De coz ily nu bicy Ñgyoozh nu de mbecy Israeel
105
Briic der gras ni Ñgyoozh, Shuaan na.Ye la mnii der nu mi zeꞌ nac mi Ñgyoozh.
De mbecy nu walab mbecy Israeel, mnii lo dey de coz nu bicy mi.
2 Biily der lom.
Nunu mnii de coz ily nu bicy mi.
3 Bet lagy der nu nac mi, gun mi zeꞌ Ñgyoozh yon.
Bet lagy de ru mbecy nu ryub mi.
4 Gua lo Ñgyoozh nu locyuub mi ru.
Zaab zu lar lom dub laa tiem.
5,6 De ru mbecy nez Abraang, yu nu zu riiñ ni Ñgyoozh,
de ru mbecy nez Jacob, de mbecy nu pcuim,
bicy der nu gyezaꞌ lagy ru de nusuriidz nu bicy mi,
nunu bicy der nu gyezaꞌ lagy ru lac mod bri beem ni de losaꞌ yuum.
7 Mi zeꞌ Ñgyoozh, Shuaan na.
Nunu gri beem ni dutuub la gyishlombecy.
8 Nunu ricy paam nu de riidz nu mniim par tub la.
Mas lazh tub nac mbecy, zeꞌ ruu zac tub nacaꞌy.
Mas tub miily tant de mbecy nu gruu zac par lo,
ni ziꞌl gyicy mi gal nu mniim.
9 Ricy yac mi nu de trat nu bicy num Abraang,
nunu ricy yac mi nu de riidz nu mniim lo Isaac
nu waded la gyicy mi.
10 Gun bicy mi tub trat nu Jacob nu gzuñ par tub la.
11 Orzeꞌ nam:
“Ya̱ rica̱ de yu ni Canaan nir.
Ndeꞌ gyac ñi gyaꞌn de iꞌñ ru nu ruu zac par lo.”
12 De mbecy ni Ñgyoozh nu yuꞌ lo yu ni Canaan, i zi dey,
nunu mbecy gur rded la guc dey.
13 Bruu dey zeꞌ nu yuꞌ tub nac mbecy.
Za dey zeꞌ nu yuꞌ tub nacaꞌ mbecy.
Gusa dey gazaꞌ gyedz la.
14 Ni tub la coz wansaan Ñgyoozh nu ñgyicy nu la mbecy dey.
Orzeꞌ pshuu num de rey nu yuꞌ de gyedz nu bded dey.
15 Orzeꞌ nam rab mi de rey zeꞌ:
“Cueꞌ gan ru de mbecy nu pcui̱, de yu nu ricy riiñ ne̱.
Cueꞌ gyicy seed de ru yu nu rnii por cuen ne̱”, nam.
16 Ñgyoozh bzeed mi cubiñ ledz dey.
Mnit lom trig niy.
Orzeꞌ wangad coz nu gow dey.
17 Tees bzuu nez mi tub mbecy nu za gay lo par de losaꞌy.
Yu zeꞌ See, yu nu biit dey nu tiñ nu gac yu moz por fers la.
18 Pcyiig dey gyiꞌy nu caden.
Gazeꞌ nu bri dey tub regoy gyiib yeñ yu.
19 Orzeꞌ de riidz ni Ñgyoozh bicy ñi preb See ben a gyicy paay
o ti wayicy paay.
Zeꞌ briy gashtal pshuub la tiem nu byuꞌ niñ gal nu mniiy.
20 Orzeꞌ yu nu riib ic Egipto bicy yu mandaar nu glaa dey See.
Orzeꞌ blaa dey yu.
21 Orzeꞌ yu nu riib ic zeꞌ mniiy lo See nu gyub ic yu yuꞌy.
Nunu mniiy nu yu zeꞌ gyub ic yu dutuub la Egipto.
22 Gun orzeꞌ See gyicy yu mandaar de yu nu zu riiñ lo yu nu riib ic,
nunu lyuuy ni de mbecy nu rbic consef.
23 Gazeꞌ nu Jacob bruuy lugaar nu rcyiiñ yu,
orzeꞌ zay nu cyiiñ yu Egipto.
