Gyabic na gyel mbecy ni Ñgyoozh, biñ nu psaꞌ lagy dela coz
104
¡Gyabica̱ gyel mbecy ni Ñgyoozh!Ñgyoozh, Shuaan na, biñ nu rca̱, tonaꞌ la zily nac ru.
Shab ru nu zur, ndeꞌ gyel mbecy nir nu gyel lily nir.
2 Zeꞌ negy nu zu yeñ ru, ndeꞌ rbic ñi yaa.
Ru ptiily sher baa gal nu rtiily mbecy lo tub negy.
3 Zeꞌ par ic zir zeꞌ nu ri nis, zeꞌ ca baa nu bzuub ru yuꞌ nir.
De za nu taꞌ baa bicy ru nu nac ñii caret nu rza nuñ ru.
Ornu rzar ca lugaar, orzeꞌ bi rza nuñ ru.
4 Zeꞌ de bi nañ gal nu na de mbecy nu rded nu raso̱o̱ nir.
Zeꞌ gyi ni guzii nañ gal na moz nir.
5 Ru bzuub ru gyishlombecy lo simient niñ.
Orzeꞌ rila waruu chuñ seꞌñ.
6 Ru ptiish ru gyishlombecy nu nisyudoo,
gal nu rtiish na ub na nu negy nu rcaa yeñ na.
De nis zeꞌ psoow ñi too de la bicy.
7 Na ornu mnii nur ñii,
orzeꞌ de nis zeꞌ bruu chuñ lo de yu wach.
Ornu bicy ru mandaar loñ,
orzeꞌ dzach bruu chuñ.
8 De nis zeꞌ bruuñ de too bicy,
orzeꞌ yaañ de gyerlas.
Orzeꞌ psaap ñi li laa par lugaar nu bzu lily ru nu gyañ.
9 Gazeꞌ nu bzur bzaa nu wacaꞌ ded nez ñi,
gun orzeꞌ cueꞌ gaꞌ nu grily ñi gyishlombecy tuubaꞌ tir.
10 Ru bicy ru nu driib nis de gyerlas.
Bicy ru nu ri gyoow gazel de tub laꞌ ga de too bicy.
11 Orzeꞌ rad nis nu roꞌ de bañgyish.
De lugaar zeꞌ ryel ni de bur gyish nu roꞌ ma nis.
12 Orzeꞌ de yag nu nash gaab ga ruꞌ gyoow,
de chigyiñ rzaa ma teez ma looñ.
Orzeꞌ rded ma de lat yaañ nu rul ma.
13 Gashtal gyibaa zeꞌ nu rcyiiñ ru ricy ru nu yet gyey too de bicy,
orzeꞌ ricy nap ru lo yu gyishlombecy ii nu nac de gyey nu rshet ru.
14 Ru ricy ru nu raly de gyizh nu row de chigud.
Ricy ru nu raly de coz caꞌ nu cyiiñ ni de mbecy.
Nunu rad mod nu rnuuz mbecy de ya mni.
15 Orzeꞌ rad mod nu rboo dey ñup,
par nu gyicy ñi nu zu cyit lagy dey.
Rad asecy ni ya oliva ni dey, nu gyicy ñi nu cyiiñ ruub yu,
nunu rad gyel mbañ nu row dey nu cuic ñi fers niy.
16 Tonaꞌ la yet gyey lat de ya gyicy nu nash Libano.
De ndeꞌ yag nu ub mi mnuuz mi.
17 Lat de yag zeꞌ rzaa de chigyiñ teez ma.
Tub lo chigyiñ cyuruꞌ duñ rzaa ma teez ma lo de ya gyicy zeꞌ.
18 De chiib gyish rcyiiñ ma de too bicy nu zub gya zir.
De bziñ rcach lo ma lat de gyitaꞌ.
19 Ru psaꞌ lagy ru beey ca baa,
gun orzeꞌ gad lagy na de tiem ni ñaꞌn.
Nunu rza doo güidz gal nu ca lo cuen niñ.
20 Ru psaꞌ lagy ru rel.
Na ornu bi bet cow,
orzeꞌ druu de bañgyish.
21 De biidz feñ rshuu ma.
Ndeꞌ nu rnii ma ornu ryub ma cyu nu gow ma.
Zeꞌ coz nu row ma laab lo ru druuñ Ñgyoozh.
22 Na ornu driib doo güiidz,
orzeꞌ rbish cya ma nu rya ma nañ blyuu nu rabish ma.
23 Orzeꞌ druu de mbecy yuꞌy nu rzay riiñ niy.
Orzeꞌ ricy yu riiñ dub laa dzi gal gyecheñ la.
24 Ñgyoozh, Shuaan na, tonaꞌ la zañ coz psaꞌ lagy ru.
Nunu tonaꞌ la shcab lily ricy cup ru nu psaꞌ ru dela coz.
Dza la gyishlombecy yuꞌ de bañcyug nu psaꞌ lagy ru.
25 Tonaꞌ la she ri nisyudoo.
Se ri zi ziꞌl rabee riñ.
Par nu tonaꞌ la bañcyug zañ yuꞌ loñ,
ni wacaꞌ dulab de ma.
Yuꞌ bañcyug ily nu tub tantaꞌ de bañcyug miꞌ.
26 Lo nisyudoo rded barc.
Nunu loñ rgyit bañcyug ily nu la Leviatan,
bañcyug nu ru psaꞌ lagy ru.
27 Dela bañcyug zeꞌ, cuen ni ru
nu cuic ru coz nu gow de ma ornu ran ma.
28 Ru cuic ru coz nu gow ma.
Orzeꞌ row ma.
Rbic ru coz row ma.
Orzeꞌ ryel ni ma.
29 Se benu ruu chur lo de ma, orzeꞌ dzib ma.
Benu gyash ru bi nu ryash ma, orzeꞌ gat de ma,
nunu gyac ma yu tuubaꞌ tir
gal nu na ma anzir nu saꞌ lagy ru ma.
30 Tees psaꞌ lagy ru de ma ornu briic ru bi nu gyash lagy ma.
Nunu bicy cub ru de lo yu.
31 Ya̱ rlagya̱ nu gzu gyel lily ni Ñgyoozh par tub la.
Rlagy ñi nu Ñgyoozh gyet lagy mi de coz nu psaꞌ lagy mi.
32 Mi zeꞌ ornu rgüiim lo yu, orzeꞌ driib duru.
Ornu ral mbiz mi too bicy, orzeꞌ driib dzeeñ.
33 Orzeꞌ ya̱ dula̱ lo Ñgyoozh dub laa lat nu mbaña̱ gyishlombecy ii.
Dula̱ de riidz nu gyabic gyel mbecy nim, dub laa lat nu zu̱.
34 Ya̱ rlagya̱ nu gyedzuꞌ lagy mi nu nac de shcab nu drusha̱,
gun dzi zu cyit lagya̱ nu nac mi.
35 Ya̱ rlagya̱ nu gyishlombecy ii nit lo de mbecy cyi.
Par lo orzeꞌ sacaꞌ dey.
¡Orzeꞌ gyabic den gyel mbecy ni Ñgyoozh!