26 Ndeꞌ nu mniim nu waded la gyicy mi nu gat dey de lugaar ub zi,
27 nunu mniim lo dey nu tush las mi de nez yu, de yu nu gruu zac par lo.
Cha dey lat de mbecy nu a̱ꞌ yuꞌ lo ub mi.
Nunu zaan mi nu gat dey ledz reñaꞌ mbecy.
28 Depuees orzeꞌ guc nu dey ñgyoozh nab nu la Baal, tub lugaar nu la Peor,
nunu bdow dey gun nu rza lo ñgyoozh nab nu a̱ꞌ mbañ.
29 Orzeꞌ bicy dey nu pchaꞌ ic Ñgyoozh, Shuaan na
nu nac de coz nu bicy dey.
Orzeꞌ bruꞌña tub güii dañ lat dey.
30 Orzeꞌ wes su Fines lat de losaꞌy.
Orzeꞌ briic yu cashtig ni de yu nu guꞌ falt ni.
Orzeꞌ guca güii zeꞌ.
31 Orzeꞌ Ñgyoozh bicy mi coz nu bicy yu zeꞌ par tub coz nap,
nunu ni gyicy num dela iꞌñ yu nu yad par lo par tub la.
32 Despuees, orzeꞌ zeꞌ nu driib nis ni Meriba
bicy dey nu pchaꞌ ic Ñgyoozh, Shuaan na, tuubaꞌ tir.
Orzeꞌ Moisees bzac deet yu nu nac de yu zeꞌ.
33 Orzeꞌ bicy dey nu guti bis nañ lardoo Moisees.
Orzeꞌ brugyiꞌ nu rnii dza lay.
34 Gun Ñgyoozh mniim lo dey nu nit loy de mbecy nu walab nim.
Zeꞌ de yu zeꞌ wanit lo dey de mbecy zeꞌ.
35 Lugaar nu ñgyicy dey ndeꞌ,
ca nu guꞌ can dey lat de mbecy nu a̱ꞌ yuꞌ lo Ñgyoozh.
Orzeꞌ brugyiꞌ ricy dey de coz nu ricy de mbecy zeꞌ.
36 Orzeꞌ brugyiꞌ nu driib zily dey ñgyoozh nab ni de mbecy zeꞌ.
Par nu nac ndeꞌ, orzeꞌ mnit lo dey.
37 Biit dey yu nguzh niy, mñaa gyeey la,
briic dey de yu nguzh zeꞌ par gun lo de nuras.
38 Biit dey de yu nguzh nu sac falt ni.
Biit dey yu gyeey nu fiñ mñaa,
par nu guc de yu zeꞌ gun nu gua lo ñgyoozh nab ni de mbecy Canaan.
Nu nac ndeꞌ, orzeꞌ gubag ledz dey.
39 Orzeꞌ byac dey mbecy bag nu nac de coz nu bicy yu.
Zeꞌ par lo Ñgyoozh bicy dey cyi.
Cyi zeꞌ saap ñi cyi nu ricy biñ mñaa congal.
40 Orzeꞌ Ñgyoozh, Shuaan na, bdzaꞌm ni dey.
Nunu güiñ lagy mi de mbecy nu nac nim.
41 Orzeꞌ bzaan mi nu byuꞌ dey yaa de yu nu walab mbecy nim.
Orzeꞌ de losaꞌ yuu dey gutib ic yu dey.
42 Nunu de losaꞌ yuuy pshet ziy yu,
nunu gutib ic nap la dey yu.
43 Ñgyoozh, Shuaan na, zañ tir bloo mbañ mi de mbecy nim.
Tees de yu zeꞌ dub gal rii la lagy dey wansuub gyidag yu nim.
Orzeꞌ dzi zir mnu dey nu nac de cyi nu ricy yu.
44 Mas ni bicy dey, tees güeñ mi ornu brishti nu dey mi.
Nunu bduꞌ cuen mi ornu bzac deet dey.
45 Orzeꞌ byezaꞌ lagy mi de riidz nu mniim nu waded la gyicy mi.
Orzeꞌ “O” mniim nu nac nu tonaꞌ la rcam dey.
46 Orzeꞌ de yu nu ricy mandaar dey, bicy mi nu gushni lagy yu dey.
47 Ñgyoozh, Shuaan de̱, ru nac ru Ñgyoozh ne̱ de̱.
Bloo mbañ de̱ ya̱. Gal nu yu̱ꞌ de̱ ledz de mbecy ii, bicy tublaazh de̱ ledz yu.
Orzeꞌ gya nur de̱ par ledza̱,
gun orzeꞌ gric de̱ gras nir,
nunu gyabic de̱ gyel mbecy nir.
48 Na la gyabic den gyel mbecy ni Shuaan na,
Ñgyoozh ni de mbecy Israeel na nunu par tub la.
Orzeꞌ dela mbecy mniiy: “¡Laab ni gac ñi!”
¡Gyabic den gyel mbecy ni Ñgyoozh!