24 Orzeꞌ Ñgyoozh bicy mi nu byañ de nez yu,
nunu byafert zir dey gazeꞌ de mbecy Egipto.
25 Orzeꞌ bicy mi nu guzi lagy de mbecy Egipto lo de mbecy nim.
Bicy mi nu bicy dey gan
bguuy de mbecy nu ricy de coz nu rlagy mi.
26 Orzeꞌ bzuu nez mi cyup de mbecy nu pcuim, Moisees nu Aroong,
nu chay lo yu nu riib ic.
27 Orzeꞌ bicy dey coz ily nu bruu lo Ñgyoozh lat de mbecy Egipto.
Bicy dey nusuriidz lat de yu zeꞌ.
28 Orzeꞌ Ñgyoozh bicy mi nu bet cow ledz de mbecy Egipto.
Tees de yu zeꞌ wangyicy cuen dey de coz nu mniim.
29 Orzeꞌ bicy mi nu nis gyoow byac ñi reñ,
nunu bicy mi nu gut dela bel nu yuꞌ gyoow nu byareñ zeꞌ.
30 Zaꞌ caas la lo yu nu nguaa bigy.
Mas gal nañ yuꞌ ni yu nu riib ic nguaa ma.
31 Ornu mniim nu bet byung nu beꞌy,
orzeꞌ gaꞌl la yad ma.
Orzeꞌ bzu laa ma ledz dey.
32 Lugaar nu nshet mi gyey nap ledz dey,
orzeꞌ bicy mi nu bet gyey gye, nu guzii dañ.
33 Mnit lom dela lyucy urbyay, nu dela yalas ni dey.
Psug mi dela yag nu nash ledz dey.
34 Ornu mnii Ñgyoozh,
orzeꞌ bruꞌña gushagy.
Nu blaazhaꞌ la bañ zigy bruꞌña.
Ni wacaꞌ la nu dulab ma.
35 Orzeꞌ blaazh la de ma de coz caꞌ nu nash ledz dey bdow ma.
Blaazh la ma de ya mni ni dey.
36 Dela mdoo nu gul loga ni tub ga de famil ni de mbecy Egipto,
biit mi dela mdoo zeꞌ dutuub la Egipto.
37 Orzeꞌ bloom de mbecy Israeel nu yeed num dey.
Orzeꞌ bruu nu dey de coz nu byaa nu plat, nu coz nu byaa nu or.
Nunu de lay yaruub yu, nunu fert yu.
38 Bet lagy de mbecy Egipto ornu bruu dey,
gun gudzib yu lo de yu zeꞌ.
39 Or widoo orzeꞌ Ñgyoozh bzaab mi tub nac bey
nu cuic ñi gaꞌl too de mbecy Israeel.
Zeꞌ rel, orzeꞌ bzaab mi tub gyi,
gun orzeꞌ nap zac dey.
40 Orzeꞌ bdiiñ dey beel lom.
Orzeꞌ bzeed mi lardoo gye lat dey.
Nunu briic gyel lam gyit nu bruu gal gyibaa nu gow dey.
41 Bicy mi nu bet rich tub gyitaꞌ.
Orzeꞌ sheñ nis briib.
Bded ñi de lugaar wach,
yaañ gal nu rya tub gyoow.
42 De coz nu mnii Ñgyoozh nu waded la gyicy mi, rila wannit lagy mi
gal nu mniim lo Abraang, yu nu bicy de coz nu mniim.
43 Orzeꞌ yed num de mbecy nu bi pcuim.
Orzeꞌ biily dey nunu rbishtiy nu dzi bet lagy yu,
ornu bruu num dey nu yeed yu.
44 Briic mi yu ni reñaꞌ nac mbecy nu gani dey.
“O” mniim nu gani dey de naa de mbecy zeꞌ.
45 Gun orzeꞌ de mbecy nim gzuub gyidag dey ni leey nu bzeeñ mi,
nunu gyicy yac dey nu de riidz nu mniim.
Gyabic den gyel mbecy ni Ñgyoozh Shuaan na.