Ñgyoozh nac mi rey
97
Ñgyoozh, Shuaan na̱, mi zeꞌ nac mi rey.Orzeꞌ de ru, mbecy nu yuꞌ gyishlombecy, bicy der nu zu cyit lagy ru.
Bet lagy de ru mbecy nu rcyiiñ garee ruꞌ nisyudoo.
2 Dub yub la zeꞌ nu zum cow la nu bet bey.
Mi zeꞌ rbic mi gyel fushtiz mod nu seꞌñ nunu gal mod nu yad ñi.
3 Lom zub lo tub tant gyi.
Orzeꞌ gyi zeꞌ zaay ñi de losaꞌ yuum nu yuꞌ dub yub la lom.
4 Ricy mi nu gyet gyi ni guzii.
Orzeꞌ rbic ñi yaa nañ gyishlombecy.
De mbecy nu yuꞌ gyishlombecy rzac dey ñi.
Orzeꞌ rash la bis dey nu tantaꞌ rdzib yu.
5 De too bicy ryanis ñi
gal nu ryanis za gyergyiñ ornu rleꞌy ñi.
Ni rzac ñi ornu zu Ñgyoozh, Shuaan na̱, loñ,
gun mi zeꞌ nac mi Shuaan dutuub la gyishlombecy.
6 Rabee nu Ñgyoozh dzi nap mi nu nac de coz nu rac baa.
Orzeꞌ rzac de lo la nez de mbecy de gyel lily nim.
7 Orzeꞌ druu gyel mbecy ni de mbecy nu driib zily de ñgyoozh nab,
gun dela anc rzaab tiily dey lo Ñgyoozh, Shuaan na̱.
8 Ñgyoozh, Shuaan de̱, de mbecy Sión dzi yet lagy dey
ornu reñ yu de coz nu ricy ru.
De mbecy nu yuꞌ de gyedz ni Juda dzi zu cyit lagy dey
nu dzi nap dri beer ni de mbecy a̱ꞌ nap.
9 Ñgyoozh, biñ nu gya zir zu,
ru riib ic ru dutuub la gyishlombecy.
Zily zir nac ru gazeꞌ deꞌ zir ñgyoozh.
10 Ñgyoozh, Shuaan den, dzi rcam de mbecy nu rzi lagy lo de coz a̱ꞌ nap.
Mi zeꞌ rñam de mbecy nim nu cueꞌ gat dey,
nunu rboo mbañ mi dey yaa de mbecy a̱ꞌ nap.
11 Orzeꞌ bzu laa yaa nim de zeꞌ nu yuꞌ de mbecy nu ricy de coz nu seꞌñ.
Zeꞌ de mbecy nap yet lagy dey.
12 De ru mbecy nu ricy de coz nu seꞌñ, gucyit lagy der
nu nac de coz nu bicy Ñgyoozh, Shuaan den.
Briic der gras nim, gun mi zeꞌ nac mi biñ yon.