Riidz nu mnii Dabi lo Ñgyoozh nu waded la gyicy yu
101
Ya̱ rdula̱ lo ru,
Ñgyoozh,
Shuaan na.
Zeꞌ de riidz nu rdula̱,
ndeꞌ rniiñ nu dzi ricy pa̱a̱ nu rca̱ ru,
nunu ricya̱ mod nu seꞌñ nu de mbecy.
2 Ya̱ ricy cuidada̱ uba̱,
gun orzeꞌ cha̱ nez nu sac falt ni.
Orzeꞌ ¿gul cyid ru lo̱,
Ñgyoozh?
Li zu̱ mas gal nañ yu̱ꞌ.
3 Zeꞌ nu ya̱ zu̱,
wazaan na nu chuꞌ de coz a̱ꞌ nap.
Rzi lagya̱ lo de coz nu ricy de mbecy nu druu chu lo Ñgyoozh.
Ya̱ ruu chu̱ lo de cyi zeꞌ.
4 Nunu ruu chu̱ lo gyel rguu,
nunu rila wazaan na nu gyicya̱ coz a̱ꞌ nap.
5 De mbecy nu druꞌña lo̱ nu driib yu cyi fals too losaꞌy,
orzeꞌ ya̱ rsoowa̱ ruꞌy.
Wazaana̱ nu zu mbecy leꞌ nu mbecy ñgya lo̱.
6 Zeꞌ de mbecy Israeel nu ricy paa nu Ñgyoozh,
ya̱ rne̱e̱ nu nap ricy dey.
De yu zeꞌ zuy riiñ nañ yuꞌ ne̱.
De yu nu sac falt ni,
de yu zeꞌ rzu bich yu nu naca̱.
7 Mbecy rguu,
ni tub yu wac cyiiñ yu nañ yu̱ꞌ,
nunu ni tub mbecy rguu wac zuy lo̱.
8 De dzi la,
or napor,
rsoowa̱ ruꞌ dela mbecy a̱ꞌ nap nu yuꞌ ledza̱.
Loo chu̱ dela mbecy a̱ꞌ nap lat gyedz ni Ñgyoozh.