Tub riidz nu rnii mbecy lo Ñgyoozh ornu rzac ziy
102
Ñgyoozh, ornu rne̱e̱ du̱ ru, orzeꞌ bzuub gyidag ne̱.Bzuub gyidag ornu rnishba̱a̱ lor nu cyid locyuub ru ya̱.
2 Ornu deet rzaca̱, cueꞌ ruu chur lo̱.
Bzuub gyidag ne̱, nunu dzach locyuub ru ya̱ ornu dredza̱ ru.
3 Gal nu ricy dzeeñ nu dzach driib ñi,
na orzeꞌ sij ziꞌl nit ñi,
ni dzach gata̱.
Rze̱e̱ nu byaboo la cuerp ne̱ gal nañ rit la̱.
4 Rze̱e̱ nu na gal nu na de gyish wach nu wes saa lo yu.
A̱ꞌ nap la row gyit rze̱e̱.
5 Se nu zub ziꞌl ti̱ꞌ.
Se gyid ziꞌl riib ich rita̱.
6 Na̱ gal nu na tub lyash nu rded lo bi de ngush.
Na gal nu na tub bañ bis nu rded de zeꞌ shiñ zu.
7 Rabisha̱, tees wagash pcaala̱.
Na̱ gal nu na tub chigyiñ ub zi, bañ nu za sub too yuꞌ.
8 Dub laa dzi de losaꞌ yu̱u̱ rzat zi dey ya̱.
De mbecy nu rgubdzaa ya̱ rzat yu ya̱ ornu rzaa lagy yu ni losaꞌy.
Orzeꞌ rniiy nu gzac yu zeꞌ gal nu rzac ya̱.
9 Diꞌñ, ndeꞌ nac ñii gyit nu rda̱w.
Zeꞌ nis nu rdo̱ꞌ, ndeꞌ rzuꞌ can ñii nu nis urlo̱.
10 De nii coz nu rzaca̱, Ñgyoozh, nu nac nu bdzaꞌr ne̱.
Orzeꞌ bduꞌ yaar ya̱.
Orzeꞌ mneꞌr ya̱ gal lo toop.
11 Zaab za la dzi ne̱ gal nu zaab za doo güidz.
Despuees bet cow.
Na bzaca̱ gal nu rzac de gyish guwach.
12 Zeꞌ ru, Ñgyoozh Shuaan na, ru nac ru rey ne̱ par tub la.
Dela mbecy nu ruu zac par lo gzat dey ru.
13 Zeꞌ gyedz Sión, ru cyid ru nu gashni lagy ruñ.
Gun bi pshuub tiem nu cuic ru consuel niñ.
Na la tiem niñ.
14 Gun de yu nu ricy riiñ nir yet lagy dey gyedz Sión mas bi mnit loñ.
Tees rashni lagy dey ñi, mas se gyitaꞌ nu diꞌñ ziꞌl nguaa.
15 Orzeꞌ de mbecy nu yuꞌ deꞌ zir gyedz dzib lagy dey lo Ñgyoozh,
nunu dela rey nu yuꞌ gyishlombecy dzib dey nu dzi gya zum,
16 ornu zu nap mi gyedz Sión tuubaꞌ tir.
Orzeꞌ gyicy mi nu gabe de gyel lily nim.
17 Tiem zeꞌ, orzeꞌ cuꞌ cuen mi de mbecy bduneꞌ nim
ornu nii nu dey mi.
Orzeꞌ locyuub mi dey,
dub gal mod nu nishbaay lom.
18 Rlagy ñi nu caan lo gyicy dela coz nu bicy Ñgyoozh, Shuaan na,
gun orzeꞌ syaꞌ de mbecy nu ruu zac par lo,
gun orzeꞌ de mdoo nu nigul gal gyabic dey gyel mbecy nim.
19 Gal zeꞌ nu gya ni lugaar yon nu rcyiiñ Ñgyoozh,
gal zeꞌ zum rgüiim lo yu.
Nese gal gyibaa rguꞌ cuen mi gyishlombecy.
20 Reñ mi ornu rzuub tiꞌ de mbecy nu yuꞌ pres.
Orzeꞌ laam de yu nu ca lo cuen nu gat,
gun orzeꞌ cueꞌ nu gat dey.
21 Orzeꞌ de mbecy nu yuꞌ gyedz Sión gzat dey mi.
De mbecy nu yuꞌ Jerusaleeng gyabic dey gyel mbecy nim,
22 ornu gya tublaazh de mbecy nu gruu reñaꞌ lugaar nu griib zily dey mi.
23 Ñgyoozh bicy gyidz mi ya̱ lat nu gabee feña̱.
Nunu bicy shub mi lo yu̱.
24 Ñgyoozh, cueꞌ cor ya̱ gyishlombecy ii anzir nu gri gyel gush ne̱.
Ñgyoozh ru, zur tubla.
25 Dzi gulas psaꞌ lagy ru gyishlombecy.
Nu yaar psaꞌ lagy ru gyibaa.
26 De ndeꞌ nit ñi.
Zeꞌ ru ni ziꞌl zur.
Gal nu rlazh de shab gush na,
niꞌ ziꞌl lazh de lugaar zeꞌ.
Orzeꞌ neꞌr ñii gal nu rneꞌ mbecy shab gush yu.
Orzeꞌ ni mod nit ñi.
27 Zeꞌ ru ni ziꞌl nar dub laa tiem,
nunu rila waglazh tiem nir.
28 Orzeꞌ de iꞌñ de mbecy nir nu yad par lo, cyiiñ gusht yu,
gun ru ñar dey.
Nunu gzu fert de iꞌñ yu.