Ñgyoozh rey nu gya zir zu
99
Ñgyoozh riib ic mi.Orzeꞌ dela mbecy rash la bis dey.
Mi zeꞌ zub mi lugaar nu rzub rey,
par too de anc nu zub loweꞌ.
Orzeꞌ driib duru dutuub la gyishlombecy.
2 Ñgyoozh, Shuaan na, tonaꞌ la zily nac mi too bicy Sión.
Mi zeꞌ riib ic mi de lo la mbecy.
3 Dela mbecy gyabic dey gyel mbecy nim
nu nac nu dzi zily nac mi.
Nu nac ndeꞌ, orzeꞌ dzib lagy de mbecy lom.
Mi zeꞌ nac mi ub la Ñgyoozh yon.
4 Ru rey fert ne̱ de̱, yet lagy ru mod nu seꞌñ.
Ru ricy ru nu yuꞌ gyel fushtiz lat de mbecy Israeel.
Ru ricy ru mod nu seꞌñ nunu gal mod nu yad ñi.
5 Byabic der gyel mbecy ni Ñgyoozh, Shuaan den.
Mi zeꞌ nac mi Ñgyoozh ni den.
Orzeꞌ briib zily der mi lugaar zeꞌ nu zum.
Mi zeꞌ nac mi ub la Ñgyoozh yon.
6 Moisees nu Aroong, gazaꞌ de yu zeꞌ bri dey
lat de uz nu bzu bich nu nac Ñgyoozh.
Zeꞌ Samueel guc yu tub yu nu mnii num.
De yu zeꞌ mnii dey: “Ñgyoozh Shuaan na”, mniiy.
Orzeꞌ blocyuub mi dey.
7 Mnii num dey nu nac tub gyi.
Rabeeñ gal nu rabee tub ya bi.
De yu zeꞌ bzuub gyidag dey ni de leey nu briic mi,
nunu “O” mnii dey bicy yu de coz nu mniim nu gyicy yu.
8 Ñgyoozh, Shuaan na, ru blocyuub ru de mbecy nir,
ornu mnii nu dey ru.
Mas briic ru cashtig ni dey nu nac de cyi nu bicy yu,
tees briic ru nu gad lagy dey nu ru nac ru tub Ñgyoozh nu ricy sulagy.
9 Byabic der gyel mbecy ni Ñgyoozh, Shuaan na.
Mi zeꞌ Ñgyoozh ni den.
Briib zily der mi too bicy yon nim.
Ñgyoozh, Shuaan na, nac mi ub la Ñgyoozh yon.