Ñgyoozh bicy mi gan de losaꞌ yuum
98
Biily der tub riidz cub lo Ñgyoozh,
Shuaan den,
nu nac de coz ily nu bicy mi.
Bicy mi gan de losaꞌ yuum nu nac nu dzi fert mi nunu dzi rcyiiñ mi.
2 Ñgyoozh,
Shuaan den,
briic mi nu gad lagy den nu bicy mi gan.
Bicy mi nu gud lagy de lo la nez mbecy
nu mi zeꞌ co mbañ mi de mbecy nim.
3 Wannit lagy mi.
Bicy yac mi gal nu mniim.
Nunu zaab rca lam dey.
De mbecy nu yuꞌ dutuub la gyishlombecy gud lagy dey
nu Ñgyoozh ni den bicy mi gan de losaꞌ yuum.
4 De ru mbecy nu yuꞌ dutuub la gyishlombecy,
biily der lo Ñgyoozh,
Shuaan na,
nu nac nu dzi yet lagy der.
5 Byabic der gyel mbecy nim ornu rul ru lom.
Bicy der di nu beeñ arpa,
gal nu deꞌ zir beeñ.
6 Blaa der de lo la trompet.
Brishti der lo Ñgyoozh,
Shuaan den,
nu nac nu dzi yet lagy der,
gun mi zeꞌ nac mi rey ni den.
7 Gac nu zu redz lo nisyudoo.
Niꞌ ziꞌl dela de bañcyug nu yuꞌ loñ gyicy de ma nu zu redz.
Gyishlombecy gal nu dela mbecy nu yuꞌ loñ
bicy der gal nu ricy mbecy ornu rul yu.
8 De gyoow rcueñ suñ nu yet lagy ñi
gal nu ricy mbecy ornu rgyich yaay.
Zeꞌ de too bicy niꞌ ziꞌl mod yet lagy ñi,
gal nu ricy mbecy ornu rul yu lo Ñgyoozh,
Shuaan na,
nu nac nu yet lagy yu.
9 Gun mi zeꞌ cyid mi nu gyub ic mi gyishlombecy.
Mi zeꞌ gyub ic mi dela mbecy nu yuꞌ gyishlombecy mod nu seꞌñ nunu gal mod nu yad ñi.