Gyabic na byel mbecy ni Ñgyoozh
95
Gyeed der gun chan dul na lo Ñgyoozh,nunu gyicy den tub nu zu redz gyiꞌ nu dzi yet lagy den.
Ndeꞌ gyicy den lo biñ nu rña de ub na, biñ nu zaab ic den.
2 Ornu gyechaꞌ den lom, orzeꞌ gric na gras nim,
nunu dul na lom nu gyel yet lagy ni den.
Gyicy na tub nu zu redz ornu ryabic na gyel mbecy nim.
3 Gun Ñgyoozh, Shuaan na, nac mi biñ fert.
Mi zeꞌ nac mi rey nu riib ic deꞌ zir mbecy nu rnii mbecy, “ñgyoozh.”
4 Mi zeꞌ riib ic mi dela lugaar ni gyishlombecy
gashtal zeꞌ nu gyi zir nu zu gyiꞌ yu ni gyishlombecy
nu gashtal zeꞌ nu gya zir ni de too bicy.
5 Riib ic mi de nisyudoo,
gun laab mi psaꞌ lagy miñ.
Nunu laab mi psaꞌ lagy mi de yu wach.
6 Gyeed der nañ yuꞌ yon nim,
gun orzeꞌ gyes saa den lo yu nu griib zily na Ñgyoozh.
Zu tib na lo Ñgyoozh, Shuaan den, biñ nu psaꞌ lagy de ub na.
7 Mi zeꞌ nac mi Ñgyoozh ni den.
Zeꞌ de ub na nac naa de shily nu ricy cup yaam,
nunu row ma gyizh nim.
8 Orzeꞌ bzuub gyidag der de coz nu rniim dzi na.
Orzeꞌ nam: “Cueꞌ gyicy cyig too der
gal nu bicy de gyitoo bel nir lugaar nu la Meriba,
nunu gal nu bicy dey laab dzi zeꞌ Ngush ni Masa.
9 De lugaar zeꞌ bicy dey preb ya̱.
Ngulagy dey ñgyad lagy yu ben a rca̱ yu.
Ni bicy nu dey ya̱ mas bzaac dey de nusuriidz nu bicya̱.
10 Orzeꞌ nañ cyuu ñaꞌn güiñ lagya̱ de mbecy zeꞌ.
Ya̱ mne̱e̱ nañ lardo̱o̱: ‘¡Dzi ga wagyicy paa dey!
Rila wagyicy cuen dey de riidz nu mne̱e̱ loy.’
11 Orzeꞌ guzi lagya̱. Orzeꞌ bduꞌ ica̱ tub coz nu waded la gyicya̱.
Ndeꞌ nu wayuꞌ dey lo de yu, zeꞌ nu ngulagya̱ nu zu lagy dey”, nam.