Ñgyoozh nap gyicy num mbecy nim: tub riidz ni Dabi
103
Gyabica̱ gyel mbecy ni Ñgyoozh yon, nu dutuub la lardo̱o̱.Gyabica̱ gyel mbecy nim.
2 Gyabica̱ gyel mbecy nim,
nunu wanit lagya̱ dela coz nap nu bicy num ya̱.
3 Bicy sulagy mi ne̱ nu nac dela cyi nu bicya̱,
nunu bicy yac mi ya̱ ni dela güii nu gurata̱.
4 Bloom ya̱ zeꞌ nu rza de mbecy gut,
nunu nap ricy num ya̱ nu nac nu rcam ya̱,
nunu rashni lagy mi ya̱.
5 Dub laa lat nu mbaña̱ rbic gyel lam de coz nu cyiiñ ne̱.
Orzeꞌ ya̱ tuñ tiem cyiiñ ruuba̱ gal nu rzac psi doo.
6 Ñgyoozh zam faboor ni de mbecy nu rzac zi yaa tuubaꞌ mbecy.
Orzeꞌ ricy num dey gal mod nu seꞌñ.
7 Bicy mi nu gud lagy Moisees de coz nu rlagy mi,
nunu bicy mi nu bzaac de mbecy Israeel de coz ily nu bicy mi.
8 Ñgyoozh, Shuaan den, mi zeꞌ rashni lagy mi de ub na,
nunu nap ricy num den.
Walab nu dzi dzach rchaꞌ ic mi.
Tonaꞌ la rcam den.
9 Walab nu zaab rshuu nu laam de ub na.
Walab nu rdzaꞌm par tub tir ziꞌl.
10 Walab nu rbic mi cashtig
gal nu yad ñi nu dugyi den nu nac de cyi nu ricy na.
Ni wacuic mi cashtig nin
gal nu rlagy ñi par nu nac de coz a̱ꞌ nap nu ricy den.
11 Benu ruun gyishlombecy ii, chan gal zeꞌ nu gya zir ni baa,
tonaꞌ la gya chup na.
Ni tant rcam de mbecy nu rdzib lagy lom.
12 Benu gruun gal zeꞌ driib doo güidz,
orzeꞌ chan gal zeꞌ nu rza doo,
tonaꞌ la zet.
Ni tuñ byazet de cyi nu bicy den par zeꞌ nu zun.
13 Ñgyoozh nap ricy num de mbecy nu rdzib lagy lom
gal nu ricy tub mbel nu iꞌñ yu.
14 Mi zeꞌ nap rad lagy mi la na de ub na.
Nap rad lagy mi nu de ub na yu gyidz ziꞌl nac naa.
15 Zeꞌ de ub na nan gal nu na de gyish nu nash ngush.
Orzeꞌ raly na nunu cyit nan gal nu na de gyee nu nash ngush.
16 Na ornu druu bi, orzeꞌ ded ni gyee zeꞌ.
Orzeꞌ sacaꞌñ.
Orzeꞌ se cyu la rad lagy ca zañ.
17 Tees Ñgyoozh zaab rca lam de mbecy nu rdzib lagy lom par tub la,
nunu nap gyicy num dey dub laa lat nu mbañ yu gyishlombecy ii.
18 Ni gyicy num de mbecy nu ricy paa nu trat nu bicy num dey,
de yu nu ricy yac de mandaar nu mniim.
19 Ñgyoozh bzum tub lugaar gyibaa nu gyub ic mi de mbecy.
Mi zeꞌ rey nu riib ic dela mbecy.
20 Orzeꞌ byabic der gyel mbecy ni Ñgyoozh, de ru anc nim.
Byabic der gyel mbecy nim, de ru mbecy fert nu ricy de coz nu rniim,
de ru mbecy nu rzuub gyidag de riidz nim.
21 De ru anc zigy, byabic der gyel mbecy ni Ñgyoozh,
de ru moz nim nu ricy de coz nu rlagy mi.
22 Byabic der gyel mbecy ni Ñgyoozh dela lugaar nu riib ic mi,
de ru mbecy nu psaꞌ lagy mi.
Ya̱ gyabica̱ gyel mbecy nim.