Gyabic na gyel mbecy ni Ñgyoozh: riidz nu rul mbecy dzi nu rzu lagy dey
92
Ñgyoozh, biñ nu gya zir zu, dzi ga nap nu dric de̱ gras nir.Dzi ga nap nu ryabic de̱ gyel mbecy nir ornu rdul de̱ lor.
2 Dzi ga nap benu de napor la ne̱e̱ de̱ nu ru zaab rca lar de mbecy.
Dzi ga nap benu de rel la ne̱e̱ de̱ nu ru dzi ricy paar.
3 Dzi ga nap benu gyicy de̱ di ni de lo la beeñ,
lo̱o̱ de̱ tub di nu gugy za nu beeñ arpa.
4 Ñgyoozh, Shuaan de̱, ru bicy ru nu tonaꞌ la zu cyit lagya̱
nu nac de coz ily nu bicy ru.
Dzi yet lagya̱ de coz nu bicy ru.
Ndeꞌ nu rdula̱ lor.
5 Ñgyoozh, Shuaan de̱, tonaꞌ la coz ily bicy ru.
Nunu tonaꞌ la biigy de shcab nu ricy cup ru.
6 Ndeꞌ tub coz nu wac gad lagy de mbecy ton.
Mbecy shtee wac gyet lag yu cuen de nu ndeꞌ.
7 De mbecy a̱ꞌ nap druu zac dey, gal nu driib gyish.
De mbecy shiñ ricy mas rzup dey, tees nit loy par tub tir ziꞌl.
8 Gun ru Ñgyoozh, Shuaan de̱, riib ic ru dela mbecy par tub la.
9 Gun rad lagy de̱ nu gat de losaꞌ yuur.
Rad lagy de̱ nu nit lo dela mbecy nu shiñ ricy.
10 Zeꞌ ya̱ briic ru fers ne̱ gal na fers ni tub tor gyish.
Nap bicy nur ya̱, gun bicy ru nu zu cyit lagya̱.
11 Ya̱ gzaca̱ ornu nit lo de losaꞌ yu̱u̱.
Gyeña̱ ornu cush ti de mbecy a̱ꞌ nap zeꞌ.
12 Zeꞌ de mbecy nap, nap zu lagy yu zañ ñaꞌn gal nu rzac tub ya coc.
Galy dey gal nu raly de ya gyicy ni Libano.
13 Na dey gal nu na de yag nu mnuuz mbecy lo liꞌ ni yuꞌ ni Ñgyoozh.
Dzi nap nañ zub ñi zeꞌ nu zub yuꞌ yon ni Ñgyoozh.
14 Mas gal guush lañ, tees rbic ñi uugy,
nunu dub laa tiem caꞌ rgüiiñ nunu fert ñi.
15 Ndeꞌ gyicy ñi nu gad lagy na
nu Ñgyoozh, Shuaan den, mi zeꞌ ricy mi de coz nu seꞌñ.
Mi zeꞌ nac mi lugaar fert nu cha̱ laa lagya̱.
Rila wagyicy mi de coz a̱ꞌ nap.