Dul na tub riidz cub lo Ñgyoozh
96
Biily der tub riidz cub lo Ñgyoozh, Shuaan na̱.Dela de ru mbecy nu yuꞌ gyishlombecy, biily der lom.
2 Biily der lom, nunu byabic der gyel mbecy nim.
De dzi la mnii der nu mi zeꞌ biñ nu bloo mbañ de ub na.
3 Mnii der lo de mbecy nu yuꞌ de reñaꞌ lugaar nu mi zeꞌ dzi lily nam.
Coz ily bicy mi lat de mbecy nim.
4 Gun Ñgyoozh ni den dzi zily nac mi,
nunu yad ñi nu gyabic den gyel mbecy nim.
Dzi zir dzib lagy de mbecy lom gazeꞌ lo deꞌ zir de ñgyoozh.
5 Gun nab ziꞌl nac de ñgyoozh ni deꞌ zir mbecy.
Zeꞌ Ñgyoozh, Shuaan ya̱, psaꞌ lagy mi de baa.
6 Tonaꞌ la cyit rabee zeꞌ nu zum.
Rabee nu tonaꞌ la lily nam.
Nu blaazh la nu cyit zu nañ yuꞌ yon nim.
Rabee nu tonaꞌ la fert mi.
7 Byabic der gyel mbecy ni Ñgyoozh, Shuaan na̱,
de ru mbecy nu yuꞌ gyishlombecy.
Byabic der gyel mbecy nim
nu nac nu dzi fert mi, nunu lily nam.
8 Byabic der gyel mbecy nim dub gal nu yad ñi nim,
gun mi zeꞌ Ñgyoozh.
Ornu chuꞌ der gyeroꞌ nim,
orzeꞌ nuur tiñ nu cuic ru nim.
9 Briib zily der mi nañ yuꞌ yon nim.
Gash la bis der, nu dzib lagy ru lom,
de ru mbecy nu yuꞌ gyishlombecy.
10 Mnii der lo mbecy nu yuꞌ deꞌ zir lugaar:
“Ñgyoozh nac mi rey.”
Gyishlombecy zuñ gal nu zuñ seꞌñ,
nunu rila waruu chuñ seꞌñ.
Nunu laab mi zeꞌ gri beem ni dela mbecy nu yuꞌ gyishlombecy mod nu seꞌñ.
11 Baa nu lo yu ii zac ñi gal nu rzac mbecy ornu yet lagy yu.
Nisyudoo ricy ñi nu zu redz.
Niꞌ ziꞌl de ru bañcyug nu yuꞌ loñ.
12 Dela ngush gal nu dela coz nu nash loñ zac ñi
gal nu rzac mbecy ornu yet lagy yu.
Dela yag nu nash ngush zac ñi gal nu rzac mbecy
ornu rbishtiy nu yet lagy yu.
13 Ni gac ornu cyid Ñgyoozh, Shuaan den,
nu gyub ic mi gyishlombecy.
Mi zeꞌ cuic mi gyel fushtiz ni de mbecy nu yuꞌ gyishlombecy,
mod nu seꞌñ nunu gal mod nu yad ñi.