Lo Ñgyoozh chan nu laa lagy na
91
Cyu ziꞌl mbecy nu gyiyeeñ zeꞌ nu rña Ñgyoozh, biñ nu gya zir zu,cyu ziꞌl nu rcyiiñ nañ gaꞌl ni biñ nu gya zu, biñ nu tonaꞌ la coz ily ricy,
2 yu zeꞌ gac niiy: “Lo ru ryapa̱ nu gad zeꞌ nu laa lagya̱.
Ru nac ru lugaar fert nu cha̱ cach lo̱ lo de losaꞌ yu̱u̱.
Ru nac ru Ñgyoozh ne̱.
Lo ru ricy cupa̱ consuel”, niiy.
3 Mi zeꞌ wazaan mi nu se la la coz gzac ru
nu nac de coz rishdzidz nu ri ngach,
nunu wazaan mi nu dugyir de güii dañ.
4 Gal nu ricy tub chigyiñ nu rsoow ma dzich ni ma nañ loweꞌ ma,
ni soow Ñgyoozh ru nañ loweꞌm,
gun zeꞌ gad lugaar nu cach lor.
Wazaan mi nu zac ru ni tub la coz a̱ꞌ nap,
gun mi zeꞌ nac mi biñ nu ricy paa.
5 Orzeꞌ ru wadzib lar lo de fers a̱ꞌ nap nu rded rel.
Ni wadzib ru nu shet yaa mbecy ru or widoo.
6 Ni wadzib lar lo de güii dañ nu rded rel.
Ni wadzib lar lo de fers a̱ꞌ nap nu rded or widoo.
7 Mas tub miily mbecy gyes saay tub laꞌ cuit ru nu gat yu.
Zeꞌ mas tii miily yu gat yu dub yub la lor,
tees ru se la la coz gzac ru.
8 Nunu zac urlo lar nu lac mod gad cashtig ni de mbecy a̱ꞌ nap.
9 Ru bicy ru nu Ñgyoozh nac mi lugaar nu char laa lagy ru.
Ru rcyiiñ ru lo Ñgyoozh biñ nu gya zir zu.
10 Orzeꞌ wadugyir ni tub la coz a̱ꞌ nap.
Nunu ni tub la coz a̱ꞌ nap waruꞌñañ yuꞌr.
11 Gun Ñgyoozh rguꞌm riiñ yaa de anc nim nu locyuub dey ru,
nunu ña dey ru ca ziꞌl lugaar nu char.
12 Orzeꞌ de yu zeꞌ laagy yaa dey ru,
gun orzeꞌ cueꞌ glagy gyiꞌr lo ni tub la gyitaꞌ.
13 Zuub gyiꞌr too biidz, bañ nu tonaꞌ la tañ.
O nu zuub gyiꞌr too bily, bañ nu ricy cup benen.
14 Ñgyoozh nam:
“Ya̱ loo mbaña̱ de mbecy nu rca lagy lo̱.
Zeꞌ de mbecy nu rnii nu ya̱ Shuaan yu,
ya̱ wazaana̱ nu gzac yu ni tub la coz a̱ꞌ nap.
15 Ornu cuedz dey ya̱, orzeꞌ locyuuba̱ dey.
Nunu gac du̱ yu tiem nu zac deet yu.
Loo napa̱ dey, nunu gyicya̱ nu gyed gyel mbecy niy.
16 Gyicya̱ nu duñ lo yu dey, nunu loo mbaña̱y”, na Ñgyoozh.