Ñgyoozh ri beem ni dela mbecy gyishlombecy
94
Ñgyoozh, Shuaan de̱, ru biñ nu rbic cashtig ni mbecy.Bicy nu gabe nu rzi lagy ru.
2 Ru biñ nu ri bee ni dela mbecy.
Orzeꞌ ru bzuub taz ruꞌ de mbecy leꞌ dub gal nu ca lo cuen ni dey.
3 Ñgyoozh, Shuaan de̱, ¿la be ruꞌ tiem gyicy de mbecy a̱ꞌ nap gusht?
¿Lac gaal tuñ?
4 ¿Lac gaal tuñ tiem gyicy leꞌ de mbecy shiñ ricy?
¿Lac gaal tuñ tiem nii dey nu dzi zily nac yu
nu nac de coz shiñ na nu ricy yu?
5 Ñgyoozh, Shuaan de̱, de yu zeꞌ gur ricy nu laa dey de mbecy nir.
Nunu rted ziy de mbecy nu nac nir.
6 Rut dey de byud.
Rut dey de yu nguzh zi.
Rut dey de mbecy yad nu rcyiiñ ledz de̱.
7 Orzeꞌ rnii dey: “Ñgyoozh ni de mbecy Israeel wasac mi de ub na.
Nunu wagyicy cuen mi den”, rnii dey.
8 De ru losa̱ꞌ, ¡dzi ga ton na der!
¿Gul laꞌ gyet lag der cuen?
9 Ñgyoozh biñ nu psaꞌ lagy gyidag na.
¿Walab gaal nu mi zeꞌ wagyeñ mi?
Psaꞌ lagy mi urlon.
Orzeꞌ, ¿walab gaal nu mi zeꞌ wasac mi?
10 Mi zeꞌ rshuu num de lo la nez mbecy.
¿Walab gaal nu wac cuic mi cashtig ni ru?
Mi zeꞌ rlyuum ni dela mbecy.
¿Walab gaal nu sac shcab nim?
11 Ñgyoozh rad lagy mi la coz rnii too mbecy.
Rad lagy mi nu dzi coz pis rnii too mbecy.
Coz nu rnii too dey nañ gal nu na tub nu gyash ziꞌl lagy na.
12 Ñgyoozh, Shuaan de̱, dzi ni de mbecy benu ru rlyuur ni dey,
nunu benu ru rshaal ru lo dey de coz nu rnii de leey nir.
13 Orzeꞌ cuic ru nu zu lagy dey tiem nu zac deet yu
gal shuub la dzi nu duguuñ gyeegy ni de mbecy a̱ꞌ nap.
14 Gun Ñgyoozh waneꞌm de mbecy nu nac nim.
Ni wazaan mi dey.
15 Orzeꞌ de fushtiz gyicy dey gyel fushtiz mod nu seꞌñ tuubaꞌ tir.
Orzeꞌ de mbecy nap “O” nii dey zuub gyidag yu niñ.
16 ¿Ca na de mbecy nu guc nu ya̱
ornu gua̱ contr ni de mbecy a̱ꞌ nap?
¿Ca nay gua nuy ya̱ ornu gua̱ contr ni de yu zeꞌ?
17 Ti cueꞌ nu Ñgyoozh blocyuub mi ya̱,
ti cueꞌ ni, orzeꞌ bi ya̱a̱ zeꞌ nu yuꞌ de mbecy gut.
18 Ya̱ mnii to̱o̱: “Ya̱ bi cha̱ la̱ lo daꞌ.”
Orzeꞌ wangyes sa̱a̱ nu nac nu ru zaab rca lar ya̱.
19 La ziꞌl tiem nu rsug ica̱ nu rac deet nañ lardo̱o̱, orzeꞌ yet lagya̱,
gun ru rbic ru consuel ne̱.
20 Ru wagac nur de fushtiz nu wagyicy coz nu seꞌñ.
De yu zeꞌ rshes nañ dey leey nu chañ contr ni leey ni ru.
21 Rboo ic dey lac mod gyicy nuy de mbecy nap.
Nunu rnii dey nu rlagy ñi nu gat de mbecy nu sac falt ni.
22 Zeꞌ Ñgyoozh, Shuaan de̱, mi zeꞌ nam
gal nu na tub yuꞌ fert nu cha̱ cach lo̱ lo de losaꞌ yu̱u̱.
Nam gal na tub gyitaꞌ fert.
Zeꞌ cha̱ par nu ruu chu̱ lo dey.
23 Mi zeꞌ cuic mi cashtig ni dey nu nac de coz a̱ꞌ nap nu ricy yu.
Nit lom dey nu nac de cyi nu ricy yu.
Nit lom dey, gun mi zeꞌ nac mi Ñgyoozh ni de ub na.